టీడీపీ ఎమ్మెల్సీ అనుచ‌రుడిని చిత‌క్కొట్టిన బీటెక్ వ‌ర్గీయులు!

మాజీ ఎమ్మెల్సీ, పులివెందుల టీడీపీ ఇన్‌చార్జ్ బీటెక్ ర‌వి, అత‌ని అరాచ‌కాలు రోజురోజుకూ పెరిగిపోతున్నాయి. చివ‌రికి సొంత పార్టీ, అలాగే కూట‌మి భాగ‌స్వామ్య ప‌క్ష‌మైన జ‌న‌సేన నేత‌లు, కార్య‌క‌ర్త‌ల‌పై దాడికి తెగ‌బ‌డే దుస్థితిని బీటెక్ ర‌వి తీసుకొచ్చార‌నే చ‌ర్చ జ‌రుగుతోంది. ఇసుక రీచ్ టెండ‌ర్ విష‌య‌మై క‌డ‌ప క‌లెక్ట‌రేట్‌లో జ‌న‌సేన నాయ‌కుల‌పై బీటెక్ ర‌వి వ‌ర్గీయుల దాడిని మ‌రిచిపోక‌నే, పులివెందుల‌లో ఇవాళ సొంత పార్టీ కార్య‌క‌ర్త‌ను కిడ్నాప్ చేసి మ‌రీ చిత‌క్కొట్ట‌డం తీవ్ర చ‌ర్చ‌నీయాంశ‌మైంది.

బీటెక్ ర‌వి వ‌ర్గీయుల దాడిని నిర‌సిస్తూ, అధికార పార్టీ ఎమ్మెల్సీ భూమిరెడ్డి రాంగోపాల్‌రెడ్డి భార్య ఉమాదేవి ధ‌ర్నాకు దిగాల్సి వ‌చ్చింది. పులివెందుల నియోజ‌క‌వ‌ర్గంలో 70కి పైగా రేష‌న్ షాపుల‌కు డీల‌ర్ల‌ను నియ‌మించేందుకు ప్ర‌భుత్వం రాత ప‌రీక్ష పెట్టాల‌ని నిర్ణ‌యించింది. ఇందులో భాగంగా వేంప‌ల్లెలోని ఒక దుకాణానికి సంబంధించి ఎమ్మెల్సీ రాంగోపాల్‌రెడ్డి అనుచ‌రుడు ప్ర‌కాశ్‌ పులివెందుల‌లోని ఒక పాఠ‌శాలలో ప‌రీక్ష రాయ‌డానికి వెళ్లాడు.

పాఠ‌శాల వ‌ద్ద కాచుక్కూచున్న బీటెక్ ర‌వి వ‌ర్గీయులు ప్ర‌కాశ్‌ను ఎత్తుకెళ్లి తీవ్రంగా కొట్టారు. దీంతో అత‌నికి గాయాల‌య్యాయి. ఈ విష‌యం తెలిసి ఎమ్మెల్సీ రాంగోపాల్‌రెడ్డి భార్య ఉమాదేవి ప‌రీక్ష కేంద్ర‌మైన పాఠ‌శాల వ‌ద్ద ధ‌ర్నాకు దిగారు. ప్ర‌కాశ్‌ను వ‌దిలి పెట్టాల‌ని ఆమె డిమాండ్ చేశారు. దీంతో పోలీసులు భారీ సంఖ్య‌లో పాఠ‌శాల వ‌ద్ద‌కు వెళ్లారు.

ప‌ట్ట‌ప‌గ‌లు సొంత పార్టీ కార్య‌క‌ర్త‌ను బీటెక్ ర‌వి వ‌ర్గీయులు ఎత్తుకెళ్లి కొట్టినా దిక్కు లేదా? అని ఆమె పోలీసుల్ని నిల‌దీశారు. దీంతో బీటెక్ ర‌వి వ‌ర్గీయుల అదుపులో ఉన్న రాంగోపాల్‌రెడ్డి అనుచ‌రుడిని విడిపించుకొచ్చారు. ఈ ఘ‌ట‌న‌తో పులివెందుల టీడీపీలో విభేదాలు బ‌య‌ట‌ప‌డ్డాయి. మ‌రోవైపు శాంతిభ‌ద్ర‌త‌లు ఎంత‌గా క్షీణించాయో అర్థం చేసుకోవ‌చ్చ‌నే చ‌ర్చ‌కు తెర‌లేచింది.