ఏబీఎన్ నుంచి అల్లుడిని గెంటేసిన ఆర్కే!

సోష‌ల్ మీడియా అంతా ఆంధ్ర‌జ్యోతి-ఏబీఎన్ ఎండీ ఆర్కే త‌న అల్లుడు కోగంటి భార్గ‌వ్‌ను గెంటేయ‌డం గురించి హోరెత్తుతోంది.

ఆర్కే కుటుంబ గొడ‌వ‌ల తేనెతుట్టెను ఆంధ్ర‌జ్యోతి ప‌త్రిక‌, దాని అనుబంధంగా న‌డిచే ఏబీఎన్ చానెల్ క‌దిపాయ‌నే చ‌ర్చ పెద్ద ఎత్తున సాగుతోంది.

మాజీ ముఖ్య‌మంత్రి వైఎస్ జ‌గ‌న్‌మోహ‌న్‌రెడ్డికి చెల్లి ష‌ర్మిల‌కు గొడ‌వ‌లున్న సంగ‌తి తెలిసిందే. ష‌ర్మిల కుమార్తె అంజ‌లి పెళ్లిని య‌ల‌హంక‌లో తాను నివాసం ఉండే ప్రాంతంలో చేయించాల‌ని ష‌ర్మిల అనుకున్నారు.

అయితే భ‌ద్ర‌తా కార‌ణాల రీత్యా ఇంకో చోట వేదిక చూసుకోవాల‌ని ష‌ర్మిల‌కు జ‌గ‌న్ సూచించారు. దీన్ని రాజ‌కీయంగా వాడుకుని, త‌ద్వారా త‌న అన్న‌ను బ‌ద్నాం చేసే క్ర‌మంలో ఆంధ్ర‌జ్యోతి-ఏబీఎన్ మీడియా సంస్థ‌కు ష‌ర్మిల ఉప్పందించార‌నే ప్ర‌చారం జ‌రుగుతోంది.

ఎందుకంటే, గ‌తంలో కూడా త‌మ కుటుంబంలో జ‌రిగిన వివాదాల‌కు సంబంధించిన స‌మాచారాన్ని స‌ద‌రు మీడియాధిప‌తికి అందించి, అందులో రాయించార‌నే ఆరోప‌ణ‌లున్నాయి.

అదే పంథాను మ‌రోసారి త‌న కుమార్తె పెళ్లికి, య‌ల‌హంక‌లోని నివాసాన్ని ఇవ్వ‌డానికి జ‌గ‌న్ అంగీక‌రించ‌లేద‌ని, సొంత అన్న‌ను ఆయ‌నంటే గిట్ట‌ని మీడియాతో ఛీ కొట్టిస్తూ క‌థ‌నాలు రాయించిన‌ట్టు వైసీపీ ఆరోపిస్తోంది.

ఈ నేప‌థ్యంలో భాను కోగంటి అనే వ్య‌క్తి ట్వీట్‌… తీవ్ర దుమారం రేపుతోంది. ఆ ట్వీట్ ఏంటంటే…

“మీడియాలో కొందరు తమ సొంత ఇంట్లో ఏం జరుగుతోందో వదిలేసి, ఇంకోళ్ల ఇళ్ల‌లో దూరి పరిశీలించడంలో బిజీగా ఉన్నారు” అని ట్వీట్ చేశారు. ఈ ట్వీట్‌కు సొంత ఇల్లు, అలాగే మీడియా, ఇత‌ర‌త్రా హ్యాష్‌ట్యాగ్‌ల‌ను జ‌త చేశారు.

ఇప్పుడీ ట్వీట్ పెద్ద ఎత్తున చ‌ర్చ‌కు దారి తీయ‌డానికి ప్ర‌త్యేక కార‌ణం లేక‌పోలేదు. ఆంధ్ర‌జ్యోతి-ఏబీఎన్ మీడియాధిప‌తి వేమూరి రాధాకృష్ణకు స్వ‌యాన భాను కోగంటి అల్లుడు కావ‌డం వ‌ల్లే తీవ్ర చ‌ర్చ‌నీయాంశ‌మైంది.

త‌న ఇంట్లో జ‌రుగుతున్న‌ది వ‌దిలేసి, వైఎస్ జ‌గ‌న్ కుటుంబ విష‌యాల్లో త‌న మామ ఆర్కే త‌ల‌దూర్చార‌నేది భాను కోగంటి త‌న మామ‌కు ప‌రోక్షంగా ఎక్స్ వేదిక‌గా చుర‌క‌లు అంటించార‌ని నెటిజ‌న్లు అభిప్రాయ‌ప‌డుతున్నారు. ఇదే సంద‌ర్భంలో కాస్త లోతుల్లోకి వెళ్లి, ఆర్కే కుటుంబంలో చోటు చేసుకున్న వివాదాల‌ను బ‌య‌ట పెడుతున్నారు.

అల్లుడిని ఏబీఎన్ చానెల్ నుంచి గెంటేసిన‌ట్టు నెటిజ‌న్లు ఆధారాల‌తో స‌హా వెల్ల‌డిస్తుండ‌డం విశేషం. విల‌క్ష‌ణ న‌టుడు మోహ‌న్‌బాబుతో ఒక ఇంటర్వ్యూలో స్వ‌యాన వేమూరి రాధాకృష్ణ త‌న కుమారుడు ఆదిత్య‌కు ఆంధ్ర‌జ్యోతి దిన‌ప‌త్రిక‌ను, కుమార్తె అనూష‌కు ఏబీఎన్ చానెల్‌ను ఇచ్చిన‌ట్టు తేల్చి చెప్పారు.

అప్ప‌టి నుంచి ఆర్కే అల్లుడు నిత్యం ఏబీఎన్ చానెల్‌కు వెళుతూ కార్య‌క్ర‌మాల‌ను ప‌ర్య‌వేక్షించేవారు. అలాగే ఆంధ్ర‌జ్యోతి వెబ్‌సైట్ వ్య‌వ‌హారాల్ని కూడా చూసేవార‌ని అక్క‌డి సిబ్బంది చెబుతున్నారు.

ఇటీవల విజ‌య ద‌శ‌మిని పుర‌స్క‌రించుకుని ఆంధ్ర‌జ్యోతి -ఏబీఎన్ నూత‌న భ‌వ‌నంలోకి కార్యాల‌యాన్ని మార్చారు. ఈ సంద‌ర్భంగా కుటుంబ స‌భ్యుల‌తో తీసుకున్న ఫొటోను ఆంధ్ర‌జ్యోతి ప‌త్రిక‌లో ప్ర‌చురించారు.

ఇందులో ఆర్కేతో కుమారుడు ఆదిత్య‌, కోడ‌లు శ్రుతికీర్తి, కుమార్తె అనూష ఇత‌ర కుటుంబ స‌భ్యులున్నారు. అల్లుడు మాత్రం మిస్ అయ్యారు. తాజాగా అల్లుడు ట్వీట్‌తో ఆర్కే కుటుంబంలోని గొడ‌వ సంగ‌తి బ‌య‌టికొచ్చింది.

ఈ నెల 9న ఆమోద బ్రాడ్‌కాస్టింగ్ బోర్డులో మార్పుల్ని చేశారు. ఇంత‌కాలం మేనేజింగ్ డైరెక్ట‌ర్‌గా వ్య‌వ‌హ‌రించిన వేమూరి రాధాకృష్ణ చైర్మ‌న్‌గా మారారు. అలాగే కుమారుడు ఆదిత్య మేనేజింగ్ డైరెక్ట‌ర్‌గా, కుమార్తె వేమూరి అనూష‌ను జాయింట్ మేనేజింగ్ డైరెక్ట‌ర్‌గా నియమించారు.

ఇంత‌కాలం డైరెక్ట‌ర్ హోదాలో ఉన్న అల్లుడు భాను కోగంటిని త‌ప్పించారు. అల్లుడి స్థానంలో కోడ‌లు శ్రుతికీర్తి డైరెక్ట‌ర్ అయ్యారు.

దీంతో ఏబీఎన్ నుంచి అల్లుడు భాను కోగంటిని గెంటేశారంటూ సోష‌ల్ మీడియా అంతా హోరెత్తుతోంది. ఇత‌రుల కొంప‌ల్లోని వివాదాల గురించి రాసేట‌ప్పుడు, త‌న ఇంట్లో వ్య‌వ‌హారాల్ని చూసుకోవాలంటూ నెటిజ‌న్లు హిత‌వు చెబుతున్నారు. మ‌రీ ముఖ్యంగా ఇలాంటి హిత‌వు అల్లుడి నుంచే ప‌రోక్షంగా మామ ఆర్కేకు రావ‌డంతో తీవ్ర చ‌ర్చ‌నీయాంశ‌మైంది.