ఛార్మింగ్ స్టార్ ‘యాక్షన్’ ప్రయత్నం

శర్వానంద్ కు యాక్షన్ సినిమాలు పెద్దగా కలిసిరాలేదు. భారీ అంచనాల మధ్య చేసిన మహాసముద్రం, రణరంగం సినిమాలు బోల్తాకొట్టాయి. దీంతో దాదాపు మూడేళ్లుగా ఆ జానర్ వైపు వెళ్లడం మానేశాడు శర్వా.

మళ్లీ ఇన్నేళ్లకు శర్వానంద్ కు ఓ యాక్షన్ కథ నచ్చింది. అది కూడా పీరియాడిక్ కథ కావడం విశేషం. దర్శకుడు సంపత్ నంది చెప్పిన స్టోరీ ఇది. 1960ల్లో తెలంగాణ-మహారాష్ట్ర బోర్డర్ లో జరిగే ఓ రూరల్ యాక్షన్ స్టోరీ ఇది.

ఇటు శర్వానంద్ కు, అటు సంపత్ నందికి ఇద్దరికీ ఈ తరహా కథ కొత్త. సత్యసాయి ఆర్ట్స్ బ్యానర్ పై కేకే రాధామోహన్ ఈ సినిమాను నిర్మించబోతున్నారు. కెరీర్ లో శర్వానంద్ కు ఇది 38వ చిత్రం.

ఈ సినిమా కోసం ప్రత్యేకంగా మేకోవర్ అవ్వబోతున్నాడు శర్వానంద్. ప్రస్తుతం చేతిలో ఉన్న సినిమా పూర్తయిన వెంటనే, మేకోవర్ ప్రక్రియ మొదలవుతుంది. భీమ్స్ ఈ సినిమాకు సంగీత దర్శకుడు. ఈ సినిమాతో ఛార్మింగ్ స్టార్ కాస్తా యాక్షన్ స్టార్ అనిపించుకోవాలని చూస్తున్నాడు.