Epaper
కండల వీరుడు సల్మాన్ ఖాన్ కెరీర్ లో బిగ్గెస్ట్ బ్లాక్ బస్టర్స్ లో ఒకటి బజరంగీ భాయ్ జాన్. ప్రేక్షకులకు సల్మాన్ ఇమేజ్ కంటే, అందులో కంటెంట్ ఎక్కువగా నచ్చింది. సల్మాన్ ఈ టైపు సినిమాలు మరిన్ని చేయాలంటూ ఆ టైమ్ లో నార్త్ లో ఓ వర్గం ఓ చిన్నపాటి ఉద్యమమే చేసిందంటే ఈ సినిమా సృష్టించిన సంచలనాన్ని అర్థం చేసుకోవచ్చు.
మళ్లీ ఇన్నాళ్లకు ఈ సినిమా తెరపైకొచ్చింది. బజరంగీ భాయ్ జాన్ సినిమాకు సీక్వెల్ చేస్తానని స్వయంగా సల్మాన్ ఖాన్ ప్రకటించాడు. దీనికి ఆర్ఆర్ఆర్ ప్రీ-రిలీజ్ ఈవెంట్ వేదికగా మారింది.
ముంబయిలో ఆర్ఆర్ఆర్ ఈవెంట్ గ్రాండ్ గా జరిగింది. ఈ వేడుకకు సల్మాన్ ఖాన్ ప్రత్యేక అతిథిగా హాజరయ్యాడు. ఇదే వేదికపై తన హిట్ సినిమాకు సీక్వెల్ ను ప్రకటించాడు సల్మాన్. ఆర్ఆర్ఆర్ వేదికపైనే ఈ సినిమాను ఎనౌన్స్ చేయడానికి ఓ కారణం ఉంది.
ఆర్ఆర్ఆర్ సినిమాకు కథా రచయిత విజయేంద్రప్రసాద్. ఈయనే బజరంగీ సినిమాకు కూడా కథ అందించారు. అందుకే సల్మాన్, తన సీక్వెల్ ప్రకటనకు ఆర్ఆర్ఆర్ ఫంక్షన్ ను వేదికగా చేసుకున్నాడు. సీక్వెల్ కు కూడా విజయేంద్ర ప్రసాదే కథ అందిస్తారని ప్రకటించాడు సల్మాన్.
2015, జులై 17న రిలీజైంది బజరంగీ భాయ్ జాన్. కబీర్ ఖాన్ డైరక్ట్ చేసిన ఈ సినిమాలో కరీనాకపూర్ హీరోయిన్ గా నటించింది. ఓ చిన్నారి చుట్టూ తిరిగే ఈ కథ అప్పట్లో పెద్ద విజయం సాధించింది.