మరోసారి తెరమీదికి తెలంగాణ టీడీపీ!

తెలంగాణ రాజకీయాల్లో టీడీపీ పాత్ర మరోసారి తెరమీదికి వచ్చింది. ఈసారి తెరమీదికి రావడం, చర్చ జరగడానికి కారణం గులాబీ పార్టీ మాజీమంత్రి, ఎమ్మెల్యే మల్లారెడ్డి ఆయన అల్లుడు రాజశేఖర రెడ్డి అండ్ మాజీ మేయర్, మాజీ ఎమ్మెల్యే తీగల కృష్ణా రెడ్డి.

వీళ్ళు ముగ్గురూ దగ్గరి బంధువులే. ముగ్గురూ హైదరాబాదులో టీడీపీ అధినేత అండ్ ఏపీ సీఎం చంద్రబాబును కలుసుకున్నారు. బాబును కలవగానే తీగల తాను టీడీపీలో చేరుతున్నట్లు మీడియాకు చెప్పేశాడు. తాను టీడీపీతోనే రాజకీయ అరంగేట్రం చేశానంటూ చెప్పుకొచ్చాడు. ఈయన టీడీపీలో ఉన్నప్పుడే హైదరాబాద్ మేయర్ అయ్యాడు. ఎమ్మెల్యే అయ్యాడు.

మల్లారెడ్డి ఆయన అల్లుడు కూడా టీడీపీలో చేరతారని ఊహాగానాలు వినిపిస్తున్నాయి. మల్లారెడ్డి మీద ఇలాంటి ఊహాగానాలు గతంలోనూ వచ్చాయి. మల్లారెడ్డి పైకి తన మనుమరాలి పెళ్ళికి బాబును ఆహ్వానించాలని వచ్చినట్లు చెబుతున్నా టీడీపీలో చేరుతానని చెప్పడానికే వచ్చినట్లు మీడియా ఊహిస్తోంది. ఈయన కూడా గతంలో టీడీపీ నాయకుడే కదా.

కాంగ్రెస్ పార్టీలో చేరిన బీఆర్ఎస్ ఎమ్మెల్యేల అనర్హత విషయం తేలాక తాను టీడీపీలో చేరుతానని సన్నిహితులకు చెప్పినట్లు ఓ ప్రధాన పత్రిక రాసింది. ఈ ముగ్గురూ టీడీపీలో చేరాలనుకోవడానికి కారణం రేవంత్ సర్కారు నుంచి ఇబ్బందులు తప్పించుకోవడానికేనని కొన్ని పత్రికల్లో వార్తలు వచ్చాయి.

ఎలా తప్పించుకుంటారంటే.. చంద్రబాబు సీఎం రేవంత్ రెడ్డికి రాజకీయ గురువు కాబట్టి ఆయన చెబితే వింటాడని అనుకుంటున్నారు. మల్లారెడ్డి కాలేజీల మీద ఆల్రెడీ హైడ్రా కన్ను పడింది. ఆయన పెద్ద చెరువుల కబ్జాదారు అనేది హైదరాబాదులో పాపులర్.

మల్లారెడ్డికి రేవంత్ రెడ్డికి మొదటి నుంచి పడదు కాబట్టి కాంగ్రెస్ పార్టీలోకి పోలేడు. బీజేపీలో చేరినా ఉపయోగం లేదు. ఇప్పుడు తెలంగాణలో దిక్కుమొక్కు లేకుండా ఉన్నది టీడీపీ మాత్రమే కాబట్టి ఆ పార్టీలో చేరే ప్రయత్నాలు జరుగుతున్నాయి. ఆల్రెడీ కొన్ని పత్రికలు అప్పుడే తీగల కృష్ణారెడ్డి తెలంగాణ టీడీపీ అధ్యక్షుడు అవుతాడని రాశాయి.

ఎందుకంటే తాను టీడీపీలో చేరుతున్నానని ఓపెన్ గా చెప్పాడు కాబట్టి. ఈయన ఇదివరకే గులాబీ పార్టీ బయటకు వచ్చాడు కాబట్టి పార్టీలో చేరడానికి ఏ అడ్డంకులూ లేవు. ఎంతమంది చేరినా టీడీపీ తెలంగాణలో ఎదగడానికి అవకాశం ఉందా అనేది ఇప్పుడు ప్రశ్న.