సినిమాలు ఓకే.. సెల్ఫీలు ఎక్కడ!

హీరోలతో పోలిస్తే హీరోయిన్లు బిజీగా ఉంటారు. చకచకా సినిమాలు చేస్తుంటారు. కానీ నిధి అగర్వాల్ మాత్రం పూర్తిగా భిన్నం. ఏళ్లుగా రెండే సినిమాలపై ఆమె వర్క్ చేస్తోంది. ఒకటి రాజా సాబ్. ఇంకోటి హరిహర వీరమల్లు.

ఈ రెండు సినిమా యూనిట్లకు అందుబాటులో ఉంది ఈ ముద్దుగుమ్మ. ఎప్పుడు కోరితే అప్పుడు సెట్స్ పైకి వస్తోంది. యూనిట్ కు అన్ని విధాలా సహకరిస్తోంది.

దాదాపు మూడేళ్లుగా హరిహర వీరమల్లు సినిమాపై ఉంది నిధి. అటు రాజాసాబ్ సినిమాతో కూడా చాన్నాళ్లుగా ట్రావెల్ చేస్తోంది. ఇప్పటికీ ఈ సినిమాల షూటింగ్స్ నడుస్తున్నాయి.

తాజాగా పవన్ మరోసారి హరిహర వీరమల్లు సెట్స్ పైకి వచ్చారు. అటు ప్రభాస్ కూడా టైమ్ దొరికినప్పుడల్లా రాజాసాబ్ షూట్ కొనసాగిస్తున్నాడు. అయితే గమ్మత్తైన విషయం ఏంటంటే. ఇన్నేళ్లుగా ఈ స్టార్ హీరోలతో పనిచేస్తున్నప్పటికీ.. ఇప్పటివరకు ఒక్క సెల్ఫీ కూడా వాళ్లతో దిగినట్టు పోస్ట్ చేయలేదు నిధి అగర్వాల్.

దీనికి సంబంధించి ఆసక్తికర ప్రకటన చేసింది నిధి అగర్వాల్. పవన్ తో నిన్ననే ఆమె సెల్ఫీ దిగిందంట. మంచి టైమ్ చూసి ఆ సెల్ఫీ పోస్ట్ చేస్తానని చెబుతోంది. ఇక ప్రభాస్ తో మాత్రం సెల్ఫీ పెండింగ్ లో ఉందని తెలిపింది.

ప్రభాస్ తో సెల్ఫీ దిగి చాలా రోజులైందని, త్వరలోనే ఓ సెల్ఫీ దిగి పోస్ట్ చేస్తానని ప్రకటించింది. ప్రభాస్ ను అంతా ఎందుకు డార్లింగ్ అని పిలుస్తారో, అతడితో వర్క్ చేసిన తర్వాత తెలిసిందని, ప్రభాస్ మనసు నిజంగా బంగారం అని అంటోంది నిధి అగర్వాల్.