టాలీవుడ్ దీపావళి స్పెషల్స్

ఈ దీపావళికి టాలీవుడ్ నుంచి చాలా అప్ డేట్స్ వచ్చాయి. పుష్ప-2 నుంచి దీపావళి పోస్టర్ వచ్చింది. అల్లు అర్జున్, రష్మిక ఉన్న రొమాంటిక్ పోస్టర్ ను వదిలారు. అంతేకాదు, ఈ 5వ తేదీ నుంచి యూఎస్ఏలో అడ్వాన్స్ బుకింగ్స్ మొదలుకాబోతున్నట్టు కూడా ప్రకటించారు.

మట్కా నుంచి కూడా అప్ డేట్ వచ్చింది. ఈ సినిమా టీజర్ ఇప్పటికే రిలీజ్ కాగా.. 2వ తేదీన ట్రయిలర్ ను విడుదల చేయబోతున్నట్టు ప్రకటించారు. ఈ సినిమా కచ్చితంగా హిట్టవుతుంది, ఇది నా ప్రామిస్ అంటున్నాడు వరుణ్ తేజ్. నవంబర్ 14న మట్కా థియేటర్లలోకి వస్తోంది.

వెంకటేశ్, అనీల్ రావిపూడి సినిమా అప్ డేట్ కూడా వచ్చేసింది. దిల్ రాజు నిర్మిస్తున్న ఈ సినిమా నుంచి రేపు టైటిల్, ఫస్ట్ లుక్ విడుదల చేయబోతున్నారు. ఈ సినిమా సంక్రాంతికి వస్తుందని వెంకీ, రావిపూడి చెబుతున్నారు. రేపు దిల్ రాజు చెబుతాడేమో చూడాలి.

తను నటిస్తూ నిర్మిస్తున్న కన్నప్ప సినిమా నుంచి మరో పోస్టర్ రిలీజ్ చేశాడు మంచు విష్ణు. ఈ సినిమా నుంచి మినిమం గ్యాప్స్ లో పోస్టర్లు వస్తున్నాయి కానీ ఆశించిన స్థాయిలో బజ్ రావడం లేదు. ఇప్పుడు వారియల్ లుక్ లో ఉన్న కన్నప్ప స్టిల్ ను రిలీజ్ చేశాడు విష్ణు. అందరికీ దీపావళి శుభాకాంక్షలు అందించాడు.

దీపావళి సందర్భంగా స్పిరిట్ మూవీ నుంచి కూడా క్రేజీ అప్ డేట్ ఇచ్చాడు సందీప్ రెడ్డి వంగ. ప్రభాస్ తో చేయబోయే సినిమాకు సంబంధించి ప్రస్తుతం ప్రీ-ప్రొడక్షన్ పనిలో బిజీగా ఉన్న ఈ దర్శకుడు.. ఈరోజు సంగీత దర్శకుడు హర్షవర్థన్ రామేశ్వర్ తో కలిసి మ్యూజిక్ సిట్టింగ్స్ మొదలుపెట్టాడు. దీనికి సంబంధించిన వీడియోను కూడా షేర్ చేశాడు.

ఈ సినిమాలతో పాటు.. రోటీ కపడా రొమాన్స్, ఓదెల-2, రాబిన్ హుడ్, హిట్-3, మెకానిక్ రాకీ లాంటి సినిమాల నుంచి కూడా దీపావళి శుభాకాంక్షలు చెబుతూ అప్ డేట్స్ ఇచ్చారు.