నా ఇంట్లో నాగవంశీ ఫొటో పెట్టుకుంటా

లక్కీ భాస్కర్ సినిమాపై కొన్ని రోజుల కిందట నిర్మాత నాగవంశీ ఆసక్తికర వ్యాఖ్యలు చేశాడు. ఈ సినిమాకు మొదటి రోజు ఎంత ఆశిస్తున్నారనే ప్రశ్నకు, ఠక్కున వంద కోట్లు అంటూ సమాధానం చెప్పాడు. పక్కనే ఉన్న దర్శకుడు కూడా ఆ సమాధానానికి ఆశ్చర్యపోయాడు. ఆ వెంటనే నవ్వుకున్నాడు కూడా.

నాగవంశీ ఇచ్చిన ఆ సమాధానం ఆ తర్వాత వైరల్ అయింది. దానిపై చాలా చర్చ జరిగింది. చర్చ అనడం కంటే నాగవంశీపై ట్రోలింగ్ జరిగిందనడం కరెక్ట్. ఆయన సరదాగానే ఆ మాట అన్నప్పటికీ, సోషల్ మీడియాలో విపరీతార్థాలు తీశారు.

ఇప్పుడీ మేటర్ హీరో దుల్కర్ సల్మాన్ వరకు వచ్చింది. నాగవంశీ ఇచ్చిన స్టేట్ మెంట్ పై దుల్కర్ కూడా సరదాగా కామెంట్ చేశాడు. తన ఇంట్లో నాగవంశీకి ఫొటో ఫ్రేమ్ కట్టిస్తానంటున్నాడు దుల్కర్.

“13 ఏళ్ల కెరీర్ నాది. దాదాపు 40 సినిమాలు చేశాను. వంద కోట్లు అనేది నాకు కల. నిజంగా లక్కీ భాస్కర్ కు మొదటి రోజు వంద కోట్ల వసూళ్లు వస్తే, నాగవంశీకి ఫొటో కట్టిస్తా, ఆ ఫ్రేమ్ నా ఇంట్లో పెట్టుకుంటా. నా కంటే ఆనందించే వ్యక్తి ఈ భూమ్మీద ఉండడు.”

ఇలా నాగవంశీ సరదాగా చేసిన వ్యాఖ్యలపై దుల్కర్ కూడా సరదాగా రియాక్ట్ అయ్యాడు. తమ సినిమా ఎంత కలెక్ట్ చేస్తుందనే విషయం పక్కనపెడితే, ఎంతమందికి కనెక్ట్ అయిందనేది తనకు చాలా ముఖ్యమంటున్నాడు ఈ హీరో. కథకు యూనివర్సల్ అప్పీల్ ఉందని, ప్రతి కుటుంబంలో ఓ భాస్కర్ ఉంటాడని, కాబట్టి సినిమా కచ్చితంగా పెద్ద హిట్టవుతుందని చెబుతున్నాడు.