ఇదేం గ‌మ్మ‌త్తు విజ‌య‌సాయిరెడ్డి!

వైసీపీ మాజీ నేత‌, మాజీ ఎంపీ విజ‌య‌సాయిరెడ్డి శ‌నివారం వీఐపీ ప్రారంభ స‌మ‌యంలో తిరుమ‌ల శ్రీ‌వారిని ద‌ర్శించుకున్నారు. రాజ‌కీయాల నుంచి త‌ప్పుకుంటాన‌ని ప్ర‌క‌టించిన త‌ర్వాత మొద‌టి సారి ఆయ‌న‌కు తిరుమ‌ల‌కు వెళ్లారు. తిరుమ‌ల‌లో టీటీడీ అధికారులు ఆయ‌న‌కు స్వాగ‌తం ప‌ల‌క‌డం విశేషం. అంతేకాదు ద‌ర్శ‌నానంత‌రం విజ‌య‌సాయిరెడ్డికి పండితులు ఆశీర్వ‌చ‌నం చేసి స్వామివారి తీర్థ ప్ర‌సాదాలు అంద‌జేశారు.

అధికారంలో లేని వాళ్ల‌కు తిరుమ‌ల‌లో స్వామివారి ద‌ర్శ‌నం కూడా బ‌హు క‌ష్టం. ఒక‌వేళ ప్ర‌తిప‌క్ష నాయ‌కుల‌కు వీఐపీ ద‌ర్శ‌నం క‌ల్పించాలంటే, ఎమ్మెల్యే లేదా ఎంపీగా ఉంటేనే అధికారులు వారి సిఫార్సు లేఖ‌ల‌ను ప‌రిగ‌ణ‌లోకి తీసుకుంటారు. లేదంటే స్వామివారి ద‌ర్శ‌న భాగ్యం గ‌గ‌న‌మే.

అలాంటిది తిరుమ‌ల‌లో విజ‌య‌సాయిరెడ్డికి ఏ అధికార హోదా లేకుండానే ద‌ర్శ‌న భాగ్యం క‌ల్పించ‌డం విశేషం. ఇటీవ‌ల ఆయ‌న వైఎస్ జ‌గ‌న్ కోట‌రీపై ఘాటు విమ‌ర్శ‌లు చేస్తున్న సంగ‌తి తెలిసిందే. అలాగే లిక్క‌ర్ కేసులో దొర‌క‌ని దొంగ‌ల్ని ప‌ట్టిస్తాన‌ని కూడా ఆయ‌న హెచ్చ‌రించారు. అయితే ఇదే కేసులో ఆయ‌న్ను కూడా నిందితునిగా చేర్చారు.

కానీ ఆయ‌న ముంద‌స్తు బెయిల్ కోసం వెళ్లిన దాఖ‌లాలు లేవు. మిగిలిన వాళ్లంతా న్యాయ స్థానాల్లో బెయిల్ కోసం పోరాటాలు చేస్తున్న సంగ‌తి తెలిసిందే. మ‌రి త‌నను అరెస్ట్ చేయ‌ర‌నే ఏ ధైర్యంతో విజ‌య‌సాయిరెడ్డి ఉన్నారో ఆయ‌న‌కే తెలియాలి. ప్ర‌స్తుతం ఆయ‌న్ను టీటీడీ అధికారులు ప్ర‌త్యేకంగా చూడ‌డం గ‌మ్మ‌త్తైన సంగ‌తే.