ఇక చాలు అంటున్న అయ్యన్న!

తెలుగుదేశం పార్టీ పుట్టాక అందులో ఉమ్మడి విశాఖ జిల్లా నుంచి చేరిన తొలి సీనియర్ నాయకుడు స్పీకర్ చింతకాయల అయ్యన్న పాత్రుడు. ఆయన పాతికేళ్ల వయసులోనే ఎమ్మెల్యే అయిపోయారు. అన్న గారి నుంచి టికెట్ ని అలా అందుకున్న యువకుడు అదే అన్న గారి ప్రభుత్వంలో మంత్రిగా చిన్న వయసులోనే చేపట్టారు.

ఇప్పటికి పదిసార్లు ఎమ్మెల్యేగా పోటీ చేసి ఏడు సార్లు గెలిచారు. ఆరు సార్లు మంత్రిగా పలు కీలక శాఖలను చూసారు. ఒకసారి ఎంపీగా కూడా అనకాపల్లి నుంచి నెగ్గారు. ఉన్నది ఉన్నట్లుగా బోల్డ్ గా మాట్లాడడం అయ్యన్నకు బలం. అదే ఆయనకు కొన్ని సార్లు ఇబ్బందిగా మారింది.

టీడీపీలో తాను చంద్రబాబు కంటే సీనియర్ అని గట్టిగా ప్రకటించడం అయ్యన్నకే చెల్లు అని అంటారు. అయ్యన్నపాత్రుడు ఏడు పదుల వయసుకు చేరువలో ఉన్నారు. అందుకే ఆయన లేటెస్ట్ గా ఒక సంచలన ప్రకటన చేశారు. తాను వచ్చే ఎన్నికల్లో పోటీ చేయను అని ఆయన తన నిర్ణయాన్ని ప్రకటించారు.

తనకు వయసు పెరుగుతోందని తన రాజకీయం ఇక చాలు అని అయ్యన్న చెప్పేశారు. తాను చేసినంత సేవ ఈ అయిదేళ్ళలో చేసి రాజకీయాల నుంచి సెలవు తీసుకుంటాను అని అయ్యన్న చెప్పేశారు. అధికారం ఎపుడూ ఎవరికీ శాశ్వతం కాదని కూడా ఆయన వ్యాఖ్యలు చేశారు. చేసిన మంచి పనులే శాశ్వతం అని ఆయన అంటున్నారు.

అయ్యన్నపాత్రుడు ఈ ఏడాది మేలో జరిగిన ఎన్నికల్లో నర్శీపట్నం నుంచి పదవసారి ఎమ్మెల్యేగా టీడీపీ తరఫున పోటీ చేసి భారీ మెజారిటీని దక్కించుకున్నారు. మంత్రి పదవి వస్తుందని ఆశించారు అని ప్రచారంలో ఉంది. ఆ పదవిలోనే తన రాజకీయ విరమణ చేయాలని అనుకున్నారు. స్పీకర్ పదవి అనుకోకుండా ఆయనను వరించింది.

దాంతో తన నోరు కట్టేసినట్లు అయిందని కూడా అయ్యన్న అప్పట్లో వ్యాఖ్యానించారు. ఇపుడు ఆయన తన రాజకీయ జీవితానికే స్వస్తి అంటున్నారు. బహుశా ఆయన కుమారుడు విజయ్ కి రూట్ క్లియర్ చేయడానికి అయ్యన్న చూస్తున్నారు అని అంటున్నారు. అయ్యన్న రాజకీయ విరమణ నిర్ణయం ప్రకటించడంతో టీడీపీ ఒక సీనియర్ నేతనుని కోల్పోయినట్లే అంటున్నారు