లౌక్యం తెలియ‌ని జీవీరెడ్డి

ఫైబ‌ర్‌నెట్ చైర్మ‌న్ జీవీరెడ్డి ఇంకా తాను ప్ర‌తిప‌క్షంలో ఉన్న‌ట్టే మాట్లాడుతున్నారు. లౌక్యం తెలియ‌క‌, మీడియా ముందుకొచ్చి ప్ర‌భుత్వ ఉద్యోగుల‌పై విమ‌ర్శ‌లు గుప్పిస్తూ, చివ‌రికి తానే సీఎం చంద్ర‌బాబుతో మంద‌లించుకోవాల్సిన ప‌రిస్థితి. వ్య‌క్తిగ‌తంగా జీవీరెడ్డి స్నేహ‌శీలి, తెలివైన వాడు. అంచెలంచెలుగా రాజ‌కీయంగా ఎదుగుతున్నారు. రాజ‌కీయాల్లో నోటిని ఎంత అదుపులో పెట్టుకుంటే అంత మంచిది.

బ‌హుశా టీడీపీ ప్ర‌తిప‌క్షంలో ఉండ‌గా త‌న నోరే కొండ ఆస్తిగా ఉప‌యోగ‌ప‌డిందనే భావ‌న‌తో, ఇప్పుడు కూడా దాన్నే న‌మ్ముకున్న‌ట్టున్నారు. ప్ర‌భుత్వ అనుకూల మీడియా రాత‌ల ప్ర‌కారం… మీడియా స‌మావేశంలో ఐఏఎస్‌, ఇత‌ర అధికారులపై తీవ్ర అభ్యంత‌ర‌క‌ర కామెంట్స్ చేశార‌నే కార‌ణంతో జీవీరెడ్డిని చంద్ర‌బాబు మంద‌లించారు.

“నేను ఎంతో క‌ష్ట‌ప‌డి వ్య‌వ‌స్థ‌ను నిర్మించాను. ఐఏఎస్ అధికారుల‌పై ఇలా బ‌హిరంగంగా మాట్లాడితే మిగిలిన వాళ్లు అదే మార్గాన్ని అనుస‌రిస్తే ప‌రిస్థితి ఏంటి? అధికారుల‌కు నేను సమాధానం చెప్పుకోవాలి. మ‌రోసారి ఇలాంటి ప‌రిస్థితి రాకుండా జాగ్ర‌త్త తీసుకోవాలి” అని జీవీరెడ్డికి చంద్ర‌బాబు హిత‌బోధ చేశార‌ట‌!

జీవీరెడ్డి అర్థం చేసుకోవాల్సింది ఏంటంటే… చంద్ర‌బాబు ఎంతో క‌ష్ట‌ప‌డి నిర్మించిన వ్య‌వ‌స్థ‌లోని అధికారుల తీరు అర్థం చేసుకుని మెలగాలి. అయ్యా జీవీ…మీరు తిడ్తున్న‌ది ఐఏఎస్ దినేశ్‌కుమార్‌ను కాదు, న‌న్ను స్వామి అని ప‌రోక్షంగా చెప్ప‌క‌నే చెప్పారు. ఇంకోసారి ఇలా మాట్లాడొద్ద‌ని జీవీకి సున్నితంగా చంద్ర‌బాబు సూచ‌న చేశార‌నే కంటే, హెచ్చ‌రించార‌న‌డం స‌రైంది. ఎందుకంటే, గ‌తంలో చంద్ర‌బాబు పీఎస్‌ను పేరు పెట్టి మ‌రీ ఏకిపారేసిన ఘ‌న‌త జీవీరెడ్డిది. అయిన‌ప్ప‌టికీ ఎందుకో జీవీరెడ్డి టీడీపీకి నిజాయితీగా చేసిన సేవ‌ల్ని ప‌రిగ‌ణ‌లోకి తీసుకుని ఫైబ‌ర్‌నెట్ చైర్మ‌న్ ప‌ద‌వి ఇచ్చారు.

మీకున్న తెలివితేట‌ల్ని అభివృద్ధికి ఉప‌యోగించాల‌నే చంద్ర‌బాబు చూచ‌న‌ల్ని జీవీరెడ్డి అర్థం చేసుకునే దాన్నిబ‌ట్టి, అత‌ని రాజ‌కీయ భ‌విష్య‌త్ ఆధార‌ప‌డి వుంటుంది. రాజ‌కీయాల్లో హ‌త్య‌లుండ‌వ్‌, ఆత్మ‌హ‌త్యలే వుంటాయ‌ని అనుభ‌వ‌జ్ఞులు ఊరికే చెప్ప‌లేదు. గాయం సినిమాలో సిరివెన్నెల సీతారామ‌శాస్త్రి అద్భుత‌మైన పాట రాశారు. కృష్ణుడి గీతోప‌దేశం కురుక్షేత్ర యుద్ధాన్ని ఆపిందా? అని ఆ పాట‌లో ప్ర‌శ్నించారు.

ఏదో ఉద్ధరించాల‌ని అనుకుంటున్న జీవీరెడ్డి తెలుసుకోవాల్సిన స‌త్యం ఇదే. విద్యార్థి ద‌శ‌లో పాఠాలు చ‌దువుకుని పరీక్ష‌లు రాస్తుంటాం. కానీ జీవితంలో అలా కాదు. ప‌రీక్ష‌లు ఎదుర్కొని ఎప్ప‌టిక‌ప్పుడు గుణ‌పాఠాలు నేర్పుకుంటుంటాం. ఈ వాస్త‌వాన్ని జీవీరెడ్డి తెలుసుకుంటే మంచిది. కావున లౌక్యంగా మెలిగితే త‌ప్ప‌, రాణించ‌లేన‌ని గ్ర‌హించ‌డం అత‌ని చేతిలోనే వుంది.