ఆత్మీయంగా ప‌ల‌క‌రిస్తూ… అర్జీలు స్వీక‌రిస్తూ!

అధికారంలోకి వ‌చ్చిన మొద‌లు ప్ర‌జాస‌మ‌స్య‌ల ప‌రిష్కారం కోసం విద్య‌, ఐటీశాఖల‌ మంత్రి నారా లోకేశ్ ప్ర‌జాద‌ర్బార్ నిర్వ‌హిస్తున్నారు. ఇవాళ ఉండ‌వ‌ల్లిలోని త‌న నివాసంలో 61వ రోజు ప్ర‌జాద‌ర్బార్ లోకేశ్ నిర్వ‌హించారు. ప్ర‌జాద‌ర్బార్‌పై ముందే ప్ర‌చారం చేయ‌డంతో వివిధ స‌మ‌స్య‌ల‌తో జ‌నం పోటెత్తారు.

వివిధ ప్రాంతాల నుంచి ప్ర‌జాద‌ర్బార్‌కు వెళ్లిన ప్ర‌తి ఒక్క‌ర్నీ లోకేశ్ ఆత్మీయంగా ప‌ల‌క‌రిస్తూ, వారి నుంచి అర్జీలు స్వీక‌రించారు. ముఖ్యంగా పెన్ష‌న్‌, భూ సంబంధిత స‌మ‌స్య‌లు, ఉద్యోగ‌, ఉపాధి, వైద్య‌ప‌ర‌మైన సాయం కోసం లోకేశ్‌కు భారీగా విన్న‌వించారు. ప్ర‌తి ఒక్క‌రి స‌మ‌స్య స్వ‌యంగా తెలుసుకుని, త్వ‌ర‌గా ప‌రిష్క‌రిస్తామ‌ని వారికి లోకేశ్ హామీ ఇచ్చారు.

శ్రీకాకుళం జిల్లా ఎచ్చెర్లలోని అంబేద్కర్ యూనివర్సిటీలో పనిచేస్తుండగా తన భర్త విద్యుత్ షాక్ కు గురై 2020లో మరణించాడని, కారుణ్య నియామకం కింద తనకు ఉద్యోగ అవకాశం కల్పించి ఆదుకోవాలని చిలకపాలెం గ్రామానికి చెందిన డి.రేవతి మంత్రి నారా లోకేశ్‌కు విన్నవించారు. కుటుంబ పోషణ భారమైంద‌ని, తన ఇద్దరు పిల్లల చదువుల కోసం ఏదైనా అవుట్ సోర్సింగ్ ఉద్యోగం కల్పించాలని ఆమె విజ్ఞప్తి చేశారు.

రాష్ట్రంలో గ్రంథాలయాల అభివృద్ధికి చర్యలు తీసుకోవడంతో పాటు సమస్యలు పరిష్కరించాలని ఆంధ్రప్రదేశ్ రాష్ట్ర గ్రంథాలయ పునర్వికాస ఉద్యమ వేదిక ప్రతినిధులు మంత్రికి విజ్ఞప్తి చేశారు. గ్రంథాలయాలు నిరాదరణకు గురయ్యాయని, పుస్తకాల కొనుగోళ్లు నిలిచిపోయాయని, నిర్వహణ సక్రమంగా లేదని, విద్యాసంస్థల్లోనూ గ్రంథాలయాల నిర్వహణ నామమాత్రంగా ఉందని లోకేశ్‌ దృష్టికి తీసుకెళ్లారు.

ఏలూరు జిల్లా పోలవరం నియోజకవర్గం, కొయ్యలగూడెం పట్టణంలో ప్రభుత్వ డిగ్రీ కళాశాల ఏర్పాటుకు పరిపాలనా అనుమతులు మంజూరు చేయాలని సమైక్య యూత్ ప్రతినిధులు మంత్రిని కలిసి విజ్ఞప్తి చేశారు. మూడు దశాబ్దాల నుంచి కొయ్యలగూడెంలో డిగ్రీ కాలేజీ లేక పేద, ఎస్సీ, ఎస్టీ, బీసీ విద్యార్థులు అనేక అవస్థలు పడుతున్నారని మంత్రికి వివ‌రించారు.

పుట్టుకతో దివ్యాంగుడైన తన కుమారుడికి దివ్యాంగ పెన్షన్ మంజూరు చేసి ఆదుకోవాలని విజయవాడ పోరంకికి చెందిన ఐ.వరప్రసాద్ మంత్రికి విన్న‌వించారు. పరిశీలించి తగిన చర్యలు తీసుకుంటామని మంత్రి భరోసా ఇచ్చారు.

గత వైసీపీ ప్రభుత్వ హయాంలో ఎన్టీఆర్ జిల్లా, జి.కొండూరు మండలం, కవులూరులో తమకు నివేశన స్థలాన్ని మంజూరు చేసి ఇంటి పట్టా కూడా ఇచ్చారని, ఈ రోజు వరకు సదరు స్థలాన్ని చూపించలేదని విజయవాడ జక్కంపూడికి చెందిన అన్నమరాజు ముత్యాలు ఆవేదన వ్యక్తం చేశారు. కూలి పనులు చేసుకుంటూ జీవనం సాగిస్తున్నామని, తమకు మంజూరు చేసిన స్థలం జాడచూపించి, ఇంటి నిర్మాణం కోసం ఆర్థిక సాయం అందించాలని విజ్ఞప్తి చేశారు.

2017-18 అసిస్టెంట్ ప్రొఫెసర్ పరీక్షల్లో ఉత్తీర్ణత సాధించిన అభ్యర్థులకు న్యాయం చేయాలని ఆంధ్రప్రదేశ్ అసిస్టెంట్ ప్రొఫెసర్ క్వాలిఫైడ్ అసోసియేషన్ ప్రతినిధులు మంత్రిని కలిసి విజ్ఞప్తి చేశారు. రాష్ట్రంలోని న‌లుమూల‌ల నుంచి వివిధ స‌మ‌స్య‌ల‌తో వ‌చ్చిన ప్ర‌జానీకం లోకేశ్‌ను క‌లిసి త‌మ గోడు వెల్ల‌బోసుకోవ‌డం గ‌మ‌నార్హం.