బాబు అదృష్ట‌వంతుడు

ముఖ్య‌మంత్రి చంద్ర‌బాబునాయుడు అదృష్ట‌వంతుడు. తిరుమ‌ల ల‌డ్డూ ప్ర‌సాదం వ్య‌వ‌హారంలో సుప్రీంకోర్టు ఘాటు వ్యాఖ్య‌ల నేప‌థ్యంలో టీడీపీ నాయ‌కుల‌కు ఏం మాట్లాడాలో తెలియ‌లేదు. అందుకే వాళ్లంతా మౌనాన్ని ఆశ్ర‌యించారు. కానీ క‌ష్ట కాలంలో అండ‌గా తానున్నా అంటూ ఏపీ బీజేపీ అధ్య‌క్షురాలు ద‌గ్గుబాటి పురందేశ్వ‌రి ముందుకు రావ‌డం చ‌ర్చ‌నీయాంశ‌మైంది. పురందేశ్వ‌రి వైఖ‌రిపై బీజేపీలో మ‌రోసారి తీవ్ర అసంతృప్తి క‌నిపిస్తోంది.

‘మీరు ఎందుకు అలా మాట్లాడారు అని కోర్టులకు అడిగే హక్కు ఉంటుందా అనేది అందరూ ఆలోచన చేయాలి’ అని పురందేశ్వ‌రి సుప్రీంకోర్టు కామెంట్స్‌పై స్పందించారు. సుప్రీంకోర్టు చంద్ర‌బాబును ఏ సంద‌ర్భంలో ప్ర‌శ్నించిందో తెలిసి కూడా పురందేశ్వ‌రి అనవ‌స‌రంగా స్పందించార‌ని బీజేపీ నేత‌లు అంటున్నారు. ఏపీలో శాశ్వ‌తంగా బీజేపీని నాశ‌నం చేయ‌డానికే పురందేశ్వ‌రి ప‌ట్టుద‌ల‌తో వ్య‌వ‌హ‌రిస్తున్న‌ట్టు క‌నిపిస్తోంద‌ని ఆ పార్టీ నాయ‌కులు వాపోతున్నారు.

సుప్రీంకోర్టు కామెంట్స్‌పై టీడీపీ నాయ‌కులు స్పందించ‌లేద‌ని, అలాంట‌ప్పుడు పురందేశ్వ‌రి ఎలా మాట్లాడ్తార‌ని బీజేపీ నాయ‌కులు అంత‌ర్గ‌తంగా చ‌ర్చించుకుంటున్నారు. అయితే పురందేశ్వ‌రిని చంద్ర‌బాబు పెద్ద‌గా ప‌ట్టించుకోర‌ని, కానీ ఆయ‌న కోసం ఆమె మాత్రం దూకుడుగా మాట్లాడ్డం ఆశ్చ‌ర్యం క‌లిగిస్తోంద‌నే చ‌ర్చ టీడీపీలో జ‌రుగుతోంది. ఎంతైనా బాబు అదృష్ట‌వంతుడ‌ని టీడీపీ నాయ‌కులు అంటున్నారు.

సొంత పార్టీ వాళ్ల‌కు కూడా దిక్కుతోచ‌ని స్థితిలో ధైర్యం చేసి పురందేశ్వ‌రి సుప్రీంకోర్టు త‌మ సీఎం చంద్ర‌బాబుపై చేసిన కామెంట్స్‌ను త‌ప్పు ప‌ట్టార‌ని టీడీపీ నాయ‌కులు సంతోషం వ్య‌క్తం చేస్తున్నారు. బీజేపీలో చంద్ర‌బాబును అభిమానించే నాయ‌కుల సంఖ్య రోజురోజుకూ పెరుగుతోంద‌ని వారు చెబుతున్నారు.