Epaper
కళాబంధు టి. సుబ్బరామి రెడ్డికి ప్రచార పటాటోపంపై ఆసక్తి ఎక్కువన్న సంగతి అందరికి తెలిసిందే. ఏదయినా ఆయన విశాఖలోనే చేయాలనుకుంటారు. ఎందుకంటే ఆయనకు విశాఖ ఎంపీ సీటు అంటే ప్రాణం. రాజ్యసభ ఇస్తాం బాబూఅన్నా కూడా, వద్దు తాను విశాఖలో పోటీ చేసి గెలిచే వస్తా అంటారు. ఆయనకు అదో ఆనందం. అందుకే రిటైర్ట్ యాక్టర్లను, సినిమా వాళ్లను, ఈ తరం వాళ్లను వీలయినంతమందిని పోగేసి ఏదో వంకన విశాఖ పట్టుకుపోతూ వుంటారు.
ఈ మధ్యే టీవీ9-టీఎస్ఆర్ అవార్డులు అంటూ ఒక భారీ ఫంక్షన్ చేసారు. అందుకోసం మెగాస్టార్ చిరంజీవి, నాగ్, బాలయ్య, ఇలా చాలా మందిని అక్కడకు తీసుకెళ్లారు. టీఎస్ఆర్ పిలిస్తే ఎవరైనా వెళ్తారు. ఎందుకంటే ఆయన అతిధి మర్యాదలు అలా వుంటాయి. అక్కడ ఫైవ్ స్టార్ అకామిడేషన్, ప్రత్యేకంగా కారు, ఇంకా చాలా చాలా అమర్చుతారు.
ఈసారి ఏకంగా రెండు స్పెషల్ ఫ్లయిట్ లే బుక్ చేసేసారట. కేవలం మెగాస్టార్ చిరంజీవి కోసం ఒకటి, మిగిలిన టాప్ హీరోల కోసం మరొకటి రెండు స్పెషల్ ఫ్లయిట్ లు బుక్ చేసి మరీ వాళ్లను తీసుకువచ్చారట. ఇందుకోసం లక్షల్లో భారీగానే ఖర్చు చేసారట. అవును ఇంతకీ, ఇలా స్పెషల్ ఫ్లయిట్ పెట్టకపోతే టీఎస్ఆర్ మీద అభిమానం వుండదంటారా? మన హీరోలకు?