త‌ప్పుడు ప్ర‌చారాల‌ను న‌మ్మొద్దంటున్న బాబు!

మ‌న్యం ప్రాంతంలో గిరిజ‌నులు రోడ్డెక్క‌డం ముఖ్య‌మంత్రి చంద్ర‌బాబును ఆందోళ‌న‌కు గురి చేసింది. మొన్న‌టి ఎన్నిక‌ల్లో ఆంధ్ర‌ప్ర‌దేశ్ అంతా సునామీలా వైసీపీకి వ్య‌తిరేకంగా ప్ర‌జాభిప్రాయం వెల్లువెత్తింది. అయితే గిరిజ‌న ప్రాంతాల్లో మాత్రం వైసీపీ ఎంతోకొంత ప‌ట్టు నిలుపుకుంది. ఈ నేప‌థ్యంలో అట‌వీ ప్రాంతాల్లో నివ‌సించే గిరిజ‌న ప్ర‌జానీకంలో మరింత వ్య‌తిరేక‌త‌కు దారి తీస్తోంద‌ని ముఖ్య‌మంత్రి చంద్ర‌బాబు అప్ర‌మ‌త్తం అయ్యారు.

ప్ర‌భుత్వంలో కీల‌క‌మైన నాయ‌కుడు గిరిజ‌నుల హ‌క్కుల‌కు భంగం క‌లిగేలా 1/70 చట్టాన్ని స‌వ‌రించాల‌నే అభిప్రాయాన్ని వ్య‌క్తం చేశారు. దీంతో గిరిజ‌నుల్లో ముఖ్యంగా టీడీపీకి వ్య‌తిరేక‌త వ‌స్తోంద‌ని గ్ర‌హించిన చంద్ర‌బాబు ఎక్స్ వేదిక‌గా వాళ్ల‌కు భ‌రోసా క‌ల్పించే ప్ర‌య‌త్నం చేశారు. ఈ మేర‌కు ఆయ‌న ఓ పోస్టు పెట్టారు. అందులో ఏముందంటే…

“గిరిజన జాతుల అస్తిత్వాన్ని కాపాడుకోవడం అంటే భారతీయ సంస్కృతిని కాపాడుకోవడమే అని బలంగా నమ్ముతున్నాం. అందుకే వారి విద్య, వైద్యం, జీవన ప్రమాణాలను మెరుగుపరచడానికి మేం నిరంతరం పనిచేస్తున్నాం. అరకు కాఫీతో సహా ఇతర గిరిజన ఉత్పత్తులకు అంతర్జాతీయ గుర్తింపు తీసుకురావడానికి కృషి చేస్తున్నాం. గిరిజన ప్రాంతాల్లోని ఆస్తులపై గిరిజనులకే హక్కు ఉండాలన్న ఆలోచనతో వచ్చిన 1/70 చట్టాన్ని మార్చే ఉద్దేశం మాకు ఏమాత్రం లేదు. తప్పుడు ప్రచారాలను నమ్మవద్దు. అనవసరమైన అపోహలతో ఆందోళన చెందవద్దని గిరిజన సోదరులను కోరుతున్నా. సమాజంలో అట్టడుగున ఉన్న మీ అభివృద్ధికి సదా కట్టుబడి ఉన్నాం” అని చంద్ర‌బాబు స్ప‌ష్టం చేశారు.

గిరిజ‌నులు అమాయ‌కులు. 1/70 చట్టాన్ని వాళ్ల ఆస్తుల్ని కాపాడ్డానికి తీసుకొచ్చింది. ఆస్తి అంటే గౌర‌వంగా భావిస్తారు. అలాంటి దానికి భంగం వాటిల్లుతుంద‌ని భ‌య‌మే. అయితే చంద్ర‌బాబు వెంట‌నే అప్ర‌మ‌త్త‌మై, వాళ్ల‌లోని భ‌యాన్ని పోగొట్టేందుకు ప్ర‌య‌త్నించారు. కానీ ఇప్ప‌టికే గిరిజ‌నులు ఆందోళ‌న‌తో ఆందోళ‌న కార్య‌క్ర‌మాల‌కు శ్రీ‌కారం చుట్ట‌డం గ‌మ‌నార్హం.