ప్రమాద సంకేతాలు

అధికారంలోకి వచ్చిన తర్వాత.. ఎన్డీయే కూటమి ప్రభుత్వం అనుసరిస్తున్న తీరును గమనించినప్పుడు.. ఇంత త్వరగా వారు ప్రతీకారం తీర్చుకునే గేర్ లోకి మారుతారని ఎవరికీ అనిపించలేదు. వైఎస్సార్ కాంగ్రెస్ పార్టీలో ఎవరెవరైతే వారి మెయిన్ టార్గెట్స్ గా ఉన్నారో.. వారి చుట్టూ ఉచ్చులు బిగుస్తున్నాయి. మాజీ ముఖ్యమంత్రి వైఎస్ జగన్మోహన్ రెడ్డితో సహా! కూటమి పాలకులకు ఉన్న అద్భుతమైన తెలివితేటలు, అనుభవసారం అన్నీ ఈ కేసుల నమోదులోనే కనిపిస్తున్నాయి. ప్రతీకారం తీర్చుకోవడానికి ఈ గేర్ లో మొదలైన ప్రయాణం.. నెక్ట్స్ లెవెల్ కు వెళుతుంది. ఇవన్నీ కూడా ఖచ్చితంగా ప్రమాద సంకేతాలే అని తెలుసుకోవాలి. రెండు రకాలుగా ప్రమాద సంకేతాలు ఇవి!

వైసీపీ నాయకుల మీద నమోదు చేసిన కేసులు, ఆపాదించిన నేరాలు అన్నీ నిజమే అయితే గనుక.. ఆ పార్టీవారికి, వారి అధినేత జగన్మోహన్ రెడ్డికి ప్రమాదం పొంచి ఉంది. ఈ కేసుల్లో కొన్ని అయినా ఫేక్ అయి, వేధించడంకోసమే బనాయించినవి అయితే గనుక.. మనం గర్వంగా చెప్పుకునే ప్రజాస్వామ్యానికే ప్రమాదం పొంచి ఉంది. ఈ పోకడల మీదనే ఈవారం గ్రేట్ ఆంధ్ర కవర్ స్టోరీ ‘ప్రమాద సంకేతాలు’!

2019 మే 30న ముఖ్యమంత్రిగా వైఎస్ జగన్మోహన్ రెడ్డి పదవీ స్వీకార ప్రమాణం చేశారు. సరిగ్గా ఎనిమిది నెలల తర్వాత.. తెలుగుదేశం పార్టీ నాయకుల్లో కీలక వ్యక్తి అయిన కింజరాపు అచ్చెన్నాయుడు అరెస్టు ఫిబ్రవరి 2వ తేదీన జరిగింది. తాము టార్గెట్ చేసిన తెలుగుదేశం నాయకుల మీద చర్యలు తీసుకోవడం అనే ప్రక్రియ మొదలుపెట్టడానికి జగన్ సర్కారు ఎనిమిది నెలలు నిరీక్షించింది అన్నమాట. ఇప్పుడు రాష్ట్రంలో అధికారంలో ఉన్న ఎన్డీయే కూటమి ప్రభుత్వానికి, జగన్మోహన్ రెడ్డి కంటె చాలా ఎక్కువ సంయమనం ఓపిక ఉన్నది- అని నిరూపించదలచుకున్నట్టుగా ఉన్నారు. అందుకే వారు దాదాపుగా పది నెలలు నిరీక్షించారు.

జూన్ 12న చంద్రబాబునాయుడు నాలుగోసారి ఆంధ్రప్రదేశ్ రాష్ట్రానికి ముఖ్యమంత్రిగా ప్రమాణ స్వీకారం చేయగా.. 2025 ఏప్రిల్ నెలలో వారి ప్రతీకార చర్యలు షురూ అయ్యాయి. అయితే జగన్మోహన్ రెడ్డికి చంద్రబాబునాయుడుకు ఈ విషయంలో హస్తిమశకాంతరం అనదగినంతటి తేడా ఉన్నది. ఎందుకంటే.. జగన్ అప్పట్లో ఒక్కొక్క నాయకుడిని అరెస్టు చేయడానికి మధ్య చాలా ఎడం పాటించారు. ఇప్పుడు అలాంటి ఓపిక చంద్రబాబునాయుడు సర్కారుకు ఉన్నట్టుగా లేదు. రాష్ట్రంలోని జైళ్లు క్రిక్కిరిసిపోయేలా.. అందరినీ ఒకేసారి జైళ్లకు పంపే ఉద్దేశంతో ఉన్నట్టుగా కనిపిస్తున్నారు.

ఒక పార్టీ అధికారంలోకి వచ్చిన తర్వాత తమ రాజకీయ ప్రత్యర్థులను టార్గెట్ చేయడం అనేది ఇవాళ్టి రోజుల్లో సర్వసాధారణమైన సంగతి అయిపోయింది. ఎవ్వరూ అందుకు మినహాయింపుగా నిలవడం లేదు. రాజకీయాలు.. కేవలం ప్రజాజీవితంలో ఉండే మాధ్యమాలుగా కాకుండా.. వ్యక్తిగత కక్షలకు పగలకు వేదికలుగా మారిపోతున్న రోజులివి. అధికారం రూపంలో వచ్చే అవకాశాన్ని వృథా చేసుకోవడానికి ఎవ్వరూ ఇష్టపడడం లేదు. అధికారం అనేది ప్రజలకు సేవ చేయడానికి దక్కిన అపురూపమైన చాన్స్ గా ఎంచడం అనేది ద్వితీయ ప్రాధాన్యం అయిపోయింది. అధికారం తమ ప్రత్యర్థులమీద కక్ష తీర్చుకోవడానికి.. తాము మాత్రమే శాశ్వతంగా ఎప్పటికీ నెగ్గుతూ ఉండేలా.. తాము సబబని భావించే పునాదులను పటిష్టం చేసుకోవడానికీ మాత్రం వాడుకుంటే చాలు అనే ధోరణే పెరుగుతూ వస్తోంది.

అయితే.. చంద్రబాబునాయుడు సారథ్యంలో ఎన్డీయే కూటమి ప్రభుత్వం ఏర్పడిన తర్వాత.. ఇటువంటి యాక్షన్ ప్లాన్ లోకి ఇంత త్వరగా దిగుతారనే ఊహ మాత్రం చాలా మందికి లేదు. కానీ వారు ఆగలేకపోతున్నారు. గత ఎన్నికలకు చాలా కాల ముందు నుంచే.. నారా లోకేష్ ‘రెడ్ బుక్’ పేరుతో తన బెదిరింపులను వినిపిస్తూ వచ్చారు. రెడ్ బుక్ అనేది.. కూటమి ప్రభుత్వానికి ఎవరెవరిని ఏయే రూపాల్లో వేధించాలో నిర్దేశించే ప్రమాణ భగవద్గీత గ్రంథంలాగా తయారైంది. ఆయన తన పాదయాత్ర రోజుల నుంచే ప్రతి ఊరిలోనూ రెడ్ బుక్ పేరెత్తుతూ బెదిరింపుల పర్వం నడిపించారు గానీ.. అందులో అధికారుల పేర్లే ఉన్నాయో.. నాయకుల పేర్లే ఉన్నాయో.. మొత్తం ఇప్పుడు మాత్రం.. కార్యచరణ చాలా చాలా ముమ్మరంగా కనిపిస్తున్నది!

‘జగన్ చాలా మంచోడు’ అనిపించేలా?

ఓ చిన్న ముచ్చటైన కథ చెప్పాలి. వెనకటికి ఓ అడవిలో ఒక గజదొంగ ఉండేవాడుట. ఆ అడవిలోని దారి గుండా వెళ్లే బాటసారులందరినీ దారికాచి దోచుకుంటూ ఉండేవాడు. చివరికి అతనికి అవసాన దశ వచ్చింది. చనిపోతూ పోతూ.. కొడుకును పిలిచి.. ‘ఒరేయ్ బాబూ.. నేను చచ్చిపోయిన తర్వాత నాకు మంచి పేరు వచ్చేలాగా ఏదైనా పనిచేయి’ అని తుదికోరిక వెల్లడించి తుదిశ్వాస విడిచాడు. తండ్రికి మంచి పేరు రావాలంటే ఏం చేయాలో ఆ కొడుకుకు స్ఫురించింది కాదు! చాలా చాలా ఆలోచించి చివరికి ఒక నిర్ణయానికి వచ్చాడు. అతడికి కూడా దారిదోపిడీలు తప్ప మరో విద్య తెలియదు. కాకపోతే.. ఆ అడవిలోని దారి వెంట వెళ్లే వారినందరినీ.. చితక్కొట్టి.. వారిదగ్గర ఉన్న సొమ్ము మొత్తం దోచుకోవడం ప్రారంభించాడు. వారి బారిన పడిన ప్రజలు మాత్రం.. ‘వీడికంటె వీడి తండ్రి చాలా మంచోడు. మనల్ని దారి కాచి దోచుకునేవాడే గానీ.. కొట్టేవాడు కాదు. వీడు దుర్మార్గుడు. దోచుకోవడంతో పాటు కొడుతున్నాడు’ అనుకుంటూ వెళ్లేవారుట! ఆ దొంగకు మాత్రం వారి మాటలు చాలా సంతోషం కలిగించేవి. ‘ఆహా నా జన్మ ధన్యం! వారందరూ మా నాన్నను మంచోడని అంటున్నారు కదా’ అని మురిసిపోయేవాడుట.

ఇప్పుడు ఎన్డీయే కూటమి ప్రభుత్వ పరిపాలన కూడా అలాగే ఉన్నది. వైఎస్ జగన్మోహన్ రెడ్డి చాలా మంచోడు అనిపించేలా వీరి పరిపాలనలో వేధింపుల పర్వం నడుస్తున్నది. జాగ్రత్తగా గమనిస్తే, ఈ విషయంలో వీరిద్దరి వ్యవహార సరళి మధ్య వ్యత్యాసం మనకు బోధపడుతుంది. కేవలం రెండు నెలలు ఆలస్యంగా వారు కత్తిదూయడం ప్రారంభించినందుకు మురిసిపోతే కుదరదు.

ఎందుకంటే.. వైఎస్ జగన్ అప్పట్లో అధికారంలోకి వచ్చిన తర్వాత.. తాను రాష్ట్ర ప్రజలకు ఇచ్చిన అనేక హామీలను ఆ పదినెలల కాలంలోనే పూర్తిచేశారు. తాను ఎంచుకున్న సంక్షేమ పరిపాలనలో ఒక స్టెప్ దాటిన తర్వాత.. ఈ రాజకీయ/ప్రతీకార ఎజెండా వైపు చూశారు. ఆ విషయంలో కూటమి ప్రభెత్వం చాలా దారుణంగా విఫలం అయింది. ఎందుకంటే అధికారంలోకి వచ్చి పది నెలలు అవుతున్నది గానీ.. ఇప్పటిదాకా సర్కారు సాధించింది మాత్రం సున్నా అనే చెప్పాలి.

చంద్రబాబునాయుడు నాలుగోసారి అధికార పీఠం మీదికి వచ్చిన తర్వాత.. ఇప్పటిదాకా ఎన్ని హామీలు అమలు చేశారు. చాలా పరిమితం. సంక్షేమ పెన్షన్లను పెంచి రూ. నాలుగువేలు వంతున ఇస్తానని చెప్పిన హామీ చాలా కీలకమైనది. ఆ హామీని మాత్రం అధికారంలోకి రాగానే.. చెప్పినట్టుగా రెండు నెలలు ముందు నుంచి కూడా అమలుచేసి బకాయిలు సహా చెల్లించారు. ప్రత్యేకించి పెన్షన్ల పంపిణీ సక్రమంగా నిర్వహించడానికి జగన్ తీసుకువచ్చిన వాలంటీర్ల వ్యవస్థ లేకుండానే.. ప్రతినెలా ఒకటోతేదీన ప్రతి ఇంటికీ పెన్షను అందేలా చూస్తున్నారు.

ఇంతవరకు బాగానే ఉంది. మరి మిగతా హామీల మాటేమిటి? ఎన్నికలకు ఏడాది ముందు- అంటే 2023 మే నెలలో మహానాడు సందర్భంగానే చంద్రబాబునాయుడు సూపర్ సిక్స్ హామీలను ప్రకటించారు. కానీ.. ఎన్నికల్లో గెలిచి అధికారంలోకి వచ్చిన ఏడాది వరకు కూడా వాటిని అమలు చేయడానికి మాత్రం ఆయనకు వీలుచిక్కడం లేదు. పెన్షన్ల తర్వాత.. పేద మహిళలకు ఏడాదికి మూడు గ్యాస్ సిలిండర్లు ఉచితంగా ఇచ్చే హామీ కూడా కార్యరూపంలోకి వస్తోంది. అవి తప్ప మరే ఇతర హామీలు అమల్లోకి రావడం లేదు.

ఇంతటి అపారమైన అనుఝభవం ఉన్న సీనియర్ నాయకుడు అయిన చంద్రబాబునాయుడుకు.. కనీసం ఆర్టీసీ బస్సుల్లో మహిళలకు ఉచిత ప్రయాణం కల్పిస్తామని చెప్పినమాట నిలబెట్టుకోవడం కూడా చేతకావడం లేదు.

చంద్రబాబునాయుడు శిష్యుడు.. చాలా చాలా జూనియర్ అయిన రేవంత్ రెడ్డి.. తెలంగాణలో తాను అధికారంలోకి వచ్చిన తర్వాత చిటికెలో ఉచిత బస్సు ప్రయాణ హామీ అమల్లోకి తెచ్చారు. పైగా తెలంగాణ మహిళలకు రాష్ట్రవ్యాప్తంగా ఉచిత ప్రయాణం కల్పిస్తున్నారు. ఇవాళ్టి వరకు నిరాటంకంగా అది అమలవుతోంది. చంద్రబాబు ప్రకటించినది కేవలం సొంత జిల్లాలపరిధిలో మాత్రమే ఉచిత ప్రయాణం. దానికోసం మంత్రుల బృందాలు కర్ణాటకకు వెళ్లి పరిశీలన పేరుతో కొన్ని రోజులు గడిపి వచ్చాయి కూడా. కానీ నిర్ణయం మాత్రం అమలు కావడంలేదు. పాపం రవాణా మంత్రిగా బాధ్యతలు చూస్తున్న రాంప్రసాద్ రెడ్డి.. గెలిచిన నాటి నుంచి త్వరలో ఉచిత ప్రయాణం అని పలుమార్లు ప్రకటించి.. అభాసుపాలవుతున్నాడు. చంద్రబాబు కూడా ఈ ఏడాది ఉగాది పర్వ దినం నుంచి ఉచిత బస్సు ప్రయాణం అన్నారు గానీ.. నెల గడుస్తున్నా దాని జాడలేదు.

చెప్పొచ్చేదేంటంటే.. ప్రభుత్వం ఏ పని అయితే చేయాలో.. ఆ పనిని కనీసం ఒక లెవెల్ వరకు పూర్తి చేయకుండానే.. కూటమి సర్కారు వేధింపుల ఎజెండాను ప్రారంభించేసింది. చంద్రబాబు అధికారంలోకి వచ్చాక ఇప్పటిదాకా అమరావతి అనే జపం తప్ప మరో పని మీద నిలకడగా ఫోకస్ పెట్టనేలేదు. ఇప్పుడు ఎక్కడా తమ చేతులకు మట్టి అంటకుండా.. వేధింపుల పర్వాన్ని చాలా వేగంగా నడిపిస్తున్నారు.

ఘనమైన రాజకీయ పరిణతితో వేధింపులు!

కింజరాపు అచ్చెన్నాయుడుతో ప్రారంభించి.. నారా చంద్రబాబునాయుడు వరకు అరెస్టులతో వేధించడానికి ఆనాడు ముఖ్యమంత్రి జగన్మోహన్ రెడ్డి అనుసరించిన పద్ధతి ఒక్కటే. వారందరినీ ఏదో ఒక రూపంలో అవినీతి కేసుల్లో మాత్రమే ఇరికించారు. అవన్నీ నిరూపణ అయ్యాయా? లేదా? అనేది తర్వాతి సంగతి. కానీ, అవినీతి కేసులు తప్ప మరో మార్గం ఆయనకు స్ఫురించలేదు. ఇవన్నీ కేవలం రాజకీయ వేధింపులు మాత్రమే.. అని చెప్పడానికి అన్నీ ఒకే తరహాలో ఉండడం అనేది బలమైన కారణంగా కనిపించేది. కానీ ఇప్పుడు అలా కాదు. ఒక్కొక్కరి మీద ఒక్కో రకం కేసులు నమోదు అవుతున్నాయి. చూడడానికి మాత్రం.. అవన్నీ వారు చేసిన పనులే కదా.. అందులో అరెస్టు చేయకుండా ఎలా ఉంటారు? అని ప్రజలు కూడా కన్విన్స్ అయ్యేలా ఆ పాపాలు ఉంటున్నాయి. సోషల్ మీడియాలో తప్పుడు పోస్టులు అనే పదం కింద బోలెడు అరెస్టులు జరిగాయి.. జరుగుతున్నాయి.. జరుగుతాయి.. వాటిని పక్కన పెట్టండి. మిగిలిన కేసుల్లో వైవిధ్యం మెయింటైన్ చేస్తున్నారు.

నందిగం సురేష్ ను టీడీపీ ఆఫీసుపై దాడికేసులో అరెస్టు చేసినా.. దళిత మహిళ హత్యకేసుకూడా ఈలోగా మెడకు చుట్టుకుంది. చంద్రబాబు ఇంటిమీద దాడికి వెళ్లినందుకు జోగి రమేష్ ఇంకా కేసు ఎదుర్కొంటున్నారు.

సేమ్ కేసు కింద వల్లభనేని వంశీ మీద తొలుత ఇరికించలేదు. కొంచెం భిన్నంగా.. దళిత యువకుడి కిడ్నాపు, నిర్బంధం కేసు పెట్టి అరెస్టు చేశారు. ఆతర్వాత పార్టీ ఆఫీసు మీద దాడి, భూ ఆక్రమణ కేసులు కూడా జత అయ్యాయి. ఆ క్రమంలో గమనిస్తే.. తమ ప్రత్యర్థులను వేధించడంలో నమోదు చేస్తున్న కేసుల్లో రకరకాల వైవిధ్యం చాలా జాగ్రత్తగా పాటిస్తున్నారు.

సీనియర్ ఐపీఎస్ పీఎస్సార్ ఆంజనేయులు మీద కాదంబరి జత్వానీ విషయంలో అక్రమ కేసుల బనాయింపు, వేధింపులు కేసును పెట్టారు.

మాజీ మంత్రి విడదల రజని మరిదిని ముందుగా అరెస్టు చేసినప్పటికీ.. ఆ కేసు మాత్రం.. ఆమె సాగించిన అవినీతి వసూళ్ల పర్వం గురించినది. అదే మరో సీనియర్ ఐపీఎస్ సునీల్ కుమార్ విషయానికి వస్తే.. ఉద్యోగంలో నిబంధనల ఉల్లంఘనకు సంబంధించిన కేసు నమోదు అయింది.

పెద్ది రెడ్డి రామచంద్రారెడ్డి విషయంలో భూఆక్రమణలు, అక్రమమైనింగ్, అటవీ భూముల ఆక్రమణ వంటి అనేక ఆరోపణలు చేసినా.. ముందుగా మదనపల్లె భూమి రికార్డుల దహనం కేసులో ఆయన ప్రధాన అనుచరుడిని అరెస్టుచేసి.. పావులు కదుపుతున్నారు. సహజంగానే అన్నింటికంటె పెద్దది లిక్కర్ కుంభకోణం. ప్రభుత్వం యొక్క అసలు టార్గెట్ జగన్మోహన్ రెడ్డిని కూడా ముగ్గులోకి తీసుకురావడం. కానీ వారు చాలా నింపాదిగా పావులు కదుపుతున్నారు.

కసిరెడ్డి రాజశేఖర రెడ్డిని అరెస్టు చేయడంమీద వారికి చాలా ఆశలున్నాయి. వైఎస్సార్ కాంగ్రెసులో తాము టార్గెట్ చేస్తున్న అనేకమందిని ఈ ఒక్క కేసుతో మూసేయించగలమని వారు ఆశపడుతున్నారు.

జగన్‌కు, వైఎస్సార్ కాంగ్రెస్ కు ప్రమాద సంకేతాలే!

ఇప్పుడు నమోదు అయిన కేసులన్నీ కూడా న్యాయస్థానం ఎదుట నిలబడేవేనా? అంటే ఘంటాపథంగా అవునని చెప్పలేం. ఫరెగ్జాంపుల్ లిక్కర్ కుంభకోణం తీసుకుంటే.. అవినీతి జరిగిన మాట వాస్తవం. కానీ.. వాంగ్మూలం మీద రాజ్ కెసిరెడ్డి సంతకాలు పెట్టకపోయినా సరే.. వైఎస్ జగన్మోహన్ రెడ్డికే అంతిమంగా ముడుపులు అందించినట్గుగా సూత్రీకరిస్తూ, ఆయన ఆదేశాలు సూచనల మేరకే ప్రతి దశలోనూ లిక్కర్ స్కాం జరిగినట్టుగా రిమాండు రిపోర్టు తయారు చేయడం పెద్ద ఉదాహరణ?

వైఎస్సార్ కాంగ్రెస్ పార్టీకి ప్రజల్లో ఉండే విశ్వసనీయతను దెబ్బతీయడమే వారి ప్రధాన లక్ష్యం. అదే జగన్ కు, వైసీపీకి కూడా ప్రమాద సంకేతం అని చెప్పాలి. అయితే వారు నమోదు చేయిస్తున్న అన్ని కేసులూ నిజమే కాకపోవచ్చు. కానీ నిజం అని తేలిన, వారు టార్గెట్ చేస్తున్న వారు కూడా నిజంగానే దోషులు అని తేలినా వైసీపీకి పెనునష్టం వాటిల్లుతుంది. ఈ కేసుల్లో ఏది నిజం అయినప్పటికీ.. ఆమేరకు పార్టీ కొంత నష్టానికి గురవుతూ వస్తుంది.

ప్రజాస్వామ్యానికి ప్రమాద సంకేతం!

ఈ కేసుల్లో ఏ ఒక్కటి తప్పుడు కేసు అయినా సరే.. ఆ మేరకు ప్రజాస్వామ్యానికే పెద్ద నష్టం జరుగుతుంది. మదనపల్లె రెవెన్యూ రికార్డుల దహనం సంగతి పరిశీలిద్దాం. ఇదమిత్థమైన ఆధారాలు లేకుండా.. అనుమానాల మీదనే ఈ కేసు నడిపిస్తున్నారు. పెద్దిరెడ్డి రామచంద్రారెడ్డి అనుచరుడిని అరెస్టు చేయడం కేవలం ఆయన క్రెడిబిలిటీని దెబ్బతీయడానికి మాత్రమే. కానీ తప్పుడు కేసు ద్వారా ఇలాంటి ప్రయత్నం జరుగుతూ ఉంటే గనుక.. ప్రజాస్వామ్య స్ఫూర్తి, విలువలు మంటగలిసిపోయినట్టే..!

ఇలాంటి వాటి వల్ల.. తర్వాత ఏదో ఒక నాటికి వైఎస్సార్ కాంగ్రెస్ మళ్లీ అధికారంలోకి వస్తే.. ఆ పార్టీ వారు పదేపదే చెబుతుండే తరహాలో.. వడ్డీతో సహా తిరిగి చెల్లించడానికి వారు పూర్తిస్థాయిలో రంగంలోకి దిగుతారు. అన్నీ నిజం కేసులే అయి ఉండాలనే నిబంధన కూడా పక్కన పెట్టేస్తారు. ఇక ఈ రాష్ట్రంలో ప్రజాస్వామ్యం ఒక్కొక్క మెట్టూ దిగజారిపోతూ వస్తుంది.

కూటమి సర్కారు తమ ప్రత్యర్థులను టార్గెట్ చేయడానికి ఇంకా నాలుగేళ్ల సమయం ఉందనే సంగతి ముందుగా గుర్తంచుకోవాలి. హామీల గురించి అడిగినప్పుడు మాత్రం.. మాకు ప్రజలు అయిదేళ్లపాటు పాలించే అవకాశం ఇచ్చారు అని సన్నాయి నొక్కులు నొక్కుతుంటారు. కానీ రాజకీయ వేధింపుల విషయానికి వచ్చేసరికి.. రేపు ఉదయం తెల్లారుతుందో లేదో.. ఇప్పుడే పూర్తిచేయాలి అనే ఆరాటం వారిలో కనిపిస్తోంది. ఈ పోకడ అన్ని రకాలుగానూ ప్రమాద సంకేతమే! దీనివల్ల రాజకీయమే భ్రష్టుపట్టిపోతుంది.

.. ఎల్ విజయలక్ష్మి