హవ్వ! చంద్రబాబు ఎందుకిలా అయిపోయారు?

అమలు రూపంలోకి వచ్చేసరికి అన్నీ అనుకున్నట్టుగా జరుగుతూ వచ్చాయా లేదా చెప్పలేం గానీ.. నారా చంద్రబాబునాయుడును పెద్ద కలలు కనే దార్శనికుడైన నాయకుడిగా ఒప్పుకుని తీరాలి. ఆయన ఆలోచనలు, ప్రకటించే స్వప్నాలు ఎప్పుడూ చాలా పెద్దవిగా ఉంటాయి. ఆయన దార్శనికతను, ప్రాక్టికల్ పరిపాలనా ధోరణికి కూడా మేధావుల్లో ఒక గుర్తింపు ఉంది. అలాంటి చంద్రబాబునాయుడు ఇప్పుడు పూర్తిగా మారిపోయినట్టు కనిపిస్తున్నారు.

గద్దె ఎక్కిన సందర్భంలో ఆయన తనకు తానుగా.. ‘ఇప్పుడు నేను మారిపోయిన చంద్రబాబును’ అని ప్రకటించుకున్న వైనం మనకు తెలుసు. మార్పు మంచిదే గానీ.. ఆయన సామాజిక వ్యవస్థను మరింత దిగజార్చేలా ఇంత దారుణంగా మారిపోయారా? అనే అనుమానం ఇప్పుడు కలుగుతోంది.

ఒకప్పట్లో ఉచిత విద్యుత్తు ఇవ్వాలనే ఆలోచననే వ్యతిరేకించిన నాయకుడు చంద్రబాబు. ఇలాంటి ఉచిత పథకాలు ఇస్తూ పోతే.. వ్యవస్థ దెబ్బతింటుందని.. వ్యవస్థను కాపాడడం చాలా కష్టం అవుతుందనే ఆచరణాత్మక దృక్పథం ఆయనలో ఉండేది. తర్వాత ఉచిత పథకాలు, జనాకర్షక తాయిలాల పథకాలకు కొద్దిగా మొగ్గుతూ వచ్చారు. నిజం చెప్పాలంటే.. అలాంటి వాటిలో కొన్ని అవసరం అని కూడా అనిపిస్తుంది.

కానీ తాజాగా ఆయన మాటలను గమనిస్తే.. చంద్రబాబునాయుడు చాలా మారిపోయారు.. సామాజిక వ్యవస్థను దిగజార్చేంతగా ఆయన మారిపోయారు అనే భయం కలుగుతోంది.

పింఛన్ల పంపిణీని ఒకటో తేదీకి ఒకరోజు ముందే చేపట్టడానికి ఆయన నరసరావుపేట పరిధిలోని యల్లమంద గ్రామంలో పర్యటించారు. ఈ సందర్భంగా కార్యక్రమంలో ఆరునెలల్లో తాము చేసిన పనులన్నిటినీ ఏకరవు పెట్టారు. అన్న క్యాంటీన్లను పునరుద్ధరించిన సంగతిని కూడా చెప్పుకున్నారు. అదే సమయంలో రాబోయే కాలంలో పేదలకు ఉచితంగా అన్నం పెట్టడానికి ప్రయత్నం చేస్తాం అని కూడా చంద్రబాబునాయుడు ప్రకటించారు.

ఈ హామీలోని మతలబు ఏమిటో అర్థం కావడం లేదు. పేదలకు ఉచితంగా అన్నం పెట్టడం అంటే ఏమిటి? ‘పేదలు’ అనే ట్యాగ్ లైన్ ఉన్న వారందరికీ, ఏ పనీచేయాల్సిన అవసరం లేకుండా, కష్టపడాల్సిన అవసరం లేకుండా.. మూడుపూటలా ప్రభుత్వం ఇంటికి కేరేజీలు పంపడమో లేదా ఊళ్లలో అన్నదాన సత్రాలు నిర్వహించడమో చేస్తూ ఉంటుందా?

ఉచితంగా సర్కారు పెట్టే అన్నం తినేసి మిగిలిన సమయంలో ప్రజలు ఏం చేస్తూ గడపాలి.. టీవీలో సీరియల్స్ చూసుకుంటూ గడపాలా? ఇంటింటికీ టీవీ పథకమూ, ఉచితంగా ఫైబర్ నెట్ కనెక్షనూ కూడా ఇచ్చే పథకాలు తెస్తే.. పాపం.. వారికి ఖాళీ సమయం బోరు కొట్టకుండా చంద్రబాబు మేలు చేసిన వారవుతారు.. అనే సెటైర్లు పేలుతున్నాయి.

‘చేపను వండిపెట్టడం కాదు.. చేపను పట్టడం ఎలాగో నేర్పు’ అని పెద్దలు అంటారు. అలాంటి వ్యక్తిత్వ వికాస సిద్ధాంతాలు బోలెడు చదువుకున్న చంద్రబాబు.. పేదల్ని మాత్రం వారికి అన్నం పెట్టేసి వారిని ఎందుకూ పనికిరానివారుగా తయారుచేయాలనుకుంటున్నారా? అనేది అర్థం కావడం లేదు. ఈ ఉచిత అన్నం పెట్టే పథకం గురించి మరిన్ని వివరాలు తెలిస్తే తప్ప.. ఆయన ఆలోచన మనకు అర్థం కాదు.