బాబు గారూ… అంతిమంగా బాధితులు ప్ర‌జ‌లే!

“ప్ర‌భుత్వం వ‌ద్ద డ‌బ్బు లేదు. కానీ సూప‌ర్‌సిక్స్ సంక్షేమ ప‌థ‌కాల్ని అమ‌లు చేయాలి. సంప‌ద సృష్టించే వినూత్న ఆలోచ‌న‌లు నా ద‌గ్గ‌ర ఉన్నాయి” అని ఇటీవ‌ల ముఖ్య‌మంత్రి చంద్ర‌బాబునాయుడు అంటే…ఏమిట‌బ్బా ఆ ఆలోచ‌న‌లు అని చాలా మంది అనుకున్నారు. గ‌తంలో ఏ ప్ర‌భుత్వం చేయ‌ని వినూత్న ఆలోచ‌న‌లు చంద్ర‌బాబు స‌ర్కార్ చేసింది.

“డ‌బ్బులు ఊరికే రావు” అని బంగారానికి సంబంధించి వాణిజ్య ప్ర‌క‌ట‌న‌లో చెప్పిన‌ట్టు, రోడ్లు ఊరికే రావ‌ని చంద్ర‌బాబు అసెంబ్లీ వేదిక‌గా తేల్చి చెప్పారు. రోడ్లు కావాలంటే టోల్ తీస్తార‌ని ఆయ‌న చెప్ప‌క‌నే చెప్పారు. ఒక‌వేళ ఆర్థిక భారం వేయొద్దంటే, త‌న‌కేం ఇబ్బంది లేద‌ని ఆయ‌న బుకాయింపు…వారెవ్వా అనకుండా వుండ‌లేరు.

ప్రైవేటీక‌ర‌ణ ముద్దుబిడ్డ‌గా చంద్ర‌బాబుకు పేరు వుంది. ఆ పేరును ఆయ‌న నిల‌బెట్టుకోడానికి ప్ర‌య‌త్నిస్తున్నారు. రోడ్ల‌పై ఎవ‌రూ చేయని ఆలోచ‌న ఆయ‌న చేశారు. ప్రైవేటీక‌ర‌ణ ఆలోచ‌న‌ల‌పై బ‌హుశా ఆయ‌న‌కు మాత్ర‌మే పేటెంట్ వున్న‌ట్టుంది. అసెంబ్లీలో రోడ్ల‌పై ఆయ‌న ఎంత చ‌క్క‌గా చెప్పారో తెలుసుకుని త‌రిద్దాం.

‘జాతీయ రహదారుల తరహాలో రాష్ట్ర, జిల్లా స్థాయిలోని అన్ని ప్రధాన రోడ్లపై టోల్‌గేట్లు ఏర్పాటుచేయాలని ఆలోచిస్తున్నాం. రోడ్ల నిర్వహణను అవుట్‌సోర్సింగ్‌ ఏజెన్సీకి అప్పగిస్తాం. వారు టోల్‌ ఫీజు వసూలు చేసుకుంటారు. దీనికి ప్రజలను ఒప్పించాల్సిన బాధ్యత ఎమ్మెల్యేల‌దే. ఎక్కడైనా వ్యతిరేకిస్తే అక్కడ గుంతల రోడ్లతోనే ఉండాలి’ అని ముఖ్యమంత్రి చంద్రబాబు నాయుడు అన్నారు.

ముఖ్య‌మంత్రి నోట ఈ మాట‌లు వ‌చ్చిన త‌ర్వాత ఎవ‌రైనా జుత్తు పీక్కోవ‌డం త‌ప్ప‌, చేయ‌గ‌లిగేదేమి వుంటుంది? ఉభ‌య‌గోదావ‌రి జిల్లాల్లో ఫైలట్ ప్రాజెక్ట్‌గా టోల్‌గేట్లు ఏర్పాటు చేయాల‌ని ఆయ‌న నిర్ణ‌యించారు. ఆటోలు, ద్విచక్ర వాహనాలకు మినహాయింపు ఇస్తూ మిగతా నాలుగు చక్రాల వాహనాలు, భారీ వాహన దారుల వద్ద టోల్‌ ఫీజు వసూలు చేయాలని ఆలోచిస్తున్న‌ట్టు ముఖ్య‌మంత్రి వెల్ల‌డించారు.

మొద‌ట్లో ఇట్లే చెబుతారు. ఆ త‌ర్వాత నెమ్మ‌దిగా ఆటోలు, ద్విచ‌క్ర వాహ‌నాల‌కు కూడా వ‌సూలు చేయ‌కుండా వుండ‌రనే భ‌యం వ్య‌క్త‌మ‌వుతోంది. ప్రైవేటీక‌ర‌ణ ఎలా వుంటుందో తెలియంది కాదు. రిల‌య‌న్స్ సంస్థ సెల్‌ఫోన్ల మార్కెటింగ్ ఎలా మొద‌లు పెట్టిందో మ‌నంద‌రికీ తెలుసు. మొద‌టి ఫ్రీకాల్స్ అంటారు, ఇక ఫోన్లు లేకుండా బ‌త‌క‌లేని స్థితికి తీసుకొచ్చి, వాత పెట్ట‌డం మార్కెట్ స్వ‌భావం.

ఇప్పుడు కూడా రోడ్ల ప‌రిస్థితి ఇట్లే వుంటుంద‌నే అనుమానాలు లేక‌పోలేదు. ఏది ఏమైనా చివ‌రికి గ్రామీణ ప్రాంతాల్లో కూడా రోడ్ల‌కు టోల్‌గేట్లు పెట్ట‌డం అంటే, మ‌న వ్య‌వ‌స్థ ఏ స్థితికి దిగ‌జారిందో అర్థం చేసుకోవ‌చ్చు. మ‌రీ ముఖ్యంగా ప్ర‌భుత్వాలు ప్ర‌జ‌ల‌కు ఉచితంగా అందించాల్సిన సేవ‌ల్ని, ముక్కు పిండి మ‌న‌తోనే డ‌బ్బు వ‌సూలు చేయాల‌ని నిర్ణ‌యించ‌డం ఆందోళ‌న క‌లిగిస్తోంది. ముఖ్య‌మంత్రి చెబుతున్న‌ట్టు నాలుగు చ‌క్రాల వాహ‌నాలు త‌మ‌పై ప‌డే టోల్ ఫీజుల భ‌రాన్ని ప్ర‌యాణికులు లేదా వినియోగ‌దారుల‌పై వేయకుండా వుంటాయ‌ని ఎలా అనుకుంటున్నారు? అంతిమంగా ప్ర‌జ‌లే బాధితులు.