కంటెంట్ బాగుంటేనే ఆదరణ

శ్రీ‌కాంత్‌, వ‌ర‌ల‌క్ష్మీ శ‌ర‌త్‌కుమార్‌, రాహుల్ విజ‌య్‌, శివాని ముఖ్య‌తార‌లుగా తేజ మార్ని తెరకెక్కించిన చిత్రం ‘కోట బొమ్మాళి పీఎస్‌’. గీతా ఆర్ట్స్ 2 బ్యానర్‌‌పై బన్నీ వాస్, విద్యా కొప్పినీడి నిర్మించారు. ఈ శుక్ర‌వారం ప్రేక్ష‌కుల ముందుకొచ్చిన ఈ చిత్రం ప్రేక్ష‌కుల అభినంద‌న‌ల‌తో పాటు విమ‌ర్శ‌కుల ప్ర‌శంస‌లు కూడా అందుకుంటూ బ్లాక్‌బ‌స్ట‌ర్ చిత్రంగా విజ‌య‌ప‌థంలో దూసుకెళుతోంది. 

ఈ సంద‌ర్భంగా చిత్ర యూనిట్ థ్యాంక్స్ మీట్‌ను ఏర్పాటు చేసింది. ఈ సంద‌ర్భంగా నిర్మాతల్లో ఒక‌రైన బ‌న్నీవాస్ మాట్లాడుతూ సినిమా కంటెంట్ బాగుంటే మీడియా త‌ప్ప‌కుండా ప్రోత్స‌హిస్తుంద‌నే విష‌యాన్నీ ఈ చిత్రానికి జర్నలిస్ట్ లు అందిస్తున్న స‌పోర్టుతో మ‌రో సారి ప్రూవ్ అయింది అని అన్నారు. నయాట్టు అనే క్లాసిక్ చిత్రాన్ని తెలుగులో క‌మ‌ర్షియ‌ల్ హంగుల‌తో చేస్తున్న‌ప్పుడు మొద‌ట్లో కాస్త భ‌య‌ప‌డ్డానని, కానీ ఈ రోజు మీడియా రెస్పాన్స్ చూస్తుంటే ఆనందంగా వుందని అన్నారు.

ఓ మంచి సినిమా తీశాను అది జ‌నాల‌కు న‌చ్చింద‌నే విష‌యాన్ని మాత్రం కాన్ఫిడెంట్‌గా చెప్ప‌గ‌ల‌నని బన్నీ వాస్ అన్నారు. తేజ మార్ని ఎంతో ప్ర‌తిభ గ‌ల ద‌ర్శ‌కుడు. ఈ రోజు చిత్రంలో ప్ర‌తి స‌న్నివేశానికి క్లాప్స్ ప‌డుతున్నాయంటే అత‌నే కార‌ణం. భ‌విష్య‌త్‌లో అత‌ను మంచి క‌మ‌ర్షియ‌ల్ ద‌ర్శ‌కుడిగా ఎదుగుతాడు. శ్రీ‌కాంత్ అన్న‌య్య సొసైటీకి ఉప‌యోగ‌ప‌డే పాత్ర ఎప్పూడు చేసిన ఆ సినిమా స‌క్సెస్ అవుతుంద‌ని ఈ చిత్రం మ‌రోసారి నిరూపించింది. త‌ప్ప‌కుండా ఈ చిత్రం మ‌రింత జ‌నాద‌ర‌ణ పొందుతుంద‌నే న‌మ్మ‌కం వుంది అని అన్నారు.

హీరో శ్రీ‌కాంత్ మాట్లాడుతూ మీడియా మిత్రులు చాలా మంది ఫోన్ చేసి అభినందిస్తుంటే ఆనందంగా వుంది. ఖ‌డ్గం, ఆప‌రేష‌న్ దుర్యోద‌న రోజులు గుర్తొచ్చాయ‌ని అంద‌రూ అంటున్నారు. ఈ మ‌ధ్య‌కాలంలో నాకు ఏ చిత్రానికి ఇన్ని ప్ర‌శంస‌లు రాలేదు. ఇలాంటి సినిమా తీయాలంటే గ‌ట్స్ వున్న నిర్మాత‌లు కావాలి. ఆ గ‌ట్స్ నాకు వాసు, విద్య‌లో క‌నిపించాయి. మొద‌ట్లో ఈ చిత్రంలో నా పాత్ర‌ను చేయ‌గ‌ల‌నా అనుకున్నాను. కానీ ధైర్యంగా ఛాలెంజింగ్‌గా తీసుకుని చేశాను. నా కెరీర్‌ను మ‌లుపుతిప్పిన గీతా ఆర్ట్స్ సంస్థ‌లో మ‌ళ్లీ నాకు మ‌రో మంచి స‌క్సెస్ రావ‌డం సంతోషంగా వుంది. ఈ చిత్ర ద‌ర్శ‌కుడు తేజ గొప్ప ద‌ర్శ‌కుడుగా ఎదుగుతాడు అన్నారు.

ఎంతో క‌ష్ట‌ప‌డి , అంద‌రి స‌హ‌కారంతో చేసిన ఈ సినిమాకు ఈ రోజు ఇంత మంచి ఆద‌ర‌ణ దొర‌క‌డం హ్య‌పీగా వుంద‌ని ద‌ర్శ‌కుడు తేజ మార్ని తెలిపారు. శివాని మాట్లాడుతూ సినిమాలో తన న‌ట‌న గురించి అంద‌రూ అమ్మ‌కు ఫోన్ చేసి అభినందిస్తున్నారు. మంచి కంటెంట్‌తో సినిమ తీస్తే తెలుగు ఆడియ‌న్స్ ఎప్పూడు ఆద‌రిస్తార‌ని ఈ చిత్ర విజ‌యం మ‌రోసారి నిరూపించింది. మౌత్ టాక్‌తో ఈ సినిమాకు ఆద‌ర‌ణ పెరుగుతుంది. ఇదే ఈ చిత్ర స‌క్సెస్‌కు నిద‌ర్శ‌నం అన్నారు. 

హీరో రాహుల్ విజ‌య్ మాట్లాడుతూ ఇదొక నిజాయితీ అంటెప్ట్‌. సొసైటిలో జ‌రుగుతున్న దానికి రిఫ్ల‌క్ష‌న్ ఇది. శ్రీ‌కాంత్ గారి పాత్ర నా క‌ళ్ల‌లో నీళ్లు తెప్పించింది. నా పాత్ర‌కు కూడా మంచి ప్ర‌శంస‌లు వస్తున్నాయి అన్నారు. సినిమా విజ‌యం ప‌ట్ల స‌హ నిర్మాత భాను త‌న ఆనందాన్ని తెలిపారు.