Epaper
పేరు : అక్కినేని నాగార్జున
దరఖాస్తు చేయు ఉద్యోగం: తెలుగు అమితాబ్‌ (బుల్లి తెర వరకూ) ‘కౌన్‌ బనేగా కరోడ్‌ పతి’ కి రీమేక్‌ లాంటి టీవీ షో ‘మీలో కోటీశ్వరుడెవరు?’ చేస్తున్నాను కదా! యాంకరింగ్‌ చేస్తున్నాను కదా` అని అమితాబ్‌ లాగా ‘యాంకర్‌’ గెడ్డం పెంచుకోలేదు లెండి.
ముద్దు పేర్లు : ‘అక్కి’తాబ్‌ , అమి ‘నాగ్‌’.( ఈ షో చేయ చేయగా అందరూ నన్నిలా పిలుస్తారేమో అని అనుమానం గా వుంది కూడా)
‘విద్యార్హతలు : బి.ఎ (లిట్‌). కంగారు పడకండి. లిట్‌ ` అంటే ‘లిటరేచర్‌’ కాదు, ‘లిటిగేషన్‌’ . లేకపోతే ఎన్‌`కన్వెన్షన్‌ హాలు ను నోటీసు ఇవ్వకుండా కూలగొట్టేద్దామనుకుంటారా? అందుకే కోర్టుకు వెళ్ళాను. అఫ్‌ కోర్స్‌. నాకు కోర్టుక వెళ్ళేటంత టైమ్‌ గవర్నమెంట్‌ ఇచ్చింది అనుకోండి. మిగిలిన వారికి తెలంగాణ సర్కారు ఇచ్చిందో లేదో తెలీదు.
హోదాలు : తెలుగు నాట ‘కింగ్‌’ అని ఎవరిని పిలుస్తారు? జవాబులు: ఎ) కిరీటం వున్న వ్యక్తిని బి) సింహాసనం వున్న వ్యక్తిని సి) రాజ్యం వున్న వ్యక్తిని డి) హైదరాబాద్‌లో భూమి వున్న వ్యక్తిని. ‘డీ’ కరెక్టా? కంప్యూటర్‌ గారూ లాక్‌ చెయ్యండి. ఎస్‌ సరయిన జవాబు చెప్పారు. అయితే ఈ జవాబుల్తో సంబంధంలేకుండా కూడా నన్ను ‘కింగ్‌’ అని పిలుస్తారు. అది వేరే విషయం.
గుర్తింపు చిహ్నాలు :ఒకటి: అందరూ సినిమాల్లోంచి రాజకీయాల్లోకి రావాలను కుంటారు. నేను వ్యాపారంలోకి రావాలనుకుంటాను. వచ్చాను.
రెండు: నాన్న భక్తుడు కాడు, అయినా భక్తి చిత్రాల్లో వేశారు. నేను నాన్న భక్తుణ్ణి. కాబట్టి ఆ వేషాలు కొనసాగించాను.
సిధ్ధాంతం : నాన్న గారిదీ నాదీ ఒక్కటే సిధ్ధాంతం: కుటుంబమే సమాజం (‘మనమే’ జనం)
వృత్తి : చెరువుల్ని పూడ్చటం, భూముల్ని ఆక్రమించటం నా వృత్తీ కాదు, నా ‘కన్వెన్షనూ’ కాదు.
హాబీలు :1. ఎయిడ్స్‌ నివారణ, లోక్‌ సత్తా కు ఊతం ఇలాంటి ప్రకటనల్లో ఉచితంగా నటించటం.
2. అప్పుడప్పుడూ అమల హాబీలను ‘జంతువులను పెంచటం, రెడ్‌ క్రాస్‌ సేవ’ ఇలాంటివి కూడా నా హాబీలుగా స్వీకరిస్తాను.
అనుభవం : అందరికీ అన్నీ నప్పవు. నాన్న చేతికి ‘గ్లాసు’ (దేవదాసు), నా చేతికి ‘ సైకిల్‌ చైను’
మిత్రులు : ఉండరు. ఉంటే భక్తులు వుంటారు. అభిమానులు వుంటారు. ( నాన్న గారి తర్వాత నేను కూడా దేవుడి పాత్రలు వేశాను కదా!)
శత్రువులు : నాకు సినిమాల్లో విలన్లు వుంటారు కానీ, జీవితంలో వుండరు. వారిని అలా మార్చేసుకుంటాను.
మిత్రశత్రువులు: నా ప్రయివేటు జీవితంలోకి వచ్చే పబ్లిక్‌ వ్యక్తులు.
వేదాంతం :‘కోటు’ వున్నవాడెల్లా కోటీశ్వరుడు కాడు. లేకుంటే ‘యాంకర్‌’ లంతా కోటీశ్వరులయి పోయేవారు.
జీవిత ధ్యేయం : ‘కూటి’కి లేని వారిని ‘కోటీశ్వరుల్ని’ చెయ్యటం. కాకుంటే వారు లక్షల ఖర్చు పెట్టి జనరల్‌ నాలెడ్జ్‌ కోచింగ్‌ తీసుకోవాలి, వేలు ఖర్చు పెట్టి జనరల్‌ నాలెడ్జ్‌ పుస్తకాలు కొనుక్కోవాలి. అంతేనా ‘కంప్యూటర్‌ గారూ’?
-సర్‌