రామ్ చరణ్-జాన్వీ ఫొటోషూట్

త్వరలోనే సెట్స్ పైకి వెళ్లబోతోంది రామ్ చరణ్ కొత్త సినిమా. బుచ్చిబాబు దర్శకత్వంలో ఓ రూరల్ స్పోర్ట్స్ యాక్షన్ డ్రామాలో చరణ్ నటించబోతున్న సంగతి తెలిసిందే. ఇందులో హీరోయిన్ గా జాన్వి కపూర్ ను తీసుకున్న సంగతి కూడా తెలిసిందే.

ఇప్పుడీ ప్రాజెక్టుకు సంబంధించి ప్రిపరేషన్ మొదలైంది. అన్నపూర్ణ స్టుడియోస్ లో జాన్వి కపూర్ పై ఫొటోషూట్ నిర్వహించారు. పల్లెటూరి పిల్ల గెటప్ లో జాన్వీని ముస్తాబుచేసి లుక్ టెస్ట్ నిర్వహించారు. ఈరోజు జాన్వి-రామ్ చరణ్ పై కూడా ఫొటోషూట్ జరిగింది.

ఈనెల 22 నుంచి మైసూర్ లో రామ్ చరణ్, బుచ్చిబాబు సినిమా రెగ్యులర్ షూటింగ్ మొదలవుతుంది. ఓవైపు ఈ సినిమా షూటింగ్ చేస్తూనే, మరోవైపు ‘గేమ్ ఛేంజర్’ ప్రచార కార్యక్రమాల్లో లో పాల్గొంటాడు రామ్ చరణ్.

చరణ్-జాన్వీ కపూర్ సినిమాకు ‘పెద్ది’ అనే టైటిల్ అనుకుంటున్నారు. ఏఆర్ రెహ్మాన్ ఈ సినిమాకు సంగీతం అందిస్తున్నాడు. ఇప్పటికే 3 సాంగ్స్ కంపోజిషన్ పూర్తయింది. మైసూర్ షెడ్యూల్ పూర్తయిన తర్వాత, హైదరాబాద్ శివార్లలో వేసిన సెట్ లో భారీ షెడ్యూల్ మొదలవుతుంది.

10 థియేటర్లలో గేమ్ ఛేంజర్ టీజర్

అటు ‘గేమ్ ఛేంజర్’ టీజర్ లాంచ్ కు ఏర్పాట్లు ముమ్మరంగా సాగుతున్నాయి. తెలుగు రాష్ట్రాల్లోని 10 ప్రధాన కేంద్రాల్లో ఈ సినిమా టీజర్ ను అభిమానుల కోసం ప్రదర్శించాలని నిర్ణయించారు. ముందుగా లక్నోలోని ప్రతిభ థియేటర్ లో టీజర్ ను లాంచ్ చేస్తారు. ఈ కార్యక్రమానికి యూనిట్ మొత్తం హాజరవుతుంది.

అదే టైమ్ లో హైదరాబాద్, వైజాగ్, రాజమండ్రి, విజయవాడ, కర్నూలు, నెల్లూరు, అనంతపురం, తిరుపతి, ఖమ్మంలోని ఎంపిక చేసిన థియేటర్లలో టీజర్ ను ప్రసారం చేస్తారు. అటు బెంగళూరులో కూడా ఓ థియేటర్ లో టీజర్ ను లాంచ్ చేయబోతున్నారు.