Epaper
హైదరాబాద్ లో వరుసగా రోడ్డు ప్రమాదాలు చోటుచేసుకుంటున్నాయి. తాజాగా మరో కారు ప్రమాదం జరిగింది. ఈరోజు తెల్లవారుజామున జరిగిన ఈ దుర్ఘటనలో ఏకంగా ముగ్గురు మృతి చెందారు. వీళ్లలో ఇద్దరు జూనియర్ ఆర్టిస్టులు ఉన్నారు.
గచ్చిబౌలిలో హెచ్ సీ యూ రోడ్డులో వేగంగా వెళ్తున్న కారు, అదుపుతప్పి డివైడర్ ను ఢీకొట్టింది. ఉదయం 3 గంటల ప్రాంతంలో జరిగిన ఈ ప్రమాదంలో ముగ్గురు అక్కడికక్కడే మృతి చెందారు. వీళ్లలో ఇద్దరు జూనియర్ ఆర్టిస్టులు ఉన్నారు. వీళ్ల ఇద్దరి పేర్లు ఒకటే. ఒకరు ఎన్.మానస కాగా, మరొకరు ఎం.మానస. మృతి చెందిన మరో వ్యక్తిని విజయవాడకు చెందిన బ్యాంక్ ఉద్యోగిగా గుర్తించారు.
ఘటన జరిగిన సమయంలో కారులో మొత్తం నలుగురు ఉన్నారు. ముగ్గురు స్పాట్ లో మృతి చెందగా.. మరో జూనియర్ ఆర్టిస్ట్ సిద్ధుకు తీవ్ర గాయాలయ్యాయి. వెంటనే సమీపంలోని హాస్పిటల్ లో అతడ్ని జాయిన్ చేశారు. ప్రస్తుతం అతడి పరిస్థితి విషమంగా ఉంది.
దుర్ఘటన జరిగిన సమయంలో కారు మితిమీరిన వేగంతో వెళ్తున్నట్టు పోలీసులు గుర్తించారు. ఆ టైమ్ వాళ్లంతా ఎక్కడ్నుంచి, ఎటు వైపు వెళ్తున్నారనే అంశంపై పోలీసులు ఆరా తీస్తున్నారు. బంధువులకు సమాచారం అందించి కేసు నమోదు చేసి దర్యాప్తు చేస్తున్నారు.