జెడ్పీటీసీల్లో టీడీపీకి 71 ఏక‌గ్రీవాలు… జ‌న‌సేన, బీజేపీకి సిగ్గుసిగ్గు!

ప‌రిష‌త్ ఎన్నిక‌ల్లో ఉప సంహ‌ర‌ణ గ‌డువు కూడా ముగియ‌డంతో పోటీపై స్ప‌ష్ట‌త వ‌స్తోంది. ఇప్ప‌టి వ‌ర‌కు 77 జెడ్పీటీసీ స్థానాలు ఏక‌గ్రీవం అయ్యాయి. వీటిలో 76 స్థానాల్ని కూట‌మి, డోన్ నియోజ‌క‌వ‌ర్గంలోని ప్యాపిలిలో వైసీపీ ఏక‌గ్రీవం చేసుకుంది.

కూట‌మిలో మూడు పార్టీలున్నాయి. వీటి లెక్క ఆశ్చ‌ర్యం క‌లిగిస్తోంది. టీడీపీ ఏకంగా 71 స్థానాల్ని ద‌క్కించుకుంది. జ‌న‌సేన మాత్రం 2, బీజేపీ మూడింటితో స‌రిపెట్టుకోవాల్సి వ‌చ్చింది.

ఈ లెక్క‌లు చాలు …బీజేపీ, జ‌న‌సేన సిగ్గు ప‌డ‌డానికి. త‌మ వ‌ల్లే టీడీపీ అధికారంలోకి వ‌చ్చింద‌నే భావ‌న ఇరు పార్టీల్లోనూ బ‌లంగా వుంది. అయితే ఆ విష‌యాన్ని జ‌న‌సేనాని ప‌వ‌న్‌క‌ల్యాణ్ బ‌హిరంగంగా అంటుంటారు.

బీజేపీ నేత‌లు పైకి మాట్లాడ‌రు. తేడా అంతే. త‌మ వ‌ల్లే టీడీపీ అధికారంలో వుందా? లేదా? అనే విష‌యాల్ని ఆ రెండు పార్టీల ముఖ్య నాయ‌కులు కాసేపు ప‌క్క‌న పెట్టాలి.

కూట‌మి ప్ర‌భుత్వంలో టీడీపీది పెద్ద‌న్న పాత్ర‌. ఆ పార్టీ అంత కాక‌పోయినా, భాగ‌స్వామ్య ప‌క్షాలుగా ఎంతోకొంత రాజ‌కీయ ల‌బ్ధి పొంద‌డానికి బీజేపీ, జ‌న‌సేన నేత‌లు ప్ర‌య‌త్నించాలి.

ఏక‌గ్రీవాల లెక్కలు చూస్తే, అలాంటి ప్ర‌య‌త్నాలు ఏ మాత్రం క‌నిపించ‌డం లేదు. టీడీపీ ద‌య‌తో ఏవైనా ఇస్తే , అవే మ‌హాప్ర‌సాదం అని క‌ళ్ల‌క‌ద్దుకుంటున్న‌ట్టుగా వుంది.

క్షేత్ర‌స్థాయిలో జ‌న‌సేన‌, బీజేపీ కార్య‌క‌ర్త‌లు, నాయ‌కులు క‌నీస రాజ‌కీయ ప్ర‌యోజ‌నాలు కూడా పొంద‌లేని ఏక‌గ్రీవాలే తేల్చి చెబుతున్నాయి.

రాష్ట్రంలో 77 జెడ్పీటీసీ స్థానాలు ఏక‌గ్రీవ‌మైతే, అందులో టీడీపీకి ద‌క్కింది 71. జ‌న‌సేన‌కు 2, బీజేపీకి మూడు ఏక‌గ్రీవాలైతే, ఆ పార్టీల‌కు ఎంత మేర‌కు ప్ర‌యోజ‌నాలు అందుతున్నాయో చెప్పుకోడానికి సిగ్గుప‌డుతారేమో!

స్థానిక సంస్థ‌ల ఎన్నిక‌ల్లో జ‌న‌సేన‌, బీజేపీకి క‌నీస స్థాయిలో కూడా సీట్లు ఇవ్వ‌డం లేద‌న్న ప్రచార‌మే నిజ‌మ‌నేందుకు ఇంత కంటే లెక్కలు ఏం కావాలి?

ఈ సంబ‌రానికేనా తాము లేక‌పోతే, చంద్ర‌బాబు సీఎం కాలేర‌నే బ‌డాయి మాట‌ల‌నే సెటైర్స్ నెటిజ‌న్ల నుంచి వ‌స్తున్నాయి.