హైదరాబాద్ ​ఎంపీలో ఏమిటీ ఈ మార్పు?

రాజకీయ నాయకులు ఎప్పుడు ఎలా మారుతారో తెలియదు. కొన్ని సంఘటనలు, పరిణామాలు వారిలో అనుకోని మార్పులు తెస్తుంటాయి. అయితే ఈ మార్పు ప్రజల్లో అనుమానాలు కలిగిస్తూనే ఉంటుంది. అప్పుడు అలా ఉండేవాడు కదా. ఇప్పుడు ఎందుకిలా మారిపోయాడు? కారణం ఏమిటి? అని అనుమానాలు వ్యక్తం చేస్తుంటారు. ఎవరికి తోచిన భాష్యాలు వారు చెప్పుకుంటూ ఉంటారు. హైదరాబాద్​ ఎంపీ, ఎంఐఎం అధినేత అసదుద్దీన్​ ఓవైసీలో చాలా మార్పు వచ్చింది. ఓవైసీలో ఎప్పుడు మార్పు వచ్చింది?

పలహల్గాంలో పాక్​ ఉగ్రవాదులు భారత పర్యాటకులను నిర్దాక్షణ్యంగా కాల్చి చంపిన కిరాతక ఘటన తరువాత వచ్చింది. ఈ కిరాతక ఘటన తరువాత ఇండియా పాకిస్తాన్​ మీద దాడి చేయడం, పాక్​ కాల్పుల ఉల్లంఘనను అతిక్రమించి కొన్ని గంటల్లోనే మళ్లీ దాడులు చేయడం, ఇండియా పాక్​పై మళ్లీ భీకరంగా దాడులు చేస్తుండటం…ఇదంతా తెలిసిందే. పాక్​ ఉగ్రవాదులు దాడులు చేసి, దానికి ప్రతీకారంగా ఇండియా ఆపరేషన్​ సిందూర్​ పేరుతో ప్రతి దాడులు చేయడం మొదలుపెట్టినప్పటినుంచి ఓవైసీలో దేశభక్తి విపరీతంగా పెరిగిపోయింది. అది ఆయనలో పొంగిపొర్లుతోంది.

ఒకవిధంగా చెప్పాలంటే దేశభక్తి తమకే సొంతమనుకునే బీజేపీ నాయకులకు మించి ఓవైసీ పాకిస్తాన్​పై విరుచుకుపడుతున్నాడు. తీవ్రంగా ఆగ్రహిస్తున్నాడు. ఇంకా చెప్పాలంటే పాకిస్తాన్​ను బూతులు తిడుతున్నాడు. బహిరంగ వేదికలపై ‘పాకిస్తాన్​ముర్దాబాద్​’ అని శాపనార్ధాలు పెడుతున్నాడు. దేశంలోని ఏ ముస్లిం నేతల్లోనూ కనిపించని ఆగ్రహం ఓవైసీలో కనిపిస్తోంది. ఉగ్రదాడి జరిగిన పహల్గాంకు కూడా వెళ్లి అక్కడా పాకిస్తాన్​ను అడ్డమైన తిట్లు తిట్టాడు. తాజాగా అవసరమైతే దేశం కోసం ప్రాణాలు ఇవ్వడానికి దేశంలోని ముస్లింలంతా సిద్ధంగా ఉన్నారని అన్నాడు.

అసలు ఇస్లాం పేరు పలికే అర్హత కూడా పాకిస్తాన్​కు లేదన్నాడు. శాంతికి, సామరస్యానికి ప్రతిరూపం ఇస్లాం అని, అలాంటి మతం పేరుతో మారణహోమం సృష్టించడం ఏమిటని ప్రశ్నించాడు. పాకిస్తాన్​ విధానాలను తాము (ఎంఐఎం) ఎప్పుడో వ్యతిరేకించామన్న విషయాన్ని అందరూ గుర్తించాలని ఓవైసీ అన్నాడు. దేవుడి దయ వల్లనే తాము (ముస్లింలు) భారత దేశంలో పుట్టామని అన్నాడు. పాక్​పై ఇండియా దాడులు చేయడంలో ఏమాత్రం తప్పు లేదన్నాడు. ఓవైసీ దేశంలోని అనేక ప్రాంతాల్లో తిరుగుతూ పాకిస్తాన్​ను ఎండగడుతున్నాడు. అసదుద్దీన్ ఓవైసీ ఇటీవల ఎక్కువగా వార్తలలో ఉంటున్నాడు. ఆయనకు ఏ మాత్రం చాన్స్ దొరికిన దాయాదిని ఏకిపారేస్తున్నాడు.

పాక్ ను అఫిషియల్ బిచ్చగాడిలా అభివర్ణించాడు. పాకిస్తాన్‌కు ఐఎంఎఫ్ రుణం మంజూరు చేయడంపై తీవ్రస్థాయిలో మండిపడ్డాడు. పాక్‌కు నిధులు ఇవ్వడం అంటే ఒక ఉగ్రవాద సంస్థకు రుణం ఇవ్వడమేనని అన్నాడు. ఓవైసీలో దేశభక్తి ఈ మధ్యనే ఉప్పొంగుతోందని చెప్పుకున్నాం కదా. మరి గతంలో ఎలా ఉండేవాడు? ఉగ్రవాదుల పట్ల, పాకిస్తాన్​ పట్ల ఇంత తీవ్ర వ్యతిరేకత, ఇంతటి ఆగ్రహం ఎప్పుడూ వ్యక్తం చేసిన దాఖలాలు లేవు. పాకిస్తాన్​ ఇంత ఘాటుగా ఎప్పుడూ తిట్టలేదు కూడా. గతంలో చాలాసార్లు పాక్​ ఉగ్రవాదులు భారత్​లో దాడులు చేశారు. మారణహోమం సృష్టించారు.

హైదరాబాద్​లో కూడా దాడులు జరిగాయి. అయినా అసదుద్దీన్​ ఓవైసీ ఎన్నడూ పెద్దగా స్పందించలేదు. ఆయన తమ్ముడు అక్బరుద్దీన్​ ఓవైసీ ఒకసారి భారత్​కు వ్యతిరేకంగా మాట్లాడాడు. పదిహేను నిమిషాలు కళ్లు మూసుకుంటే చాలు భారత్​లో ఊచకోత కోస్తామని తమ్ముడు కామెంట్​ చేశాడు. అయినా ఓవైసీ సైలెంటుగానే ఉన్నాడు. హైదరాబాద్​ లో జరిగిన ఉగ్రదాడుల్లో పాకిస్తాన్​ హస్తముందని అనేకసార్లు రుజువైంది. అయినా అసదుద్దీన్​ అప్పుడు పాకిస్తాన్​ను ఏమీ అనలేదు. ఒకవేళ ఖండించినా అదీ మొక్కుబడిగా మాత్రమే. కాని ఇప్పుడు మాత్రం తీవ్రంగా రెచ్చిపోతున్నాడు.

రాజకీయంగా, భావజాలపరంగా ప్రధాని మోదీకి ఓవైసీ వ్యతిరేకం. కాని పాక్​పై దాడుల విషయంలో ప్రభుత్వాన్ని ఓవైసీ ప్రశంసిస్తున్నాడు. అంటే పరోక్షంగా ప్రధానిని మెచ్చుకుంటున్నట్లే కదా. ఈ సమయంలో కొందరు కాంగ్రెసు నాయకుల్లా ప్రభుత్వానికి వ్యతిరేకంగా మాట్లాడితే అది పాకిస్తాన్​ను సమర్థించినట్లవుతుంది. తన అసలే ముస్లిం కాబట్టి బీజేపీ నాయకులు ఊరుకోరు. పాతబస్తీని అల్లకల్లోలం చేస్తారు. అందుకే ఓవైసీ భయపడుతున్నాడనే ప్రచారం జరుగుతోంది. అందుకే దేశభక్తిని ప్రదర్శిస్తున్నాడని కొందరు అంటున్నారు. కాని నిజంగానే ఓవైసీలో మార్పు వచ్చివుండవచ్చు కదా.