పలాస పోరాటం ఫలించింది… సోంపేటకు షిఫ్ట్!

ఉత్తరాంధ్రలో వెనుకబాటుతనం అన్న మాటకు పర్యాయపదంగా శ్రీకాకుళం జిల్లాను చూడాల్సి ఉంటుంది. ఈ జిల్లా దశాబ్దాలుగా అదే వేదనతో రోదనతోనే ఉంది. ఇక్కడ నుంచే దేశం నలుమూలలా వలసలు విస్తరిస్తున్నాయి. ప్రపంచంలో ఎక్కడ ఉన్న వారు అయినా వలస జీవులుగా శ్రీకాకుళం నుంచే కనిపిస్తారు.

శ్రీకాకుళంలో సారవంతమైన భూములు ఉన్నాయి. నదీ నదాలు ఉన్నాయి. పాలకులు చేయాల్సిందల్లా నదుల నీరు భూములకు పారించడం, వంశధార నాగావళి వంటి వాటిని ఆధునీకరించి అనుసంధానించి రైతుల పొలాలకు నీళ్ళు మళ్ళించడం.

దాని వల్లనే అసలైన అభివృద్ధి సాధ్యపడుతుందని మేధావులు అంటూంటారు. అయితే రైతుల భూములు తీసుకుని పారిశ్రామిక కారిడార్ల పేరుతో కార్పోరేట్ శక్తులకు కట్టబెట్టడం ద్వారా ఉన్న ఉపాధి పోతుంది, కొత్తగా దక్కేదీ ఉండదు అన్నదే అన్న దాతల ఆవేదన.

మాకు మా వ్యవసాయానికి చేయాల్సిన సాయం చేయి అందించి చేయండి అని కోరుకుంటున్నారు. ఈ తరుణంలో పలాస వద్ద కార్గో ఎయిర్ పోర్టు అని ప్రభుత్వం ప్రతిపాదించింది. భూసేకరణ కోసం గత కొద్దీ నెలలుగా ప్రయత్నాలు చేస్తూ వచ్చారు. అయితే ఇక్కడ రైతుల ఆందోళనలు నిరంతరాయంగా సాగడంతో అధికారులు కాస్తా వెనక్కి తగ్గారు.

అలా పలాస పోరాటం ఫలవంతం అయింది. కార్గో ఎయిర్ పోర్టు అయితే జిల్లాలోని సోంపేట మండలంలో ఏర్పాటు చేయాలని కొత్తగా ప్రభుత్వం నిర్ణయం తీసుకుంది అని అంటున్నారు. పలాస రైతులు అంతా ఒక్క త్రాటి మీదకు వచ్చి మా భూములు ఇవ్వమని చేసిన పోరాటం సక్సెస్ అయింది.

అయితే సోంపేటలో భూ సేకరణ ఏ విధంగా జరగనుంది అనేది చూడాలని అంటున్నారు. ఇక్కడ కూడా భూములు ఇచ్చేందుకు ఎవరు ముందుకు వస్తారు అన్నది తర్కించుకునే పరిస్థితి ఉంది. కేంద్ర మంత్రి రామ్మోహన్ నాయుడు ఉపాధి కోసమే ఎయిర్ పోర్టు జిల్లాకు తెస్తున్నామని అంటున్నారు.

వ్యవసాయేతర భూములను తీసుకుని కార్గో ఎయిర్ పోర్టుకు ఎంత అవసరమో అంత మేరకే భూసేకరణ జరిపితేనే మేలు అన్న సూచనలు వస్తున్నాయి. అదే విధంగా జిల్లాలో సాగు నీటి పథకాలను పూర్తి చేయడం ద్వారా రైతాంగాన్ని ఆదుకుంటే పెద్ద ఎత్తున వ్యవసాయ రంగంలోనే ఉపాధి కనిపిస్తుందని సూచనలు వస్తున్నాయి.