మట్కా.. ఓ రింగ్ మాస్టర్ స్టోరీ

వరుణ్ తేజ్ లేటెస్ట్ సినిమా మట్కా. ఈ సినిమా ట్రయిలర్ విడుదలయింది. వైజాగ్ లో ఒకప్పుటి మట్కా కింగ్ స్టోరీని బేస్ చేసుకుని తయారు చేస్తున్న సినిమా. కరుణకుమార్ దర్శకుడు. ట్రయిలర్ ను పెర్ ఫెక్ట్ గా కట్ చేసారు. ఓ గ్యాంగ్ స్టర్ గా, మట్కాకింగ్ గా ఎదిగిన వాడి బయోపిక్ అన్నట్లుగా వుంది ట్రయిలర్. వింటేజ్‌ ఫీల్ మాత్రమే కాకుండా, వరుణ్ తేజ్‌ గెటప్ లు, మంచి పవర్ ఫుల్ డైలాగులు ట్రయిలర్ లో పడ్డాయి.

లైన్ గా చూసుకుంటే కింద నుంచి పైకి చీకటి సామ్రాజ్యంలో ఎదిగిన వాడి కథ. అందువల్ల దాని గురించి కొత్తగా చెప్పుకోవడానికి ఏమీ లేదు. కానీ కొత్తగా ఎలా చూపించారు అన్నదే పాయింట్. వింటేజ్‌ ఫీల్ తో పాటు, వరుణ్ తేజ్‌ గెటప్ లు స్టేజ్‌ స్టేజ్‌కు మారుతూ రావడం, దానికి తగినట్లే ఎమోషనల్ కంటెంట్ కలిసి సినిమా మీద అసక్తి జ‌నరేట్ చేసేలా ట్రయిలర్ ను కట్ చేసాయి.

కరుణ్ కుమార్ కు మంచి పవర్ ఫుల్ డైలాగులు రాసే పెన్ వుంది. పలాస, శ్రీదేవి సోడా సెంటర్ సినిమాలు రూటెడ్ ఎమోషన్ యాక్షన్ తో కూడి వుంటాయి. మట్కా సినిమా వాటికన్నా మరో మెట్టు ఎక్కింది డైలాగుల విషయంలో. వరుణ్ తేజ్ కూడా కొత్తగా వున్నాడు. ఏదో చేయాలి. ఏదో చూపించాలి అనే తపన కనిపించింది అతనిలో. విజ‌యేందర్ రెడ్డి నిర్మించిన ఈ సినిమా ఈ నెల 14న థియేటర్లలోకి వస్తోంది.