Epaper
అఖండ సినిమాలో బాలకృష్ణ హీరో. పైగా డ్యూయల్ రోల్. కాబట్టి సినిమా మొత్తం ఆయన చుట్టూనే తిరుగుతుంది. కానీ ఈ విషయాన్ని హీరోయిన్ ప్రగ్యా జైస్వాల్ ఒప్పుకోవడం లేదు. సినిమాలో తనది కూడా కీలకమైన పాత్ర అంటోంది. పైగా తన పాత్ర లేకపోతే, సినిమానే లేదంటోంది.
“నేను ఐఏఎస్ ఆఫీసర్ పాత్రను పోషించాను. శ్రావణ్య అనే ఐఏఎస్ ఆఫీసర్ పాత్రలో కనిపిస్తాను. ఇది చాలా కొత్తగా ఉంటుంది. ఇది వరకు చూసిన ప్రగ్యా కనిపించొద్దని బోయపాటి గారు అన్నారు. ఆ పాత్రను పోషించేందుకు చాలా కష్టపడ్డాను. అఖండ చిత్రంలో నాది చాలా ముఖ్యమైన పాత్ర. ఆ కారెక్టర్ చుట్టే కథ తిరుగుతుంది. నాకు ఎదురైన సంఘటనల వల్లే రెండో పాత్ర అయిన అఖండ ఎంట్రీ ఉంటుంది. అలా ఈ సినిమాలో నాకు నటించేందుకు ఎక్కువ స్కోప్ ఉన్న కారెక్టర్ దక్కింది.”
ఇలా అఖండ సినిమాలో తన పాత్ర తీరుతెన్నుల్ని బయటపెట్టింది ప్రగ్యాజైశ్వాల్. ఈ సినిమాలో ఓ కొత్త ప్రగ్యాను చూస్తారని ధీమాగా చెబుతోంది. ఈ సందర్భంగా సినిమాకు సంబంధించి మరో కీలక విషయాన్ని కూడా బయటపెట్టింది ప్రగ్యా.
“బోయపాటి అందర్నీ మార్చేశారు. సెట్స్ లో జగపతి బాబును గుర్తుపట్టడానికి నాకు చాలా టైమ్ పట్టింది. శ్రీకాంత్ కూడా అంతే. ఇక అఘోరాగా బాలయ్య పాత్ర గురించి అందరికీ తెలిసిందే. ఈ కోవలోనే నా పాత్ర కూడా ఉంటుంది. ఇలాంటి పాత్ర ఎలా పోషించానో నాకే అర్థం కావడం లేదు.”
అఖండ సినిమా ఇంకా చూడలేదంటోంది ప్రగ్యా జైశ్వాల్. వీలైతే ఆడియన్స్ తో కలిసి థియేటర్లలో చూస్తానని చెబుతోంది. డిసెంబర్ 2న థియేటర్లలోకి వస్తోంది అఖండ.