నెల్లూరు సెంట్ర‌ల్ జైలు నుంచి పిన్నెల్లి విడుద‌ల‌

రెండు కేసుల నుంచి మాజీ ఎమ్మెల్యే పిన్నెల్లి రామ‌కృష్ణారెడ్డికి ఎట్టకేల‌కు విముక్తి ల‌భించింది. 58 రోజుల త‌ర్వాత నెల్లూరు సెంట్ర‌ల్ జైలు నుంచి పిన్నెల్లి విడుద‌ల‌య్యారు. రెంట‌చింత‌ల‌, కారంపూడిలో న‌మోదైన కేసుల్లో పిన్నెల్లిని పోలీసులు అరెస్ట్ చేశారు. నెల్లూరు సెంట్ర‌ల్ జైల్లో పిన్నెల్లి ఉన్నారు. ఆయ‌న్ను ప‌రామ‌ర్శించ‌డానికి మాజీ ముఖ్య‌మంత్రి వైఎస్ జ‌గ‌న్‌మోహ‌న్‌రెడ్డి వెళ్లిన సంగ‌తి తెలిసిందే.

ఏపీ హైకోర్టు పిన్నెల్లికి శుక్ర‌వారం బెయిల్ మంజూరు చేసింది. అయితే బెయిల్ ప‌త్రాల్ని శ‌నివారం పిన్నెల్లి న్యాయ‌వాదులు నెల్లూరు జైలు అధికారుల‌కు అందించారు. అనంత‌రం ఆయ‌న్ను విడుద‌ల చేశారు. పిన్నెల్లికి జైలు బ‌య‌ట మాజీ మంత్రులు కాకాణి గోవ‌ర్ధ‌న్‌రెడ్డి, అనిల్‌కుమార్ యాద‌వ్ స్వాగ‌తం ప‌లికారు. వెంట‌నే పిన్నెల్లి వెళ్లిపోయారు.

అనంత‌రం కాకాణి గోవ‌ర్ధ‌న్‌రెడ్డి మీడియాతో మాట్లాడుతూ చంద్ర‌బాబు స‌ర్కార్‌పై రెచ్చిపోయారు. చంద్ర‌బాబు మాట‌లు విని అధికారులు బ‌లి ప‌శువులు కావ‌ద్ద‌న్నారు. అప్ర‌మ‌త్తంగా వ్య‌వ‌హ‌రించాల‌ని కోరారు. న్యాయ‌బ‌ద్ధంగా, చ‌ట్ట‌బ‌ద్ధంగా అధికారులు వ్య‌వ‌హ‌రించాలని సూచించారు. చంద్ర‌బాబు మాట‌లు విని ఆయ‌న కూలీలుగా మారి, ఇష్టానుసారం వ్య‌వ‌హ‌రిస్తే భారీ మూల్యం చెల్లించాల్సి వుంటుంద‌ని కాకాణి హెచ్చ‌రించారు.

చంద్ర‌బాబు, ఆయ‌న కుమారుడు లోకేశ్‌ హైద‌రాబాద్ చేరుకుంటారన్నారు. కానీ ఐపీఎస్ అధికారులు 62 ఏళ్లు వ‌చ్చే వ‌ర‌కూ ఏపీలోనే వుండాల్సి వ‌స్తుంద‌న్నారు. ఉద్యోగ ధ‌ర్మం త‌ప్ప‌, బాబు ఆదేశాలు ముఖ్యం కాద‌ని ఆయ‌న అన్నారు. అన్యాయ‌యంగా వ్య‌వ‌హ‌రించే అధికారులు రిటైర్డ్ అయిన త‌ర్వాత కూడా విడిచి పెట్ట‌మ‌ని ఆయ‌న హెచ్చ‌రించారు. ఛీఛీ ఇలాంటి వాన్ని ఎందుకు ఎన్నుకున్నామా? అని ప్ర‌జ‌లు చంద్ర‌బాబు గురించి అనుకుంటున్నార‌ని ఆయ‌న అన్నారు. కేసులు, జైలుకు భ‌య‌ప‌డేది లేద‌ని ఆయ‌న హెచ్చ‌రించారు. మ‌నో ధైర్యం త‌మ‌కుంద‌ని ఆయ‌న అన్నారు.