ఏపీ టీడీపీ ప్రెసిడెంట్ గేర్ మార్చాలా?

ఏపీ టీడీపీ ప్రెసిడెంట్ గా విశాఖ జిల్లాకు చెందిన గాజువాక ఎమ్మెల్యే పల్లా శ్రీనివాసరావుని చంద్రబాబు నియమించారు. ఆయనకు ఇది చాలా పెద్ద పదవి. ఆయన కంటే ముందు ఈ పదవిలో కిమిడి కళా వెంకట్రావు, కింజరాపు అచ్చెన్నాయుడు ఉన్నారు. ఈ ఇద్దరూ తమదైన విమర్శలతో మాటల ధాటితో దూసుకుపోయారు అని అంటుంటారు.

ప్రతీ రోజూ వారు మీడియాలో ఉండేవారు. అంతే కాదు ఏ చిన్న ఇష్యూ జరిగినా ప్రతిపక్షాన్ని పట్టుకుని టార్గెట్ చేసేవారు. కళా వెంకట్రావు, అచ్చెన్నాయుడు అలా ఏదో ఒక దాని మీద మాట్లాడుతూ ప్రత్యర్ధి పార్టీని కట్టడి చేసేవారు. ఆ పదవిలోకి పల్లా వచ్చారు కానీ ఆ స్పీడ్ ని ఇంకా అందుకోవాల్సి ఉంది అని అంటున్నారు.

ఏపీలో టీడీపీ ప్రభుత్వం అధికారంలో ఉంది. దాంతో అధికార పార్టీ ప్రెసిడెంట్ గా పల్లాకు మరింత బాధ్యత పెరిగింది. ఏపీలో వైసీపీ ప్రభుత్వం మీద చేసే విమర్శలకు పార్టీ పరంగా మొదట రియాక్ట్ కావాల్సింది పల్లావే అని అంటున్నారు. అయితే ఆయన కాస్తా నెమ్మదిగా స్పందిస్తున్నారు అన్న చర్చ అయితే తమ్ముళ్లలో సాగుతోంది.

స్వతహాగా పల్లా మృదు స్వభావిగా ఉంటారు. ఆయన రాజకీయం తనదైన పద్ధతిలో ఉంటుంది. ఆయన లో ప్రొఫైల్ ని కొనసాగిస్తారు. అయితే ఏపీలో రాజకీయం అలా లేదు మాటకు మాట అన్నట్లుగా ఉంది. ఇంకా చెప్పాలీ అంటే ఒకటికి పది ఇవ్వాల్సిన అవసరమూ ఉంది.

దాంతో పల్లా స్పీడ్ పెంచాలి గేర్ మార్చాలి అని అంటున్నారు. అయితే రాను రానూ పల్లా తన సత్తా చూపిస్తారు అని అంటున్నారు ఆయన అనుచరులు. ఏపీలో టీడీపీకి ఇపుడు అన్నీ మంచి శకునములే అన్నట్లుగా రాజకీయం ఉంది. దానిని పల్లా అందిపుచ్చుకుంటే ఆయన అభిమానులు ఆశిస్తున్నట్లుగా ఉన్నత శిఖరాలకు చేరుకుంటారు అని అంటున్నారు.