లంకాకు నామినేటెడ్ పోస్టుపై బీజేపీ నేత‌ల ఆగ్ర‌హం!

బీజేపీ నేత లంకా దిన‌క‌ర్‌కు 20 సూత్రాల అమ‌లు క‌మిటీ చైర్మ‌న్ ప‌ద‌వి ఇవ్వ‌డంపై బీజేపీ నేత‌లు తీవ్ర ఆగ్ర‌హం వ్య‌క్తం చేస్తున్నారు. ఏపీ బీజేపీ చీఫ్ ద‌గ్గుబాటి పురందేశ్వ‌రి త‌న సామాజిక వ‌ర్గానికి ప్రాధాన్యం ఇచ్చారే త‌ప్ప‌, సుదీర్ఘ కాలంగా పార్టీ కోసం ప‌ని చేస్తున్న వారిని విస్మ‌రించార‌నే ఆరోప‌ణ‌లు ఆ పార్టీ నుంచి రావ‌డం గ‌మ‌నార్హం.

బీజేపీలో క్ర‌మ‌శిక్ష‌ణను ఉల్లంఘించి, పార్టీ నుంచి స‌స్పెన్ష‌న్‌కు గురైన వ్యక్తిని తిరిగి తీసుకోవ‌డంతో పాటు నామినేటెడ్ ప‌ద‌వి ఇవ్వ‌డం ఏంట‌నే నిల‌దీత బీజేపీ నేత‌ల నుంచి వ‌స్తోంది. మూడేళ్ల క్రితం టీడీపీ నుంచి బీజేపీలోకి లంకా దిన‌క‌ర్ వెళ్లారు. ఇప్పుడాయ‌న‌కు నామినేటెడ్ పోస్టుల విష‌యంలో పెట్ట‌పీట వేయ‌డం ఏంట‌నే ప్ర‌శ్న ఎదుర‌వుతోంది.

కేవ‌లం త‌న సామాజిక వ‌ర్గంతో పాటు టీడీపీ అనుకూల నాయ‌కుడు కావ‌డం వ‌ల్లే లంకా దిన‌క‌ర్‌కు నామినేటెడ్ ప‌ద‌వి ఇప్పించార‌నే ఆవేద‌న బీజేపీ నేత‌ల్లో వుంది. ఈ సంద‌ర్భంగా బీజేపీ నేతలు త‌మ అవేద‌న‌ను సోష‌ల్ మీడియా వేదిక‌గా వ్య‌క్తం చేస్తున్నారు. ఎన్ని విమ‌ర్శ‌లు వ‌చ్చినా బీజేపీ అధ్య‌క్షురాలు పురందేశ్వ‌రి మాత్రం త‌న సామాజిక వ‌ర్గానికి పెద్ద‌పీట వేయ‌డంలో వెనుకంజ వేయ‌క‌పోవ‌డం విమ‌ర్శ‌ల‌కు దారి తీస్తోంది.