ఒంట‌రైన పాకిస్థాన్‌

ప్ర‌స్తుతం భార‌త్‌, పాకిస్థాన్ మ‌ధ్య భీక‌ర పోరులో నైతికంగా …దాయాది దేశం ఒంట‌రైంది. ఏ ఒక్క‌రూ పాకిస్థాన్ ఉగ్ర‌దాడుల్ని స‌మ‌ర్థించ‌డం లేదు. దీన్నిబ‌ట్టి టెర్ర‌రిజంపై ప్ర‌పంచంలో ఏ దేశ‌మూ మ‌ద్ద‌తు ఇవ్వ‌ద‌ని స్ప‌ష్ట‌మైంది. మ‌రోవైపు పాకిస్థాన్ ఎంపీలు, రాజ‌కీయ నాయ‌కులు ఆదుకోవాల‌ని ఎంత‌గా వేడుకుంటున్నా ద‌య చూపే వాళ్లే క‌రువ‌య్యారు.

ఉగ్ర‌వాదుల్ని పెంచి పోషిస్తున్న పాకిస్థాన్ త‌గిన మూల్యం చెల్లించుకుంటోంది. తాజాగా జీ7 దేశాల నుంచి పాకిస్థాన్‌కు ఊహించ‌ని ఎదురు దెబ్బ త‌గిలింది. గ‌త నెల 22న‌ పహల్గామ్ ఉగ్రదాడిని జీ7 దేశాలు తీవ్రంగా ఖండించాయి. ఈ మేరకు అమెరికా, కెనడా, ఫ్రాన్స్, జర్మన్, జపాన్, ఇటలీ దేశాలు ఉమ్మడిగా పాక్ చ‌ర్య‌ల్ని త‌ప్పు ప‌ట్టడం గ‌మ‌నార్హం.

ఇదే సంద‌ర్భంలో ఇరుదేశాలు చ‌ర్చ‌లు జ‌రిపి, శాంతియుత వాతావ‌ర‌ణాన్ని నెల‌కొల్పాల‌ని జీ7 దేశాలు స‌ల‌హా ఇచ్చాయి. యుద్ధం వ‌ల్ల అన‌ర్థాలే త‌ప్ప‌, ఎలాంటి ప్ర‌యోజ‌నం వుండ‌ద‌ని ఇరు దేశాల‌ను జీ7 దేశాలు హెచ్చ‌రించాయి. రెండు దేశాల ప్ర‌జ‌ల క్షేమాన్ని తాము కోరుకుంటున్న‌ట్టు ఆ దేశాలు తెలిపాయి. ఉగ్ర‌వాద చ‌ర్య‌ల్ని ప్రోత్స‌హించే పాకిస్థాన్‌, మ‌రోవైపు అమాయ‌కుల‌న్న‌ట్టుగా న‌టిస్తోంది.

ఇత‌ర దేశాల మ‌ద్ద‌తు కోరుకుంటోంది. కానీ పాకిస్థాన్ విజ్ఞ‌ప్తిని ఏ దేశ‌మూ ప‌రిగ‌ణ‌లోకి తీసుకోవ‌డం లేదు. అంతెందుకు, సింధూ జ‌లాల విష‌యంలో జోక్యం చేసుకోవాల‌నే పాకిస్థాన్ విజ్ఞ‌ప్తిని ప్ర‌పంచ బ్యాంక్ తోసిపుచ్చింది. తాము సాయం చేయ‌డ‌మే త‌ప్ప‌, ఇలాంటి యుద్ధ వాతావ‌ర‌ణంలో జోక్యం చేసుకోలేమ‌ని పాకిస్థాన్‌కు తేల్చి చెప్పింది. దీంతో దౌత్య‌ప‌రంగా, అలాగే నైతికంగా పాకిస్థాన్ పూర్తిగా ఏకాకిగా మిగిలింది.