సోనియా జీవిత పాఠం

పిల్లల పాఠ్యాంశాలలో ‘సోనియా జీవిత చరిత్ర’. ఒక కాంగ్రెస్ నాయకుని గొంతెమ్మ కోరిక!

ఒకవేళ ఆ చరిత్ర రాయమంటే వాళ్ళు ఎలా రాస్తారు? ఇదిగో ఇలా !

బాలలూ! సోనియా 1946 December-9 న ప్రపంచానికే మాఫియా రాజధాని అయినా ఇటలీలో జన్మించింది. ప్రపంచంలో మహా పురుషులు లేక పురుషిణులు జన్మించినప్పుడు ఏం జరుగుతుందో మీకందరికీ తెలుసు! ఆకాశంలో ఒక నక్షత్రం దేదీప్యమానంగా వెలుగుతూ కనబడుతుంది.

అలాగే సోనియా పుట్టినప్పుడు కూడా ఆకాశంలో ఒక నక్షత్రం అధ్బుతమైన వెలుగులు విరజిమ్ముతూ భారతదేశంలో కాంగ్రెస్ వారందిరికీ కనిపించింది. (ఎందుకనోమరి ఇటలీలోగాని మన దేశంలోగానీ మిగతా ప్రజలెవరికీ అది కనిపించలేదు ) అదే సమయంలో ఆకాశవాణి రీసౌన్డింగ్ ఎఫెక్ట్‌తో ఇలా పలికింది.

దిక్కు మొక్కూ లేక, కోట్లకొద్దీ డబ్బు సంపాదించే అవకాశాలు దొరక్క  అలమటించి పోతోన్న భావి భారత కాంగ్రెస్ వాదులారా! మీ పంట పండింది. మిమ్మల్ని పరిపాలించే మహారాణి ఉధ్బవించింది.. ఆమె వల్ల భారత దేశ కీర్తి ఇనుమడిస్తుంది. ఇంకా చూస్తారేంట్రా.. పండగలు చేసుకోండి.

దాంతో కాంగ్రెస్ వాళ్ళంతా  పండగలు చేసుకున్నారు. కాంగ్రెస్ మహా జ్యోతిష్యులు కొంతమంది ఆమె జాతకమంతా స్టడీ చేసి ఆమె వల్లే భారతదేశం కీర్తి ప్రతిష్టలు ప్రపంచమంతా వ్యాపిస్తాయ్.. కాంగ్రెస్ వారి స్టార్ తిరుగుతుంది. అని జోస్యం చెప్పారు. 

ఆ దేవత ఎప్పుడు భారతదేశం వస్తుందా అని వేయి కళ్ళతో ఎదురు చూడసాగారు. త్వరగా రావాలని యజ్ఞాలు పూజలు చేయసాగారు.

ఆ యజ్ఞాలతో దేవలోకం దద్దరిల్లి పోయింది. పార్వతి వెంటనే మహా శివుడి దగ్గరకు పరుగుతో వచ్చింది. స్వామీ! ఆ గొడవ ఏమిటి? అనడిగింది. 

వెంటనే శివుడు తన దివ్య దృష్టితో చూసాడు.

మరేంలేదు పార్వతీ! వాళ్లదేశానికి సోనియా అనే ఇటలీకి చెందిన మహిళ మహారాణిగా కావాలని ప్రార్ధనలు చేస్తున్నారు.

అదెలా సాధ్యం? విదేశానికి చెందిన మహిళ ఈదేశంలో ఎలా క్వీన్ అవుతుంది?

నిజానికి అది ఆ దేశానికి మంచిది కూడా కాదు. కాని నీకున్న కామన్సెన్స్ వాళ్లకు లేదు.. ఏంచేస్తాం.. అసలు ఎందుకో ఏమిలోపమో తెలీదు గానీ అనాది కాలం నుంచీ కూడా భారతీయులు విదేశీ అన్నాడు.. శివుడు విచారంగా.

పార్వతి జాలి పడింది.

వాళ్ళ కోరిక తీరే మార్గం ఏమైనా ఉందా స్వామీ?

ఒకటే మార్గం.. రాజీవ్ కేంబ్రిడ్జ్ యూనివర్సిటీలో చదువు తున్నప్పుడు అక్కడ సోనియాని కలుసుకునే వీలుంది. వారిద్దరూ పెళ్లి చేసుకుంటే ఆమె భారతదేశానికి మహారాణి అయే అవకాశం ఉంది.        

అయితే ఇంకా ఆలస్యం ఎందుకు స్వామీ. వెంటనే వారికి ఆ వరం ఇచ్చేయండి. అని రికమెండ్ చేసిందామె.

ఆ విధంగా 1968లో వారి వివాహం జరిగింది.

అయినా ఆమె ఇంకా పూర్తిగా మహారాణి అవలేదు. ఇంకెప్పుడు అయుతుందా అని కాంగ్రస్ వారందరూ  ఎదురు చూడసాగారు.

ఈలోగా సొనియా చిన్న నాటి స్నేహితుడు ఒట్టావియో కుత్రోచ్చి భారత దేశాన్ని ముంచేసి బోఫోర్స్ కుంభ కోణంలో కోట్లు నొక్కేసాడు. కాంగ్రెస్ వాళ్ళంతా పరేషాన్ అయిపోయారు. వెంటనే ఆకాశవాణి దగ్గరకు పరుగెత్తారు.

ఆకాసవాణీ.. ఆరోజు మేమంతా కోట్లు సంపాదిస్తా మని పలికావు కదా.. మరి మధ్యలో వాడెవడో ఇటలీ వాడొచ్చి కోట్లు నోక్కేసాడేంటి  అనడిగారు ఏడుస్తూ.

తొందర పడకండిరా.. మీరు అంతకంటే ఎక్కువ కొట్టేసే రోజు లోస్తాయ్. అంది ఆకాశవాణి.    

రాజీవ్ గాంధి హత్యానంతరం 1998లో సోనియా కాంగ్రెస్  అధ్యక్షురాలయింది. 2004లో కాంగ్రస్ గెలవగానే ఆమెను మహారాణిగా చేయాలనుకున్నారు. కాని సుష్మా స్వరాజ్ తన గుండుని అడ్డుగా పెట్టింది. ఆ తరువాత ఆమె యూపీఏ చైర్‌పర్సన్ అయింది. అందుకని భారత దేశానికి సుష్మా గుండుని చూసే అవకాశం మిస్సయింది.

చైర్‌పర్సన్ అయిన కొద్ది రోజులేక  ఆమె ఆస్తి ఆరు రెట్లు పెరిగింది. అంతేకాకుండా ఆమె అల్లుడు కూడా స్కామ్స్‌లో నొక్కేస్తుండే సరికి కాంగ్రస్ వాళ్ళు మళ్ళీ పరేషాన్!  

ఆరోజు ఆకాశవాణి పలికినట్లు తామెవరికీ వేల కోట్లు సంపాదించుకునే అవకాశాలు ఇంకా  దొరక్క పోవడంతో వాళ్ళందరూ ఆమె దగ్గర కెళ్లి కాళ్ళ మీద పడ్డారు.

అమ్మా.. మీరూ మీ అల్లుడే కాకుండా మే మంతా కూడా సంపాదించు కోవాలి.. అనుగ్రహించండి! అంటూ వేడుకున్నారు. ఆమెకు వాళ్ళను చూస్తే జాలేసింది.

పిచ్చివాళ్ళల్లారా.. మీరంతా దోచుకోడానికే కదురా మన్మోహన్‌ని  పీఎం చేసింది? అతను ఆంపశయ్య మీదున్న భీష్ముడి లాంటి వాడు. ఎవరినీ ఏమీ చేయలేడు. కనుక  దున్నుకోండి.. అందామె జాలిగా.

వెంటనే కామన్వెల్త్ గేమ్స్ తోమొదలై టుజీ స్కాం, ఇటాలియన్ చాపర్స్ స్కాం, టట్రా ట్రక్ స్కాం, మనీ ఫర్ సపోర్టింగ్ నో కాన్ఫిడెన్స్ మోషన్ స్కాం, కోల్ గేట్ స్కాం, మైనింగ్ స్కాం, ఆదర్శ్ స్కాం, ఈ విధంగా ఎన్నో రకాల స్కాంలతో భారత దేశం వందేళ్ళ వరకూ కోలుకోలేని విధంగా దోపిడీ జరిగిపోయింది. కేవలం సోనియా వల్లే  భారత దేశం కీర్తి ప్రతిష్టలు ప్రపంచమంతా వ్యాపించాయ్. 

ఆకాశవాణి మళ్ళీ కాంగ్రెస్ వారిని పలుకరించింది.. చూసారా! నా పలుకులు నిజమయాయ్.. భారత దేశ కీర్తి ప్రతిష్టలు దేశ దేశాల్లోనూ మార్మ్రోగి పోతున్నాయ్. అంది ఆనందంగా.  

బాలలూ.. ఈ విధంగా సోనియా యుగాన్ని చరిత్ర కారులు మరో స్వర్ణ యుగంగా అభి వర్ణిస్తున్నారు.  మీ రన్దరూ కూడా సోనియా జీవితాన్నే ఆదర్శంగా తీసుకుని దేశాన్ని సర్వ నాశనం చేసి మీరూ, మీ పార్టీ వాళ్ళు తరతరాలకు తరగని ఆస్తి సంపాదించుకుంటూ సుఖంగా వుంటారు కదూ..?

జైహింద్.!
     
యర్రంశెట్టి సాయి