వింటర్ నుంచే వేడెక్కుతున్న సమ్మర్

2025 ఏడాదికి సంబంధించి ఆల్రెడీ పండగల రిలీజ్ డేట్స్ అన్నీ లాక్ అయిన విషయాన్ని ఇంతకుముందే చెప్పుకున్నాం. దీంతో మేకర్స్ అంతా కీలకమైన సమ్మర్ బాక్సాఫీస్ పై దృష్టిపెట్టారు. ఇందులో భాగంగా వచ్చే ఏడాది మార్చి-ఏప్రిల్ నెలల్ని క్రేజీ సినిమాలు ఆక్రమించాయి.

మార్చి నెలకు సంబంధించి ఆల్రెడీ ఎల్ 2 (లూసిఫర్ 2), హరిహర వీరమల్లు, విజయ్ దేవరకొండ సినిమాలు డేట్స్ ఎనౌన్స్ చేశాయి. హరిహర వీరమల్లు, విజయ్ దేవరకొండ-గౌతమ్ తిన్ననూరి సినిమాలు మార్చి 28న థియేటర్లలోకి వస్తున్నాయి. వీటికి ఒక రోజు ముందు లూసిఫర్ 2 వస్తోంది.

వీటితో పాటు సంక్రాంతికి రావాల్సిన విశ్వంభర సినిమా కూడా మార్చి నెల్లోనే థియేటర్లలోకి వచ్చే అవకాశం ఉంది. దీనికి సంబంధించి అధికారిక ప్రకటనను సంక్రాంతికి ఇస్తారు. చిరంజీవి హీరోగా నటిస్తున్న ఈ సినిమా మాత్రమే సమ్మర్ లో పెద్ద సినిమా కాదు.

ఏప్రిల్ లో ప్రభాస్ రాజాసాబ్ (ఏప్రిల్ 10) వస్తోంది. తేజ సజ్జ మిరాయి (ఏప్రిల్ 18) కూడా రేసులో ఉంది. ఇప్పుడీ లిస్ట్ లోకి తాజాగా కన్నప్ప కూడా చేరింది. ఏప్రిల్ 25న ఈ సినిమాను రిలీజ్ చేయబోతున్నట్టు తాజాగా ప్రకటించాడు మంచు విష్ణు.

ఇక మే నెలలో హిట్-3, మాస్ జాతర లాంటి సినిమాలు షెడ్యూల్ అయి ఉన్నాయి. ఇలా వచ్చే ఏడాది సమ్మర్ బాక్సాఫీస్ కు, ఈ వింటర్ నుంచే వేడి మొదలైంది.