ప్రేమించే గిరిజ‌నుల‌కు జ‌గ‌న్ రిట‌ర్న్ గిఫ్ట్ ఏదీ?

స్థానిక సంస్థ‌ల ఎన్నిక‌ల్లో వైసీపీ ప‌రువును ఉత్త‌రాంధ్ర‌లోని గిరిజ‌న ప్రాంతం నిలిపింది. వైసీపీకి కంచుకోట లాంటి రాయ‌ల‌సీమ‌, ప‌ల్నాడు ప్రాంతాల్లో చాలా వ‌ర‌కూ వైసీపీ అభ్య‌ర్థుల్ని నామినేష‌న్లు వేయ‌నివ్వ‌ని దుస్థితి. ఆయా ప్రాంతాల్లో టీడీపీ ఏక‌గ్రీవాల పేరుతో బ‌ల‌వంత‌పు విజ‌యాల్ని సొంతం చేసుకున్న సంగతి తెలిసిందే.

అయితే వైఎస్ జ‌గ‌న్‌పై ఉత్త‌రాంధ్ర‌లోని గిరిజ‌నులు గుండెల్లో పెట్టుకున్నారు. క‌ష్ట‌కాలంలో అండ‌గా వుంటామ‌ని, అత్యంత దారుణ ప‌రిస్థితుల్లోనూ వైసీపీకి వారు అండ‌గా నిలిచిన తీరు గురించి ఎంతగా ప్రశంసించినా త‌క్కువే.

ప్రేమ‌కు అదే రిట‌ర్న్ గిఫ్ట్ అని ప్ర‌త్యేకంగా చెప్పాల్సిన ప‌నిలేదు. అయితే గిరిజ‌నులు చూపిన తెగువ‌, ప్ర‌ద‌ర్శించిన ప్రేమ‌కు అంతేస్థాయిలో వాటిని పంచ‌డంలో వైసీపీ విఫ‌లం అయ్యింద‌నే విమ‌ర్శ వెల్లువెత్తుతోంది.

ఇటీవ‌ల ముగిసిన ప‌ల్లె పోరులో అల్లూరి జిల్లాలో వైసీపీ విజ‌య ఢంకా మోగించి, జ‌గ‌న్‌పై గిరిజ‌నుల ప్రేమ ఏ మాత్రం త‌గ్గ‌లేద‌ని నిరూపిత‌మైంది.

అల్లూరు జిల్లాలో మొత్తం 11 జెడ్పీటీసీ స్థానాలుండ‌గా, వాటిలో ఏడు వైసీపీకి ద‌క్కాయి. మిగిలిన నాలుగింటిలో కూట‌మికి 3, సీపీఎంకు ఒక జెడ్పీటీసీ స్థానం ద‌క్కాయి. అలాగే 172 ఎంపీటీసీ స్థానాల్లో 89 వైసీపీకి ద‌క్కాయి. ప‌ల్లె పోరులో గిరిజ‌నులు ఏక‌ప‌క్షంగా వైసీపీపై నిలిచార‌నేందుకు ఈ ఫ‌లితాలే నిద‌ర్శ‌నం

అలాగే సార్వ‌త్రిక ఎన్నిక‌ల్లో కూడా గిరిజ‌నం వైసీపీ వైపు నిలిచారు. అర‌కు పార్ల‌మెంట్‌తో పాటు అసెంబ్లీ, అలాగే పాడేరు ఎమ్మెల్యేలుగా వైసీపీ అభ్య‌ర్థులే గెలుపొందారు. త‌మ‌కు అన్ని ర‌కాలుగా అండ‌గా నిలిచిన గిరిజ‌నుల‌పై వైఎస్ జ‌గ‌న్‌తో పాటు ఆ పార్టీ నాయ‌కులు గ‌ట్టిగా అండ‌గా నిల‌వాల్సిన బాధ్య‌త వుంది. ప‌రిష‌త్ పోరులో రాష్ట్ర‌మంత‌టికీ క‌లిపి అల్లూరి జిల్లా ప‌రిష‌త్ మాత్ర‌మే వైసీపీకి ద‌క్కింది.

ప‌రిష‌త్ ఎన్నిక‌ల్లో ఓటుకు రూ.2 వేల నుంచి రూ.3 వేలు వ‌ర‌కు కూటమి నేత‌లు గిరిజ‌న ప్రాంతాల్లో పంపిణీ చేసిన‌ట్టు తెలుస్తోంది. అయిన‌ప్ప‌టికీ ప్ర‌లోభాల‌కు వారు లొంగ‌లేదు.

అలాగే ఓట‌ర్ల‌ను భ‌య‌పెట్టి, సీమ‌లో మాదిరిగా విజ‌యాల్ని త‌మ ఖాతాలో వేసుకోవాల‌ని కూట‌మి నేత‌లు ప్ర‌య‌త్నించిన‌ట్టు స‌మాచారం. ఎన్నిక‌ల్లో గిరిజ‌నులంతా క‌ట్టెలు ప‌ట్టుకుని, కూట‌మి నేత‌ల‌పై తిరగ‌బ‌డ‌డం వ‌ల్లే, నేడు వైసీపీ త‌లెత్తుకుని నిల‌బ‌డ‌గ‌లిగింది.

పార్టీ కోసం త్యాగాలు చేసిన గిరిజ‌నుల ప్రేమాభిమానాల్ని వైసీపీ పెద్ద‌లు గుర్తించాలి. వాళ్ల‌ను గుండెల్లో పెట్టుకుని నిల‌బ‌డాల్సిన వైసీపీ పెద్ద‌లు, ఆ దిశ‌గా అడుగులు వేస్తున్న‌ట్టు క‌నిపించ‌డం లేదు.

రాష్ట్రంలో వైసీపీ శ్రేణుల్లో స్ఫూర్తి నింపేలా గిరిజ‌నులు నిల‌బ‌డ‌డాన్ని, ఆ పార్టీ నాయ‌కులు విస్తృతంగా జ‌నంలోకి తీసుకెళ్లాలి. ప్ర‌లోభాలు, దాడుల‌కు భ‌య‌ప‌డి వెన్నుచూపిన వైసీపీ నాయ‌కుల గురించి వింటున్నాం.

కానీ పేద ప్ర‌జ‌లైనా గిరిజ‌నులు మాత్రం వైఎస్ జ‌గ‌న్ కోసం ఎందాకైనా అన్న‌ట్టు నిల‌బ‌డిన తీరు అద్భుతం. అలాంటి పేద గిరిజ‌నులు కోరుకునేది గుప్పెడు జ‌గ‌న్ ప్రేమ మాత్రం. ఇదేమీ డ‌బ్బు ఖ‌ర్చ‌య్యేది కూడా.

జ‌స్ట్ ఒక ఆత్మీయ ప‌ల‌క‌రింపే. గిరిజ‌న ప్రాంతాల‌కు వెళ్లి, వారితో క‌లిసి ప్రేమ పంచుకోవ‌డం ద్వారా త‌న పార్టీ శ్రేణుల‌కు జ‌గ‌న్ సానుకూల సంకేతం పంపిన‌ట్టు అవుతుంది. మంచి ప‌నికి ఆల‌స్యం ఎందుకు జ‌గ‌న్‌? బెంగ‌ళూరు బ‌దులు ఒక వారం అర‌కు వెళితే పోయేదేముంది?