రాబిన్ హుడ్.. ఇది చాలదు

సరైన హిట్ కోసం చూస్తున్న హీరో నితిన్. దాదాపు నాలుగేళ్లుగా సరైన హిట్ పడలేదు. పైగా డిజాస్టర్లు పలకరిస్తున్నాయి. ఇలాంటి టైమ్ లో ఛలో, భీష్మ కాంబినేషన్ అయిన వెంకీ కుడుమలతో రాబిన్ హుడ్ సినిమా చేస్తున్నారు. ఈ సినిమా క్రిస్మస్ కు విడుదల కాబోతోంది. అందుకే టీజర్ ను విడుదల చేసారు.

చాలా కాలంగా షూట్ లో ఉంది ఈ సినిమా, కాస్త భారీగానే ఖర్చు చేస్తున్నారు. మరి దానికి తగిన కంటెంట్ వుండి వుంటుందా అన్నది ప్రశ్న. రాబిన్ హుడ్ అని టైటిల్ పెట్టగానే అర్థం అయిపోతోంది సబ్జెక్ట్ ఏమిటి అన్నది. దానికి తగినట్లే టీజర్ కట్ చేసారు. కానీ టీజర్ నితిన్ కు మంచి హిట్ ఇచ్చే సినిమా వస్తోందనే రేంజ్ లో మాత్రం లేదు. టీజర్ లో వెంకీ కుడుమల మార్క్ ఫన్ అంతగా కనిపించలేదు.

పడిన రెండు మూడు డైలాగుల్లో ఫన్ పేలలేదు సరికదా, లాస్ట్ న వేసిన పంజాబీ డ్రెస్.. పంజాబీ జోక్ మరీ జబర్దస్త్ లెవెల్ లో వుంది. ఈ రోజుల్లో టీజర్ టైమ్ లో డిసైడ్ అయిపోతున్నారు ప్రేక్షకులు. ఈ సినిమా చూడాలి.. వద్దు అనేది. అలాంటి సమయంలో టీజర్ అన్నది చాలా కీలకం. అది గమనించి వుంటే టీజర్ ఇంకా బెటర్ గా వుండేది అనుకోవచ్చు. కానీ అలా లేకపోవడం వల్ల ఇక ట్రయిలర్ దగ్గర కచ్చితంగా జాగ్రత్తపడాలి అనే కామెంట్లకు దారి తీస్తోంది.