పాక్ నుంచి ఇస్లామిక్ దేశాల‌కు బిచ్చ‌గాళ్ల బెడ‌ద‌!

పాక్ నుంచి త‌మ దేశాల‌కు వ‌చ్చే బిచ్చ‌గాళ్లు త‌ల‌నొప్పిగా మారుతున్నార‌ని వాపోతున్నాయి ఇస్లామిక్ దేశాలు. ముస్లిం మ‌త ప‌విత్ర ప్ర‌దేశాల‌ను ద‌ర్శించ‌డానికి అంటూ పాక్ నుంచి వ‌స్తూ చాలా మంది తిరిగి వెళ్ల‌డం లేద‌ట‌! వాళ్లు అక్క‌డే అడుక్కుతింటూ కాలం గ‌డుపుతున్నార‌ట‌! పాకిస్తాన్ లో లైఫ్ క‌న్నా, ఇలా బెగ్గింగ్ చేసుకుంటూ బ‌త‌క‌డ‌మే వారికి సౌల‌భ్యంగా ఉన్న‌ట్టుంది. ఇది ఎంత వ‌ర‌కూ వెళ్లిందంటే.. ఈ మ‌ధ్య‌కాలంలో పాక్ దౌత్య వేత్త‌ల‌కు ఇత‌ర ఇస్లామిక్ దేశాల నుంచి ఈ విష‌యంలో హెచ్చ‌రిక‌లు వ‌స్తున్నాయ‌ట‌!

ప‌క్క దేశాల‌కు టెర్ర‌రిస్టుల‌ను ఎగుమ‌తి చేస్తుంద‌నే పేరుంది పాకిస్తాన్ కు. అయితే త‌ను ఎగుమ‌తి చేసేది వినాశ‌నాల‌ను సృష్టించే టెర్ర‌రిస్టుల‌నే కాద‌ని, బెగ్గ‌ర్ల‌ను కూడా అని పాక్ ఇలా రుజువు చేసుకుంటూ ఉంది. సౌదీ అరేబియా అయితే బిచ్చ‌గాళ్ల‌ను కంట్రోల్ చేయండంటూ పాకిస్తాన్ దౌత్య‌వేత్త‌ల‌కు హెచ్చ‌రిక జారీ చేసింది. మ‌క్కా యాత్ర‌కు అంటూ పాక్ నుంచి వీసాల‌కు అప్లై చేసుకునే వాళ్ల‌లో, తిరిగి వెళ్లిపోకుండా అక్క‌డే బెగ్గింగ్ చేసుకుంటూ ఉన్నార‌ట‌! ఇలాంటి వారి తాకిడి ఎక్కువ‌య్యే స‌రికి హ‌జ్ యాత్ర‌కంటూ ఇక‌పై పాక్ నుంచి వ‌చ్చే ద‌ర‌ఖాస్తుల విష‌యంలో తాము పున‌రాలోచించుకోవాల్సి వ‌స్తుందంటూ సౌదీ మంత్రి పాక్ ను హెచ్చ‌రించిన‌ట్టుగా వార్త‌లు వ‌స్తున్నాయి!

ఇటీవ‌ల అక్క‌డ బిచ్చ‌గాళ్లను గుర్తించి, అదుపులోకి తీసుకుని ప్ర‌శ్నించ‌గా వారిలో 90 శాతం మంది పాకిస్తానీయుల‌ని తేలింద‌ట‌! దీంతో హ‌జ్ యాత్ర‌కంటూ పాక్ నుంచి వ‌చ్చే అప్లికేష‌న్ల విష‌యంలో ఆలోచించుకోవాల‌నే ఉద్దేశ్యంతో ఉన్న‌ట్టుగా సౌదీ ప్ర‌క‌టించింది. కేవ‌లం సౌదీ అరేబియాలోనే కాద‌ట‌, పాక్ నుంచి వెళ్లి బెగ్గింగ్ చేసుకునే వాళ్లు ఇత‌ర ఇస్లామిక్ దేశాల‌ను కూడా టార్గెట్ గా చేసుకున్నార‌ట‌! యూఏఈలో కూడా వీరి సంఖ్య ఎక్కువ‌గానే ఉంద‌ట‌. పాక్ నుంచి ఏదోలా అక్క‌డ‌కు చేరుకుని అడుక్కు తినే వాళ్లు ఎక్కువ‌వుతున్నార‌ట‌! ఆఖ‌రికి వీరు ఇరాన్ వ‌ర‌కూ కూడా వెళ్తున్నార‌ట‌!

పాకిస్తాన్ ఆర్థిక ప‌రిస్థితి ద‌య‌నీయాంగా ఉంద‌నే వార్త‌లు రెండేళ్ల నుంచి వ‌స్తూనే ఉన్నాయి. సైన్యాన్ని మేప‌డానికి పాక్ వ‌ద్ద నిధుల కొర‌త లేదు కానీ, మిగ‌తా విష‌యాల్లో ప‌రిస్థితి దారుణంగా ఉంద‌నే విశ్లేష‌ణ‌లున్నాయి. డాల‌ర్ తో పాక్ రూపీ మార‌కం విలువ దారుణంగా ప‌త‌నం అయ్యింది. నిత్య‌వ‌స‌ర స‌రుకుల ధ‌ర‌లు పతాక స్థాయికి చేరిన‌ట్టుగా, దానికి తోడు ఆ మ‌ధ్య వ‌ర‌ద‌లతో పంట న‌ష్టాలు జ‌రిగి గోధుమ పిండి కూడా దొరికే ప‌రిస్థితి లేకుండా పోయి, ఆటా కోసం దారిదోపిడీలు జ‌రిగినంత ప‌నులు జ‌రిగాయి! పాక్ ఆర్థిక ప‌రిస్థితి దివాళా ద‌శ‌లో ఉంద‌ని, ఏదో తిమ్మిని బ‌మ్మిని చేసి పాల‌కులు ప్ర‌స్తుతానికి బండి లాగిస్తున్నార‌నే వార్త‌లూ వ‌చ్చాయి.

ఇలాంటి నేప‌థ్యంలో పాక్ లో జీవ‌నం భ‌యాన‌కంగా మారిన‌ట్టుగా ఉంది. ఆస్తులున్న వారు వాటిని అమ్మేసుకుని ఏదోలా దేశం మార‌డం పాక్ లో కొత్త కాదు. ద‌శాబ్దాల నుంచి ది జ‌రుగుతున్న‌దే. ఆస్తులున్న వారే కాదు, బిచ్చ‌గాళ్లు కూడా ఇప్పుడు పాక్ లో క‌న్నా ఎలాగోలా పొరుగుదేశాల‌కు వెళ్లి అడుక్కుతిన‌డం మేల‌నే ప్ర‌య‌త్నాల‌తో ఆ దేశాన్ని వార్త‌ల్లో నిలుపుతూ ఉండ‌టం గ‌మ‌నార్హం!