Epaper
మీ ఫోనుల్లో వాట్సప్ స్టేటస్ లను చూసుకోండి.. కనీసం యాభైశాతం కాంటాక్ట్స్ లలో పవన్ కల్యాణ్ బొమ్మ కనిపిస్తుంది. అందులో ఆయనకు పుట్టినరోజు శుభాకాంక్షల వెల్లువ కనిపిస్తుంది. జనసేనాని, తెలుగులో అసమానమైన క్రేజ్ ఉన్న నటుల్లో ఒకడు.. పవన్ కల్యాణ్ 54 ఏళ్లు పూర్తి చేసుకుని 55వ సంవత్సరంలోకి అడుగుపెడుతున్నారు. ఈ సందర్భంగా ఆయనకు పుట్టినరోజు శుభాకాంక్షలు!
తెలుగు రాష్ట్రాల్లో కొన్ని లక్షల మంది అభిమానులు పవన్ కల్యాణ్ కు వెల్లువలా పుట్టినరోజు శుభాకాంక్షలు తెలియజేస్తున్నారు. కొన్ని లక్షల మంది తమ తమ వాట్సప్ స్టేటస్ లుగా పవన్ కల్యాణ్ ఫోటోలు పెట్టుకుని మురిసిపోతున్నారు. ఆయన చిత్రాలకు సంబంధించి.. బర్త్ డే స్పెషల్ గావిడుదల అయిన స్టిల్స్ ను పంచుకుంటూ.. ఆనందిస్తున్నారు. పవన్ కల్యాణ్ పుట్టినరోజును మరింత వేడుకగా జరుపుకోవడానికి వారు ఉత్సాహంగా చేస్తున్నారు. పవన్ బొమ్మలతో కామన్ డీపీలు విడుదల అయ్యాయి. అందరూ వాటితో పండగ చేసుకుంటున్నారు.
ఇంత వెల్లువలా వస్తున్న అభిమానాన్ని, సోషల్ మీడియా మొత్తం ముంచెత్తేస్తున్న పవన్ పుట్టినరోజు ఉధృతిని చూసినప్పుడు.. ఆయన రాజకీయ ప్రస్థానం మీద మక్కువ పెంచుకునే అభిమానులకు కంగారు పుడుతోంది. అందుకు ఒక సహేతుకమైన కారణం కూడా ఉంది.
ఎన్ని లక్షల మంది పవన్ కల్యాణ్ పుట్టినరోజు శుభాకాంక్షలను స్టేటస్ లుగా పెట్టుకున్నప్పటికీ.. అందులో ఆయన రాజకీయ ప్రస్థానాన్ని గుర్తుచేసేవి కనిపించడం లేదు. అన్నీ ఆయన సినిమాలకు సంబంధించినవే.
ఇలాంటి పరిస్థితి ఉంటే.. పవన్ కల్యాణ్ ను తెలుగు రాష్ట్రాల్లో కొన్ని కోట్ల మంది కూడా ప్రేమించవచ్చు గాక.. కానీ.. ఆయన రాజకీయ ఆశలు ఎలా నెరవేరుతాయి. జనసేనకు విజయాలు ఎలా దక్కుతాయి? అనేది వారందరి మదిలో మెదలుతున్న సందేహం. ఆయన పుట్టినరోజు సందర్భంగా.. జనసేన పార్టీ అయినా, పార్టీలో కీలక నాయకులు అయినా.. రాజకీయ ప్రస్థానాన్ని గుర్తు చేసేలా కొన్ని కామన్ డీపీలు తెచ్చి ఉన్నా బాగుండేది. రాజకీయ ప్రసంగాల్లోనుంచి కొన్ని కీలకమైన డైలాగుల్ని స్టేటస్ లలో పెట్టుకోవడం కోసం ప్రచారంలోకి తెచ్చిఉన్నా బాగుండేది.
కానీ.. ఇప్పుడు పవన్ కల్యాణ్ పుట్టినరోజును గమనిస్తోంటే.. ఆయనకున్న విపరీతమైన ఫ్యాన్ ఫాలోయింగ్ సినిమానటుడిగా మాత్రమే చూస్తోందా? అనిపిస్తోంది. పవన్ కల్యాణ్ రాజకీయ ప్రసంగాల్లో చాలా సీరియస్ విషయాలు మాట్లాడుతున్నప్పుడు.. విజిల్స్ మోగుతుంటాయి తప్ప.. ఆ విషయాన్ని సీరియస్ గా విని వంటబట్టించుకునే వారు కనిపించరు. ఈ డీపీలను, ఆ విజిల్స్ ను కలిపి అంచనా వేసుకుంటే.. పవన్ కల్యాణ్ కు పెద్దసంకేతమే అందుతుంది.