రాబిన్ హుడ్.. నలిగిపోతోందా?

నితిన్-వెంకీ కుడుమల కాంబినేషన్ లో మైత్రీ సంస్థ నిర్మించిన సినిమా రాబిన్ హుడ్. డిసెంబర్ 25 విడుదల అంటూ ప్రకటించేసారు ఇప్పటికే. టీజర్ ఇచ్చారు, పెద్దగా బజ్ రాలేదు. ఇప్పుడు పాట ఇస్తున్నారు. సినిమా ఎలా వుండబోతుంది అన్న సంగతి పక్కన పెడితే నిర్మాతలు మరో రెండు వారాల వరకు ఈ సినిమా మీద దృష్టి పెట్టేలా లేరు. ఆ అవకాశం కూడా కనిపించడం లేదు. పుష్ప విడుదలైన రెండు మూడు రోజులకు కానీ ఈ సినిమా మీద దృష్టి పెట్టడం అన్నది మైత్రీ సంస్థకు కాస్త కష్టమే.

వెయ్యి కోట్ల సినిమాను ప్రాపర్ గా స్మూత్ గా లాంచ్ చేసే పనిలో వున్నారు. వారు ఆ పనిలోంచి బయటకు వచ్చి, ఊపిరి పీల్చుకునే సరికి కనీసం ఏడో తేదీ వస్తుంది. అప్పటికి రెండు వారాల సమయం వుంటుంది రాబిన్ హుడ్ కు. అక్కడి నుంచి దాని మీద ప్లానింగ్ ప్రారంభించాల్సి వుంటుంది.

నితిన్ కెరీర్ లోనే దాదాపు 70 కోట్లకు పైగా ఖర్చు చేసిన సినిమా రాబిన్ హుడ్ అని సమాచారం. ఇటు రెండు వారాల ముందు పుష్ప. అటు రెండు వారాల తరువాత గేమ్ ఛేంజర్ వగైరా సినిమాలు. అందుకే నిర్మాత దిల్ రాజు తను నితిన్ తో నిర్మించిన తమ్ముడు సినిమాను వెనక్కు పెట్టారు. అది వేరే సంగతి.

విపరీతమైన బజ్ వస్తే తప్ప వీటన్నిటి మధ్య రాబిన్ హుడ్ కు మంచి ఒపెనింగ్ పడదు. పైగా క్రిస్మస్ కు విపరీతంగా విడుదలలు ప్లాన్ చేస్తున్నారు. ఇటు 20 నుంచి అటు 25 వరకు. ఈ కాంపిటీషన్ కూడా ఎంతో కొంత వుంటుంది. ఇప్పుడు నితిన్ నే రంగంలోకి దిగి తన సినిమా ప్రమోషన్ ప్లాన్ అంతా చూసుకోవాల్సి వుంది.