అనుమానాలకు 'ఇస్మార్ట్'గా తెర

డబుల్ ఇస్మార్ట్.. అన్నీ అనుకున్నట్టు జరిగితే ఈపాటికి ఈ సినిమా థియేటర్లలోకొచ్చి అటుఇటుగా 2 నెలలయ్యేది. కానీ ఇప్పటివరకు షూటింగ్ కూడా పూర్తికాలేదు. ఆర్థిక సమస్యలు ఈ సినిమాను చుట్టుముట్టాయనే ఊహాగానాలు గుప్పుమన్నాయి. దీనికి కొనసాగింపుగా సినిమా షూటింగ్ ఆగిపోయిందని, ముందుకు కదిలే పరిస్థితి లేదంటూ వరుసగా పుకార్లు.

ఎట్టకేలకు ఈ పుకార్లకు తెరపడింది. డబుల్ ఇస్మార్ట్ కొత్త షెడ్యూల్ మొదలైంది. ఫ్రెష్ గా మరోసారి కొబ్బరికాయ కొట్టి మరీ షూటింగ్ స్టార్ట్ చేశారు. ముంబయిలో మొదలైన ఈ షెడ్యూల్ చాలా పెద్దదంటోంది యూనిట్. ఇదే చివరిదని మాత్రం చెప్పడం లేదు.

మొత్తానికి డబుల్ ఇస్మార్ట్ మళ్లీ పట్టాలెక్కింది. ప్రధాన తారాగణంపై ఈ షెడ్యూల్ లో మరిన్ని యాక్షన్ సన్నివేశాలు చిత్రీకరించబోతున్నారు. ఈ షెడ్యూల్ తో మేజర్ పార్ట్ షూట్ పూర్తవుతుందంట. కచ్చితంగా పూర్తవుతుంది, ఎందుకంటే అక్కడున్నది పూరి జగన్నాధ్.

రామ్ హీరోగా నటిస్తున్న ఈ సీక్వెల్ లో సంజయ్ దత్ విలన్ గా కనిపించబోతున్నాడు. మణిశర్మ సంగీతం అందిస్తున్నాడు. త్వరలోనే మరిన్ని అప్ డేట్స్ ఇస్తామన్నారు కానీ సినిమా విడుదల తేదీ మాత్రం చెప్పలేదు. షూట్ కొలిక్కి వచ్చిన తర్వాతే రిలీజ్ డేట్ చెప్పడం బెటరని భావిస్తున్నారు.