తండేల్ క్రిస్మస్ కు వస్తుందా?

నాగ్ చైతన్య- చందు మొండేటి కాంబోలో నిర్మిస్తున్న సినిమా తండేల్. ఈ సినిమా విడుదల డేట్ మీద కాస్త అయోమయంగా వుంది. వాస్తవానికి ఈ సినిమాకు ముందుగా ఇచ్చిన డేట్ 2024 క్రిస్మస్. కానీ ఇటీవల వినిపించిన డేట్ సంక్రాంతి 2024. ఇప్పుడు ఇంతకీ ఏ డేట్ కు వస్తుంది అన్నది తెలియదు. మరో ఒకటి రెండు రోజుల్లో తండేల్ టీమ్ ప్రెస్ మీట్ పెట్టబోతోంది. అప్పుడు క్లారిటీ వస్తుంది. ఈ లోగా దర్శకుడు చందు మొండేటి చెప్పింది ఏమిటంటే మరో పది రోజులు షూట్ వుంది. కానీ క్రిస్మస్ కు రాలేము… సంక్రాంతికి రెడీ అవుతుంది. అ టైమ్ లో విడుదల చేయాలా వద్దా అన్నది నిర్మాతలు, హీరో కలిసి నిర్ణయించాల్సి వుంటుంది అని.

సంక్రాంతికి రాదు అని అర్థం అయిపోతోంది. ఎందుకంటే వెంకీ సినిమా వుంటుంది. చరణ్ సినిమా వుంది. ఇక మిగిలింది ఫిబ్రవరికో, మార్చికో వెళ్లడం. కానీ అది అంత సరైన నిర్ణయం అవుతుందా అన్నది అనుమానం. ఇదిలా వుంటే క్రిస్మస్ డేట్ ఈసారి వృధాగా పోయే అవకాశం కనిపిస్తోంది. నితిన్ నటించిన రాబిన్ హుడ్ రావడం లేదు అనే టాక్ వుంది. పైగా బన్నీ ఓ మాట చెబితే రాబిన్ హుడ్ నిర్మాతలు అయిన మైత్రీ సంస్థ అగిపోతుంది. మరే సినిమా కూడా ఇప్పటికి అయితే ప్లేస్ చేయలేదు.

ఏదో విధంగా కిందా మీదా పడి క్రిస్మస్ కు కనుక తండేల్ వచ్చేస్తే మంచి నిర్ణయం అవుతుంది. పుష్ప రన్ అప్పటికి 20 రోజులు అయిపోతుంది. పండగ సీజ‌న్ స్టార్ట్ కావడానికి ఇంకా 20 రోజులు వుంటుంది. ఈ గ్యాప్ ను వాడుకోవచ్చు. కానీ ఈ దిశగా వెళ్లాలి అంటే సిజి పనులు పూర్తి కావాలి. ఇప్పుడు తండేల్ టీమ్ దాని మీదే దృష్టి పెట్టి, క్రిస్మస్ కు రావడానికి వున్న సాధ్యాసాధ్యాలను పరిశీలిస్తోంది.

ఒకటి రెండు రోజుల్లో వర్క్ మీద క్లారిటీ వస్తే మీడియా ముందుకు అఫీషియల్ గా వచ్చి ప్రకటించే అవకాశం వుంది. క్రిస్మస్ కు వస్తారా? లేదా కొత్త డేట్ ప్రకటిస్తారా? అన్నది అప్పుడు తేలుతుంది.