థగ్ లైఫ్ టీజర్.. అసలు మేటర్ సస్పెన్స్

‘నాయకుడు’ లాంటి కల్ట్ క్లాసిక్ సినిమా తర్వాత కమల్ హాసన్, మణిరత్నం కలిసి ఓ సినిమా చేస్తున్నారంటే, ఆ మూవీపై అంచనాలు ఏ స్థాయిలో ఉంటాయో అర్థం చేసుకోవచ్చు. కమల్ హాసన్ ఫస్ట్ లుక్ రిలీజైన తర్వాత, ఆ అంచనాలు మరింత పెరిగాయి.

అయితే దశాబ్దాల తర్వాత వీళ్లిద్దరూ కలిసి చేస్తున్న ఈ ప్రాజెక్టులో కొత్తదనం ఏంటనే విషయం మాత్రం బయటకురాలేదు. ఈరోజు రిలీజైన టీజర్ లో కూడా అదే సస్పెన్స్.

‘థగ్ లైఫ్’ టీజర్ వచ్చింది. కమల్ హాసన్ ను మరోసారి యాక్షన్ మోడ్ లో చూపించింది. విక్రమ్ తర్వాత కమల్ నటిస్తున్న ఫుల్ లెంగ్త్ యాక్షన్ సినిమాగా థగ్ లైఫ్ కనిపిస్తోంది. ఇంతవరకు బాగానే ఉంది కానీ, అసలు మణిరత్నం-కమల్ కలిసి సినిమా చేసేంత కొత్త పాయింట్ ఇందులో ఏముందనేది టీజర్ లో కనిపించలేదు.

టీజర్ లో కమల్ హాసన్ లుక్స్ బాగున్నాయి. చివర్లో శింబును చూపించడం కూడా బాగుంది. ఏఆర్ రెహ్మాన్ బ్యాక్ గ్రౌండ్ స్కోర్ తప్ప, టీజర్ లో ఎలాంటి డైలాగ్స్ పెట్టలేదు.

టీజర్ తో పాటు సినిమా రిలీజ్ డేట్ కూడా ఎనౌన్స్ చేశారు. ‘థగ్ లైఫ్’ చిత్రాన్ని వచ్చే ఏడాది జూన్ 5న విడుదల చేయబోతున్నారు. త్రిష, అశోక్ సెల్వన్, ఐశ్వర్య లక్ష్మి, జోజూ జార్జ్, నాజర్ లాంటి భారీ తారాగణం నటిస్తున్న ఈ సినిమాను కమల్ హాసన్, మణిరత్నం కలిసి సంయుక్తంగా నిర్మిస్తున్నారు.