నాని హీరోయిన్ ఎట్టకేలకు హిట్ కొట్టింది

పెళ్లి తర్వాత కూడా కెరీర్ కొనసాగిస్తున్న హీరోయిన్లలో నజ్రియా ఒకరు. అయితే పెళ్లి తర్వాత ఆమె కెరీర్ ఆశించిన స్థాయిలో కొనసాగడం లేదు. అయితే సక్సెస్ సంగతి పక్కనపెడితే, సినిమాల విషయంలో ఆమె జోరు తగ్గించింది. ఇంకా చెప్పాలంటే ఏడాదికి ఒక సినిమా కూడా చేయడం లేదు.

ఇలాంటి టైమ్ లో ఓ మంచి విజయం అందుకుంది నజ్రియా. ఆమె నటించిన మలయాళం సినిమాకు అక్కడ సూపర్ హిట్ టాక్ వచ్చింది. సూక్ష్మదర్శిని పేరిట విడుదలైన ఈ సినిమా మొదటి రోజే పెద్ద హిట్టయింది. నాలుగేళ్ల గ్యాప్ తర్వాత మలయాళంలో రీఎంట్రీ ఇచ్చిన ఈ బ్యూటీ.. రీఎంట్రీతో సక్సెస్ అందుకుంది.

నటుడు-దర్శకుడు బాసిల్ జోసెఫ్ హీరోగా నటించిన ఈ సినిమాలో నజ్రియా కీలక పాత్ర పోషించింది. మిస్టరీ థ్రిల్లర్ జానర్ లో తెరకెక్కిన ఈ సినిమాలో నజ్రియా నటనకు మంచి పేరొచ్చింది.

2014లో ఫహాజ్ ఫాజిల్ ను పెళ్లి చేసుకున్న నజ్రియా, రీఎంట్రీలో కేవలం 5 సినిమాలు మాత్రమే చేసింది. 2022లో తెలుగులో ఆమె నాని సరసన “అంటే సుందరానికి..” సినిమా చేసింది. ఆ సినిమా ఆమెకు కలిసిరాలేదు. ఆ మూవీ తర్వాత మళ్లీ గ్యాప్ తీసుకున్న నజ్రియా, ఇన్నేళ్లకు మలయాళంలో సినిమా చేసి హిట్ కొట్టింది.

తన తొలి ప్రాధాన్యం కుటుంబానికేనంటూ ఆమె గతంలో ప్రకటించింది. తాజా సక్సెస్ తో ఆమె మనసు మార్చుకొని సినిమాల సంఖ్య పెంచుతుందని చాలామంది భావిస్తున్నారు.