తెలుగు సినిమా.. నిర్వేదాలు, నిట్టూర్పులే!

ఎప్పుడో రెండు మూడేళ్ల‌కు ఒక చిన్న సినిమా మెరుస్తుంది! ఒక పెద్ద హీరోలు పొదుపుగా రెండు మూడేళ్ల‌కు ఒక రొటీన్ సినిమాతో వ‌స్తారు. త‌మ ఫ్యాన్స్ అన్నాళ్లూ కూడ‌బెట్టుకున్న సొమ్ముతో వీళ్లు క‌లెక్ష‌న్ల లెక్క‌లు చెబుతారు! అన్ని వంద‌ల కోట్లు, ఇన్ని వంద‌ల కోట్లు అంటూ ప్ర‌క‌ట‌న‌లు వ‌స్తాయి. తీరా చూస్తే ఏరియాల వారీగా న‌ష్టాలు అనే మాట వినిపిస్తుంది! సినిమా హిట్టో, ఫ‌ట్టో అర్థం కాని స్థితిలో వార్త‌ల నుంచి తెర‌మ‌రుగు అవుతుంది. ఇప్పుడు తెలుగు సినిమా ఓటీటీలో కూడా వెల‌వెల‌బోతోంది!

ఇప్ప‌టికే థియేట‌ర్లో ఎంత‌టి స్టారుడి సినిమా అయినా వారానికి మించి ఊసులో ఉండ‌టం లేదు. ఆ వారం రోజుల్లో భారీ టికెట్ల ధ‌ర‌కు భ‌య‌ప‌డి చాలా మంది సినిమా థియేట‌ర్ల‌కు దూరం అయ్యారు. మ‌రి కొంద‌రు ప్రేక్ష‌కులు ఈ రొటీన్ రొట్ట కొట్టుడు సినిమాల‌కు భ‌య‌ప‌డి థియేట‌ర్ల‌కు దూరం అయ్యారు! ఇప్పుడు ఆ వారం అయినా థియేట‌ర్ల వ‌ద్ద హ‌డావుడి చేస్తోంది వీరాభిమానులు! చిన్న చిన్న ప‌ల్లెల్లో కూడా హీరోల అభిమాన సంఘాలు వెలిశాయి.

ఐదొంద‌ల జ‌నాభా ఉన్న ఊర్లో కూడా ఒక సంఘం, దానికో సెక్ర‌ట‌రీ, స‌భ్యులందరికీ త‌లా ఒక హోదా! సినిమా విడుద‌ల తేదీ నాడు థియేట‌ర్ మీద ఒక ఫ్లెక్సీ! గ‌తంలో బ్యాన‌ర్లు క‌ట్టుకునే వాళ్లు, ఇప్పుడు ఫ్లెక్సీలు క‌ట్టుకుంటున్నారు. అభిమాన సంఘాల సంస్కృతి మాత్రం తెలుగునాట కొన‌సాగుతూ ఉంది. త‌రాలు మారుతున్నా.. అభిమాన సంఘాలు కూడా వార‌స‌త్వంగా కొన‌సాగుతూ ఉన్నాయి. ఇంత‌కీ సినిమా ఎలా ఉంది అంటే మాత్రం! నిర్వేదాలు, నిట్టూర్పులే!

పెద్ద హీరోల సినిమాలు గ‌తంలో టాక్ తో నిమిత్తం లేకుండా ఫ్యామిలీ ఆడియ‌న్స్ ను అయినా థియేట‌ర్ల‌కు ర‌ప్పించ‌గ‌లిగేవి. అయితే క్ర‌మంగా ఆ వాటా కూడా త‌గ్గిపోతూ ఉంది. దీనికి అనేక కార‌ణాలు, అందులో ఒక‌టి టికెట్ల ధ‌ర‌లు అని ప‌దే ప‌దే చాలా మంది చెబుతూ ఉన్నారు. న‌గ‌రాల్లో మ‌రీ ఊసుపోక సినిమాల‌కు వెళ్లే వాళ్లే త‌ప్ప‌, లేదంటే సినిమా సూప‌ర్ గా ఉందంటే వెళ్లే వాళ్లే త‌ప్ప .. ఓ పెద్ద హీరో సినిమా కాబ‌ట్టి అదెలా ఉన్నా చూడొచ్చు అనే భావ‌న కంప్లీట్ గా మిస్ అవుతూ ఉంది.

గ‌తంలో యావ‌రేజ్ అనిపించుకున్న సినిమాలు ఓ మోస్త‌రు టౌన్ల‌లో యాభై రోజులు ఆడేవి! అప్ప‌టితో పోలిస్తే ఇప్పుడు జ‌నాభా మ‌రింత పెరిగింది, ప్ర‌జ‌ల వ‌ద్ద ఆర్థిక శ‌క్తీ పెరిగింది. ఓ మోస్త‌రు టౌన్ల‌లో వంద‌, నూటాయాభై రూపాయ‌ల టికెట్ అనుకున్నా పెద్ద‌ది కాద‌నే అనుకున్నా.. థియేట‌ర్ల ముందు క్యూలు క‌న‌ప‌డ‌కుండా పోయాయి! క‌రోనా త‌ర్వాత తిరిగి ప్రేక్ష‌కుల‌ను థియేట‌ర్ల‌కు ర‌ప్పిస్తున్నామ‌ని చెప్పుకోవ‌చ్చు ఇండ‌స్ట్రీ.

అయితే ప్రేక్ష‌కులు ఏమీ పంతం క‌ట్టుకోలేదు. సినిమా బాగుందంటే వ‌చ్చే వాళ్లు చాలా మందే ఉన్నారు. అయితే ఎటొచ్చీ బాగుంద‌ని అనిపించుకునే సినిమాల వాటా బాగా త‌గ్గిపోతూ ఉంది. మంచి టాక్ పొంది థియేట‌ర్ల‌కు ప్రేక్ష‌కుల‌ను ర‌ప్పించ‌డం అనేది కేవ‌లం చిన్న సినిమాల బాధ్య‌తే త‌ప్ప పెద్ద సినిమాలు తీస్తోంది అందుకు కాదు అనే భావ‌న అటు నిర్మాత‌ల్లోనూ, ద‌ర్శ‌కుల్లోనూ, హీరోల‌కూ బాగా ఒంట‌బ‌ట్టిన‌ట్టుగా ఉంది.

పెద్ద హీరో సినిమా అంటే భారీత‌నం ఉండాలి, మాస్ మ‌సాలా ఉండాలి, ఐటం భామ లాంటి హీరోయిన్ ఉండాలి, అదిరిపోయే బీజీఎం ఉండాలి, అద‌ర‌గొట్టే ఫైట్లు ఉండాలి! అయితే వీట‌న్నింటి మ‌ధ్య‌న ఉండే క‌థ మాత్రం ప‌ర‌మ రొటీన్ గా, ప‌సిపిల్లాడు కూడా ఊహించ‌గ‌లిగేలా ఉండాలి! అస‌లు ఈ మ‌ధ్య అయితే ట్రైల‌ర్లు చూసి.. క‌థ‌ను చెప్పేసుకుంటున్నారు యూట్యూబ్ లో! ట్రైల‌ర్ చూసి సినిమాకు రివ్యూ ఇవ్వడం అన్యాయ‌మే కావొచ్చు, అయితే అలాంటి అవ‌కాశాన్ని ఇస్తున్నది మాత్రం నిస్సందేహంగా సినీ ప‌రిశ్ర‌మే!

క‌నీసం నెల‌కు ఒక మంచి సినిమాను, ప్రేక్ష‌కుడి చూపు స్క్రీన్ మీదే నిల‌ప‌గ‌లిగే సినిమాను వ‌దులుతోంది మ‌ల‌యాళ చిత్ర ప‌రిశ్ర‌మ‌. అయితే తెలుగులో మాత్రం ఒక సినిమా హిట్ అని చెప్పుకోవాలంటే చాలా క‌ష్ట‌ప‌డాలి. చాలా లెక్క‌లు ఒప్ప‌జెప్పాలి.

ఎంత‌సేపూ ఈ క‌లెక్ష‌న్ల లెక్క‌ల‌తో సినిమాల జ‌యాప‌జ‌యాల వాద‌న‌లే కానీ, క‌నీసం ఓటీటీలో అయినా ఆస‌క్తిదాయ‌కంగా చూసేంత ఆస‌క్తిని పెంపొందిస్తున్న సినిమాల సంఖ్య రోజురోజుకూ త‌గ్గిపోతోంది టాలీవుడ్ నుంచి! ఓటీటీ స‌బ్ స్క్రిప్ష‌న్ కు ఎలాగూ డ‌బ్బులు క‌ట్టేసి ఉంటాం, అయితే అక్క‌డ అయినా తెలుగు సినిమాలు చూసే ప‌రిస్థితి ఎంత ఉందో టాలీవుడ్ స‌మీక్షించుకుంటే విస్మ‌య‌మే క‌లుగుతుంది.

ఓటీటీలో కూడా తెలుగు ప్రేక్ష‌కులు తెలుగు సినిమాల‌కు మించి అనువాద సినిమాల‌ను, ఇత‌ర భాష‌ల సినిమాల‌నే వీక్షిస్తూ ఉన్నారు! తెలుగు ప్రేక్ష‌కుల‌ను టార్గెట్ గా చేసుకుని ఇత‌ర భాష‌ల సినిమాల‌ను పెద్ద ఎత్తున అనువ‌దించి లేదా డైరెక్టుగా వ‌దులుతున్నారు ఓటీటీ సంస్థ‌ల వాళ్లు. ఇది ఎంత వ‌ర‌కూ వ‌చ్చిందంటే.. ఇప్పుడు తెలుగు సినిమాను కొన‌డానికి ఓటీటీ సంస్థ‌లు పెద్ద ఆస‌క్తి చూప‌నంత వ‌ర‌కూ వ‌చ్చింది.

గ‌త ఏడాది కాలంలో ఓటీటీల్లో అద‌ర‌గొట్టిన తెలుగు సినిమాల సంఖ్య కూడా త‌క్కువే! మంగ‌ళ‌వారం వంటి కొన్ని సినిమాలు మాత్ర‌మే అక్క‌డ మంచి వ్యూస్ ను పొందిన‌ట్టుగా గ‌ణాంకాలు చెబుతున్నాయి. అదే మ‌ల‌యాళ‌, త‌మిళ సినిమాల విష‌యానికి వ‌స్తే పెద్ద పెద్ద జాబితాలు క‌నిపిస్తాయి. త‌మిళ సినిమా మ‌హరాజా రికార్డు వ్యూస్ ను పొందింది.

ఇక ఓటీటీల్లో మ‌ల‌యాళ సినిమాలు క్రేజ్ వేరే! ఆ మ‌హ‌రాజా సినిమా ఏమైనా అద్భుత‌మా అంటే, కొరియ‌న్ సినిమా ఓల్డ్ బాయ్ ఇన్ స్పిరేష‌న్ తో ఒక క‌థ అల్లుకున్నారంతే! అలాంటి ప్ర‌య‌త్నాలు కూడా తెలుగు వైపు నుంచి క‌నిపించ‌డం లేదు. ప‌రిస్థితి ఇలానే కొన‌సాగితే, టాలీవుడ్ ఉనికే మ‌రింత కుంచించుకుపోయే అవ‌కాశాలున్నాయి.