పరనిందే పరమార్థమా!

‘ఆత్మ స్తుతి.. పరనింద’ సిద్ధాంతం రాజకీయ నాయకులకు అత్యంత అవసరమైన సిద్ధాంతాలలో ఒకటి. ‘నీ భజన నువ్వే చేసుకోవాలి మిత్రమా’ అనే నీతి నాయకులకు అందరికీ తెలుసు! ‘నీ ప్రత్యర్థిని ఒక విషపురుగుగా చిత్రించి జనాన్ని నమ్మించాలి మిత్రమా’ అనే కుటిల నీతి నాయకులలో తెలివైన వారికి మాత్రమే తెలుసు! చంద్రబాబు నాయుడు తెలివైన నాయకుడు మాత్రమే కాదు– ఆ సిద్ధాంతానికి అనేక కొత్త కొత్త మెలకువలను జోడించగల సృజన శీలురు, కార్య సమర్ధులు కూడా!

జగన్మోహన్ రెడ్డిని నిందించడంలోనే ఆయన అతి గొప్ప ఆనందాన్ని పొందుతున్నట్లుగా వర్తమాన పరిణామాలు కనిపిస్తున్నాయి. చంద్రబాబు రాజకీయ జీవితంలో 4.0 ఇన్నింగ్స్ లో– మరొక అంశమేదీ ఆయనకు అంతగా కిక్ ఇవ్వడం లేదంటే నమ్మవచ్చు. ఆ ధోరణుల మీదనే ఈ వారం గ్రేట్ ఆంధ్ర కవర్ స్టోరీ పరనిందే పరమార్థమా?’

ఇద్దరు మిత్రులు కలిసిన ఏ సందర్భాన్నయినా గమనించండి. తొలుత ఆ ఇద్దరూ తమ ఇరువురి కుశలం గురించి విచారించుకుంటారు. ఆ తర్వాత తాము సాధించిన విజయాలు, తమ గొప్పదనాల గురించి చెప్పుకుంటారు. కొంతవరకు సినిమాలు, క్రికెట్టూ, రాజకీయాలూ మీద చెత్త చర్చ నడుస్తుంది. ఆ తర్వాత కూడా వారికి సమయం మిగిలిపోతుంది. కానీ మాట్లాడుకోడానికి విషయాలు ఉండవు. అప్పుడిక మూడో మిత్రుడి గురించి మాట్లాడుకోవడం ప్రారంభిస్తారు! తమ ఎదురుగా లేనివాడి గురించి!! వాడి లోపాలు, వాడి వెధవతనం గురించి పుంఖానుపుంఖాలుగా చెప్పుకోవడం మొదలెడతారు.. ఆ టాపిక్ లో వారికి ఇక అలసట రాదు.. కంటెంట్ అయిపోవడం అనేది కూడా ఉండదు.

కొన్ని సందర్భాల్లో ఈ వరుసక్రమం మారవచ్చు. మూడో మిత్రుడిని తిట్టుకోవడం కాస్త ముందుకు జరగవచ్చు. మరికొన్ని సందర్భాలలో అసలు మూడో మిత్రుడిని తిట్టుకోవడం కోసమే ఆ ఇద్దరూ కలవడం కూడా జరగవచ్చు. ఇతరులను నిందిస్తూ బతకడంలో అంతటి మజా ఉంటుందన్నమాట!

ఒకరిని తిట్టడం వలన ఎలాంటి ప్రత్యేకమైన ప్రయోజనం, లాభం ఉండని మామూలు వ్యక్తుల విషయంలోనే ఇంత కుటిలత్వం దాగి ఉంటే.. ఇక రాజకీయ నాయకుల సంగతి ఏమిటి? తమ ప్రత్యర్థిని నిందించడం వలన వారికి ఎంతో కొంత ప్రయోజనం ఉంటుంది. ప్రత్యర్థి మీద తాము చేసే దుష్ప్రచారాన్ని ప్రజలు నమ్మితే, అది ఎదుటివాడి పతనాన్ని నిర్దేశిస్తుంది. ఆటోమేటిగ్గా.. అది తమ ఉన్నతికి దారితీస్తుంది. అందుకే

‘‘ఏ నేతల చరిత్ర చూసినా..
ఏమున్నది గర్వకారణం..?
పరనిందల పారాయణంలో
తరించి పోవడమే నిత్యం!’’

అని పాడుకోవాల్సి వస్తుంది. అకారణంగా, అసందర్భంగా, అనాలోచితంగా తమ ప్రత్యర్థుల మీద నిందలు వేసేస్తూ ఉండడం.. వాటిని ప్రజలు నమ్మితే తమకు ప్రయోజనం ఉంటుంది. నమ్మకపోయినా ప్రస్తుతానికి కోల్పోతున్నది ఏం లేదు కదా? అనే సిద్ధాంతానికి కట్టుబడడం వారి శైలి. రాజకీయ నాయకుల నిందలు ఎలా ఉంటాయంటే.. మసిగుడ్డ కాల్చి మొహాన పారేసినట్టే. మసి అంటుకోకుండా ఉండాలంటే.. అవతలి వాడే మొహం కడుక్కోవాలి. అంతేతప్ప మరొకటి జరగదు.

ప్రస్తుత రాజకీయాల్లో దేశంలోనే కురువృద్ధుల్లో ఒకడైన ఏపీ ముఖ్యమంత్రి నారా చంద్రబాబునాయుడుకు ఇలాంటి టెక్నిక్స్ తెలియనివి కావు! ఆయన ఇప్పుడు నాలుగోసారి ముఖ్యమంత్రి అయ్యారు. నాలుగుదశాబ్దాల రాజకీయ జీవితాన్ని ఎన్నడో పూర్తిచేసుకుని ప్రస్థానం సాగిస్తున్నారు. ఇలాంటి సమయంలో.. కాస్త పరిణతితో కూడిన రాజకీయ తెలివితేటలను ప్రదర్శిస్తారని మనం అనుకుంటాం. కానీ ఆయన వ్యవహారకుశలతలో, అనుసరిస్తున్న పద్ధతుల్లో కొంత బ్యాలెన్స్ లోపించినట్టుగా కనిపిస్తోంది.

జగన్ ను దుర్మార్గుడిగా, అసమర్థుడిగా, అభివృద్ధి నిరోధకుడిగా, అవినీతిపరుడిగా చిత్రీకరించడం అనేది చంద్రబాబు యొక్క మౌలిక లక్ష్యం.ఎన్నికలకు ముందు ప్రజల్ని నమ్మించడానికి ఆయన ఇలాంటి మాటలు పదేపదే చెబుతూనే ఉండాలి.. అది ఆయన మనుగడకు అవసరం కూడా! కానీ బురద చల్లుడు అనే కార్యక్రమానికి కూడా ఒక గడువు ఉంటుందనే సంగతిని చంద్రబాబు మరచిపోతున్నారు. ఎన్డీయే కూటమి ప్రభుత్వం పరిపాలన పగ్గాలు చేపట్టి అయిదు నెలలు కావస్తోంది. ఇప్పటికీ తమ ప్రభుత్వాన్ని నడుపుతున్న ఏకైక చైతన్య శక్తి– ‘జగన్ ను తిట్టడం’ అన్నట్టుగా చంద్రబాబునాయుడు వ్యవహరిస్తే ఎలాగ? ప్రజలు నవ్వుకుంటారు కదా.. నమ్మకాన్ని సడలించుకుంటారు కదా? అనేది ఆలోచించాల్సిన విషయం.

అనునిత్యం జగన్నామ పారాయణం!

ఆవు వ్యాసం మాత్రమే చదువుకుని వెళ్లిన కుర్రవాడు బడిలో టీచరు ఏ ప్రశ్న అడిగినా.. తిప్పితిప్పి ఆవు వ్యాసం వద్దకే తీసుకువచ్చినట్టుగా చంద్రబాబునాయుడు పరిపాలన ఉంటుంది. డెబ్భయి నాలుగేళ్ల అనుభవజ్ఞుడైన ఈ నాయకుడు.. ఇంట్లో ఏదో ఒక రోజున దైవనామస్మరణనైనా మరచిపోతారేమో గానీ.. బయటకు వచ్చినప్పుడు.. జగన్మోహన్ రెడ్డిని తిట్టడం మాత్రం ఏరోజూ మరచిపోరు! ఏ చిన్న కీడుగురించి మాట్లాడుకోవాల్సి వచ్చినా దానికి సంబంధించిన మూలకారణం జగన్ అని అభివర్ణించడానికి ఆయన వద్ద అనేకానేక లింకులు ఉంటాయి.

సాధారణంగా ఏ రాష్ట్రంలోనైనా ప్రభుత్వం మారినప్పుడు రొటీన్ గా జరిగే బురద చల్లుడు కార్యక్రమాలు కొన్ని ఉంటాయి. దిగిపోయిన ప్రభుత్వం రాష్ట్రాన్ని ముంచేసిందని, వారి పరిపాలనలో రాష్ట్రానికి ద్రోహం జరిగిందని, వారి చేతగానితనం రాష్ట్రాన్ని ఇరవయ్యేళ్లు వెనక్కు తీసుకువెళ్లిందని ఆరోపించడం కొత్త ప్రభుత్వానికి ఉండే మొట్టమొదటి బాధ్యత. ఆ రకంగా పాత ప్రభుత్వాన్ని నిందిస్తే తప్ప తమకు మనుగడ లేదని ప్రతి ఒక్కరూ నమ్ముతుంటారు. దాదాపుగా ప్రతి కొత్త ప్రభుత్వమూ.. పాత పాలకుల తీరుమీద శ్వేతపత్రాలు విడుదల చేయడం అనేది ఇలాంటి బురద చల్లుడులో భాగమే. చంద్రబాబునాయుడు కూడా అదే పని చేశారు. వివిధ శాఖల వారీగా అనేక శ్వేతపత్రాలు విడుదల చేశారు. సాధారణంగా అక్కడితో ఆగాలి. ఆగలేదు!

జగన్ తీసుకువచ్చిన ఇసుక అమ్మకాల విధానం, ప్రభుత్వ దుకాణాల ద్వారా మద్యం విక్రయించే విధానం రెండూ చాలా దుర్మార్గమైనవని.. వాటిని మార్చాల్సి ఉన్నదని చెప్పారు. మార్చారు. అక్కడైనా ఆగి ఉండాల్సింది. అలా కూడా జరగలేదు. బుడమేరు వరద దెబ్బ దగ్గరినుంచి, రాష్ట్రంలో ఏ చిన్న దుర్ఘటన జరిగినా.. దానికి జగన్ బాద్యుడు అన్నట్టుగా మాట్లాడుతూ ఉన్నారు. జగన్ ను బాధ్యుడుగా చిత్రీకరించే ధోరణులను ఎఫ్పుడు ఆపుతారు? అది మిలియన్ డాలర్ ప్రశ్న.

చంద్రబాబునాయుడు జగన్ మీద విమర్శల విషయంలో ఎంతగా శృతిమించుతున్నారంటే.. జగన్మోహన్ రెడ్డిని అసహ్యించుకునే వారికి కూడా.. ఆయన వరుస విమర్శలు చూసి వెగటు పుడుతోంది. ఈ దౌర్భాగ్యం ఎక్కడి వరకు వెళ్లిందంటే.. ట్రూఅప్ చార్జీల రూపంలో విద్యుత్తు చార్జీలను చంద్రబాబు ప్రభుత్వం పెంచింది. సూటిగా చెప్పాలంటే.. ‘రాబోయే అయిదేళ్లలో విద్యుత్తు చార్జీలు పెంచం.. వీలైతే తగ్గిస్తాం’ అని ఆయన ఎన్నికల మేనిఫెస్టో హామీకి ఈ పెంపు విరుద్ధం. అయినా పెంచారు.. అదేమని అడిగితే ‘జగన్మోహన్ రెడ్డి ప్రభుత్వం అయిదేళ్లలో చెడగొట్టిపోయిన వ్యవహారాల తాలూకు ఫలితం ఇది’ అని బుకాయిస్తున్నారు! ఎంత చోద్యం? జగన్ అమసర్థుడని అందుకే ఇవి వచ్చాయని నిందిస్తున్నారు.

ప్రజలు నమ్మినా సరే.. బురద ఆగదు!

నోరు తెరిస్తే నిత్య బురద ప్రవాహం వెల్లువలా రాజకీయ ప్రత్యర్థుల మీదికి వెళుతూ ఉండాల్సిందే. చంద్రబాబునాయుడు చెబుతున్న మాటలన్నీ నిజమే అనుకుందాం. జగన్ అసమర్థుడనే అనుకుందాం. ఎన్నికల ప్రచార సమయంలో అదే విషయాన్ని చంద్రబాబు కొద్దిగా మార్పు చేర్పులతో కొన్ని వేల లక్షలసార్లు చెప్పి ఉంటారు కదా. ఆ విషయం ప్రజలు కూడా నమ్మారు. ప్రజలు నమ్మారు గనుకనే.. జగన్ ను అధికారానికి దూరం పెట్టారు. చంద్రబాబు మహానుభావుడని, ఆయనను మించిన సమర్థుడు లేనే లేడని ప్రజలు అనుకున్నారు గనుకనే.. ఆయన చేతిలో అనన్యమైన మెజారిటీతో అధికారం పెట్టారు. అంతా ఇలాగే జరిగింది అని అనుకుందాం.

మరి చంద్రబాబునాయుడుకు తన సమర్థతను నిరూపించుకోవడానికి ఇది చక్కటి అవకాశం కదా! నిరూపించుకోవాలి కదా! జగన్ చేసిన తప్పులను దిద్దినప్పుడే కదా ఆయన సమర్థత బయటపడేది. జగన్ విద్యుత్తు విధానంలో లోపాలున్నాయని చెప్పి వాటిని చక్కదిద్దకుండా.. వాటివల్ల ఇప్పుడు ప్రజల మీద భారం పెంచితే ఎలాగ? జగన్ తప్పులను దిద్దలేకపోతే.. చంద్రబాబునాయుడు సమర్థుడని ప్రజలు ఎందుకు అనుకోవాలి? ఆ లాజిక్ ను చంద్రబాబు పట్టించుకోలేదు. ఎవ్వరూ ప్రశ్నించడం లేదు.

జగన్ ఇసుక విక్రయాల్లో తెచ్చిన విధానం తప్పు అని చంద్రబాబు అన్నారు.. ఓకే! అందులో అంతా జగనే దోచుకుంటున్నాడని చెప్పారు.. ఓకే! లిక్కర్ విధానం లోపభూయిష్టం అన్నారు.. సరే! అంతా జగన్ స్వాహా చేయడమే జరుగుతోందన్నారు.. మంచిదే! ఆ రెండు విధానాలు తప్పు అని చెప్పినప్పుడు.. వాటిని సరిదిద్దుతున్నాం అనే బిల్డప్ తో కొత్త ఇసుక విధానం, కొత్త లిక్కర్ విధానం తీసుకువచ్చారు. తాను తెచ్చిన విధానాలు మహాద్భుతాలు అన్నారు. అది కూడా మంచిదే. మరి అదే రీతిగా విద్యుత్తు చార్జీల విషయంలో జగన్ చేశారని చెబుతున్న పాపాలను సరిదిద్ది.. ప్రజల మీద వేసిన ట్రూప్ చార్జీల భారాన్ని ఎందుకు తప్పించలేకపోయారు? ఇది ప్రజలకు కలుగుతున్న సందేహం.

ఆగేదెప్పుడు?

అయిదు నెలలు గడచిపోయాయి. చంద్రబాబునాయుడు ఇప్పటికీ ప్రతి విషయంలోనూ జగన్ పాలనలోని వైఫల్యాల కారణంగా ఈ దుస్థితి వచ్చిందని చెప్పుకుంటూ తిరగడం గమనిస్తే.. రాబోయే అయిదేళ్ల పాటు కూడా జగన్ పారాయణమే నడుస్తుంటుందేమో అనిపిస్తోంది. ప్రజలు జగన్ ను మరచిపోయినా.. చంద్రబాబు ఊరుకునేలా లేరు. ప్రతిరోజూ జగన్ నిందిస్తూ తనవంతు కృషి చేసేలా ఉన్నారు.

రాజకీయ నిందలు నిజం అయి ఉండాల్సిన అవసరం లేదు. ముందే చెప్పుకున్నట్టు ప్రత్యర్థిని బద్నాం చేయడం ఒక్కటే లక్ష్యం. ఆరోపణల్ని, నిందల్ని, లోపాలను ఫ్యాబ్రికేట్ చేసి ప్రచారంలో పెట్టేయడమే! రాజకీయ వ్యూహమే అంత! కానీ, దానికి కూడా ఒక అంతూ దరీ ఉండాలి కద! ఎక్కడో ఒక చోట నిందలు మాని, పరిపాలన మీదకు దృష్టి మళ్లించాలి కదా. చంద్రబాబు ఆ పని ఇప్పట్లో చేసేలా లేరు. లేదా, పరిపాలన ఎంత బాగా చేసినా సరే.. జగన్ ను నిందించడం మానేస్తే.. మనకు మనుగడ ఉండదని ఆయన భయపడుతున్నారేమో అనిపిస్తోంది. పరనింద ఒక్కటే పరమార్థం అన్నట్టుగా ఆయన వ్యవహార సరళి సాగుతోంది. ప్రజల్లో ఈ వైఖరి చులకన కాకముందే ఆయన ఫుల్ స్టాప్ పెడితే.. ఆయన పెద్దరికానికి, ఔన్నత్యానికి గౌరవంగా ఉంటుంది.

..ఎల్. విజయలక్ష్మి