మనం వెళ్లక్కర్లేదు..అమెరికాయే ఇండియాకి వస్తోంది

అమెరికా వెళ్లడానికి హెచ్1-బి రావట్లేదని దిగులెందుకు? అమెరికాయే ఇండియాకి వచ్చేస్తోంది. ఇది వినడానికి విడ్డూరంగా ఉన్నా, ఒక రకంగా చూస్తే ఇది నిజమే.

అమెరికాలో ఒకవైపు ఉద్యోగాలు అమెరికన్లకే దక్కాలంటూ విదేశీ ఉద్యోగులపై ఆంక్షలు విధించాలనే చర్చ జరుగుతుంటే… మరోవైపు, అమెరికాకే చెందిన భారీ ఇన్వెస్ట్‌మెంట్ కంపెనీలు ఇండియాలో తమ కార్యకలాపాలను విస్తరిస్తున్నాయి.

మరి అమెరికా కంపెనీలకు ఇండియాలో ఉద్యోగాలు కల్పించడం తప్పు కానప్పుడు, ఇండియన్స్ అమెరికాలో ఉద్యోగాలు చేయడాన్ని మాత్రం ఎందుకు ప్రశ్నిస్తున్నారు?
ఈ డిబేట్ ఇప్పుడు కొత్త చర్చకు దారితీసింది.

అసలు ఈ చర్చకు కారణం ఏంటి? అమెరికాకు చెందిన బ్లాక్‌స్టోన్ కంపెనీ బెంగళూరులో కొత్తగా ఒక గ్లోబల్ కెపాబిలిటీ సెంటర్‌ను ప్రారంభించింది. ఇది ఇండియాలో ఆ కంపెనీకి రెండో ఆఫీస్. ఇప్పటికే ముంబైలో కార్యకలాపాలు నిర్వహిస్తున్న బ్లాక్‌స్టోన్, ఇప్పుడు బెంగళూరులో కూడా తన కార్యకలాపాలను విస్తరిస్తోంది.

అయితే, ఈ వార్త బయటకు వచ్చిన తర్వాత అమెరికాలో కొంతమంది నెటిజన్లు ప్రశ్నలు లేవనెత్తుతున్నారు. అమెరికాలో ఉద్యోగాల విషయంలో ఇంత కఠినంగా వ్యవహరిస్తూ, అదే అమెరికన్ కంపెనీలు ఇండియాలో ఉద్యోగాలు ఎందుకు కల్పిస్తున్నాయని నిలదీస్తున్నారు.

ఇక్కడ మనం ఒక విషయం అర్థం చేసుకోవాలి. బ్లాక్‌స్టోన్ అంటే ఏదో చిన్న కంపెనీ కాదు. ప్రపంచంలోనే అతిపెద్ద ఆల్టర్నేటివ్ అసెట్ మేనేజ్‌మెంట్ సంస్థల్లో ఇది ఒకటి.

అంటే వివిధ రకాల పెట్టుబడులు, ప్రైవేట్ ఈక్విటీ, రియల్ ఎస్టేట్, క్రెడిట్ వంటి రంగాల్లో భారీగా డబ్బును నిర్వహించే కంపెనీ అన్నమాట. సంస్థకు ప్రపంచవ్యాప్తంగా వ్యాపారాలు ఉన్నాయి.

ఆ వ్యాపారాలను సమర్థంగా నడపడానికి ఫైనాన్స్, టెక్నాలజీ, హ్యూమన్ రిసోర్సెస్, లీగల్, కంప్లయన్స్ లాంటి విభాగాలు అవసరం. ఇలాంటి కార్యకలాపాలకు బెంగళూరులో కొత్త సెంటర్‌ను ఏర్పాటు చేయడం కంపెనీ వ్యూహంలో భాగం.

మరో ఆసక్తికరమైన విషయం ఏంటంటే, ఈ కేంద్రం కేవలం ఇండియాలోని కార్యకలాపాల కోసమే కాదు. ప్రపంచవ్యాప్తంగా ఉన్న బ్లాక్‌స్టోన్ వ్యాపారాలకు అవసరమైన సేవలను కూడా అందిస్తుంది. అంటే మన దగ్గర పనిచేసే ఉద్యోగులు అమెరికాతో పాటు ఇతర దేశాల్లోని కార్యకలాపాలకు కూడా మద్దతు ఇవ్వబోతున్నారన్నమాట.

ఇక్కడే అసలు ప్రశ్న మొదలవుతోంది.

అమెరికాలో ప్రస్తుతం హెచ్‌-1బీ వీసాలపై, విదేశీ ఉద్యోగులను నియమించుకోవడంపై తీవ్ర చర్చ జరుగుతోంది.

అమెరికన్లకు అందాల్సిన ఉద్యోగాలను విదేశీయులు తీసుకుంటున్నారనే వాదనలు వినిపిస్తున్నాయి. అమెరికా ప్రభుత్వం కూడా విదేశీ ఉద్యోగుల నియామకాల విషయంలో కఠినమైన విధానాలను అనుసరించాలనే ఒత్తిడిని ఎదుర్కొంటోంది.

అయితే, అదే సమయంలో అమెరికాకు చెందిన కంపెనీలు ఇండియాలో తమ ఆఫీసులను పెంచుకుంటున్నాయి. అక్కడి ఉద్యోగాలను ఇక్కడికి తీసుకొస్తున్నాయి.

దీంతో కొంతమంది అమెరికన్లు ఒక లాజికల్ ప్రశ్న వేస్తున్నారు. అమెరికాలో విదేశీ ఉద్యోగుల వల్ల తమ ఉద్యోగాలకు ముప్పు ఉందని చెబుతున్నప్పుడు, అమెరికన్ కంపెనీలు తమ పనులను ఇండియాకు తరలిస్తే మాత్రం ఎందుకు అభ్యంతరం చెప్పకూడదని అడుగుతున్నారు.

ఒక కంపెనీ అమెరికాలో విదేశీ ఉద్యోగిని నియమించుకోవడం ఒక విషయం. అదే కంపెనీ ఇండియాలో ఒక ఆఫీస్ పెట్టి, అక్కడి ఉద్యోగులతో తన గ్లోబల్ బిజినెస్‌ను నడిపించడం మరో విషయం.

ఈ రెండింటి మధ్య తేడా ఉంది. వీసాలపై ఆంక్షలు విధించినంత మాత్రాన కంపెనీలు తమ కార్యకలాపాలను విదేశాల్లో విస్తరించకుండా ఆపలేం.

ఎందుకంటే కంపెనీలు ఎక్కడ వ్యాపారం నిర్వహించాలనే నిర్ణయం తీసుకునేటప్పుడు ఖర్చులు, నైపుణ్యం, మౌలిక సదుపాయాలు, వ్యాపార అవసరాలు వంటి అనేక అంశాలను పరిశీలిస్తాయి.

ఇప్పుడు మనం ఇండియా కోణంలో ఆలోచిద్దాం.

ఒక అమెరికన్ కంపెనీ ఇండియాలో పెట్టుబడి పెట్టిందంటే మనకు ఏం లాభం? మొదటగా ఉద్యోగాలు వస్తాయి.

ముఖ్యంగా టెక్నాలజీ, ఫైనాన్స్, ఇంజినీరింగ్, డేటా అనాలిసిస్, కంప్లయన్స్ వంటి రంగాల్లో నైపుణ్యాలు ఉన్నవారికి అవకాశాలు పెరుగుతాయి. అంతర్జాతీయ కంపెనీలతో కలిసి పనిచేయడం వల్ల మన ఉద్యోగులకు ప్రపంచ స్థాయి పని అనుభవం కూడా లభిస్తుంది.

రెండో విషయం, విదేశీ కంపెనీలు ఇండియాలో తమ కార్యకలాపాలను విస్తరించడం వల్ల బెంగళూరు, హైదరాబాద్, పుణె, ముంబై వంటి నగరాలకు మరిన్ని వ్యాపార అవకాశాలు వస్తాయి.

ఆఫీసులు పెరిగితే వాటి చుట్టూ రియల్ ఎస్టేట్, ట్రాన్స్‌పోర్ట్, హోటళ్లు, రెస్టారెంట్లు, ఇతర సేవల రంగాలకు కూడా కొంత మేర ప్రయోజనం కలుగుతుంది.

కానీ ఇక్కడ ఒక విషయం గుర్తుంచుకోవాలి. ఒక కంపెనీ ఇండియాలో ఆఫీస్ ప్రారంభించిందని చెప్పగానే వేలాది ఉద్యోగాలు వచ్చేశాయని అనుకోకూడదు.

బ్లాక్‌స్టోన్ బెంగళూరు కేంద్రంలో ప్రస్తుతానికి సుమారు 80 మంది ఉద్యోగులు ఉన్నారు. ఏడాది చివరికి 100 మందికి పైగా చేరవచ్చనేది అంచనా మాత్రమే. కాబట్టి ఈ ఒక్క ప్రకటనను చూసి భారీ స్థాయిలో ఉద్యోగ విప్లవం వచ్చేసిందని చెప్పడం తొందరపాటే.

ఇదే సమయంలో, బ్లాక్‌స్టోన్ ఇండియాపై తన పెట్టుబడులను మరింత పెంచుకోవాలని లక్ష్యంగా పెట్టుకుంది. టైమ్స్ ఆఫ్ ఇండియా నివేదిక ప్రకారం, ప్రస్తుతం సుమారు 51 బిలియన్ డాలర్లుగా ఉన్న ఇండియా పెట్టుబడులను 2030 నాటికి 100 బిలియన్ డాలర్లకు పెంచాలని సంస్థ భావిస్తోంది.

ఇక అమెరికాలో ఈ అంశంపై విమర్శలు చేస్తున్నవారి వాదన కూడా పూర్తిగా అర్థం చేసుకోవాల్సిందే. తమ దేశంలో ఉద్యోగ అవకాశాలు తగ్గుతున్నాయని భావించే వ్యక్తులు, కంపెనీలు ఇతర దేశాలకు పనులను తరలిస్తే ఆందోళన చెందడం సహజమే. అయితే, ప్రతి ఉద్యోగం విదేశాలకు వెళ్లిపోతోందని అనుకోవడం కూడా సరైంది కాదు.

కంపెనీలు కొన్ని విభాగాలను ఇండియాలో నిర్వహించినప్పటికీ, కీలకమైన పెట్టుబడి నిర్ణయాలు, వ్యూహాత్మక కార్యకలాపాలు, ఇతర ఉద్యోగాలు అమెరికాలోనే కొనసాగించవచ్చు. ఏ కంపెనీ విషయంలోనైనా వాస్తవ పరిస్థితులు వేర్వేరుగా ఉంటాయి.

అంతేకాదు, అమెరికన్ కంపెనీలు ఇండియాలో పెట్టుబడులు పెట్టడం వల్ల అమెరికాకూ కొన్ని ప్రయోజనాలు ఉండవచ్చు.

ఖర్చులు తగ్గడం, వ్యాపార సామర్థ్యం పెరగడం, ప్రపంచ మార్కెట్లకు మెరుగైన సేవలు అందించడం ద్వారా కంపెనీలు తమ లాభాలను పెంచుకోవచ్చు.

ఆ లాభాలు తిరిగి పెట్టుబడులుగా మారవచ్చు. అయితే, ఆ ప్రయోజనాలు ఎంతవరకు అమెరికన్ ఉద్యోగులకు చేరుతాయి అనేది వేరే ప్రశ్న.

మొత్తానికి, బ్లాక్‌స్టోన్ బెంగళూరు విస్తరణ ఇండియాకు ఒక సానుకూల పరిణామమే. అయితే, దీనివల్ల ఎన్ని కొత్త ఉద్యోగాలు వస్తాయి? హైదరాబాద్ వంటి నగరాల్లో మరిన్ని అంతర్జాతీయ కంపెనీలు తమ కార్యకలాపాలను విస్తరిస్తాయా? అమెరికాలో విదేశీ ఉద్యోగులపై ఆంక్షలు పెరిగినా, కంపెనీలు ఇండియాకు పనులను తరలించడం కొనసాగిస్తాయా?

ఈ ప్రశ్నలకు రాబోయే రోజుల్లో సమాధానాలు దొరకవచ్చు.

కానీ ఒక విషయం మాత్రం స్పష్టం. ఈ రోజుల్లో కంపెనీలు కేవలం ఒక దేశం కోసం పనిచేయడం లేదు. ప్రపంచవ్యాప్తంగా ఉన్న నైపుణ్యాలను, అవకాశాలను ఉపయోగించుకుంటూ వ్యాపారాలు నిర్వహిస్తున్నాయి.

ఈ మార్పులో ఇండియా తనకున్న నైపుణ్యాన్ని, మానవ వనరులను ఎంత సమర్థంగా ఉపయోగించుకుంటుందన్నదే అసలైన విషయం.

– శ్రీనివాసమూర్తి