కంగువ కూడా రెండు భాగాలు

ఈ మధ్య దర్శకులకు అంది వచ్చిన వెసులుబాటు ఏమిటంటే రెండు భాగాలు. నిర్మాతలకు కూడా అది బాగానే వుంది. ఫస్ట్ భాగం కనుక హిట్ అయితే రెండో భాగం తీయచ్చు. లేదంటే మానేయచ్చు. ముందు అయితే రెండో భాగం అంటూ ఓ లీడ్ ఇచ్చి వదిలేయచ్చు. తెలుగులో అలా లీడ్ ఇచ్చి, మూలన పడిన అనౌన్స్ మెంట్లు వున్నాయి. రెండో భాగం చేస్తున్న పుష్ప 2 లాంటివి వున్నాయి. సలార్, దేవర, బింబిసార లాంటివి వెయిటింగ్ లిస్ట్ లో వున్నాయి.

ఇప్పుడు ఈ వెయిటింగ్ లిస్ట్ జాబితాలో మరో సినిమా చేరబోతోంది. సూర్య నటించిన కంగువ సినిమా. ఈ సినిమాకు కూడా రెండో భాగం వుందని దర్శకుడు శివ నే చెబుతున్నారు. అంతే కాదు, ఎన్ని భాగాలైనా చేసుకోవచ్చు. వెబ్ సిరీస్ చేయచ్చు. అలాంటి పొటన్షియాలిటీ వున్న కథ ఇది అంటున్నారు. అలా అని చెప్పి తొలిసగాన్ని అయోమయంగా, అర్ధాంతరంగా ముంగించలేదని, ఈ భాగానికి ఈ భాగం పెర్ ఫెక్ట్ ఎండింగ్ వుంటుందని అంటున్నారు.

అంటే మొత్తం మీద కంగువ కనుక హిట్ అయితే కంగువ 2 వుంటుంది. కంగువ సినిమాను చాలా భారీగా నిర్మించారు. విజువల్స్ అద్భుతంగా వుంటాయని ట్రయిలర్ హింట్ ఇచ్చింది. అందువల్ల ఏ మాత్రం బాగున్నా, నార్త్ బెల్ట్ లో బాగా రిసీవ్ చేసుకున్నా, పార్ట్ 2 పక్కా.