సీక్వెల్ రెడీ.. చిరంజీవి రీమేక్ చేయట్లేదా?

లూసిఫర్ సినిమాకు రీమేక్ గా ‘గాడ్ ఫాదర్’ చేశారు చిరంజీవి. ఇప్పుడా సినిమాకు సీక్వెల్ వస్తోంది. మరి ఈ సీక్వెల్ కు కూడా చిరంజీవి రీమేక్ చేస్తారా?

ఇప్పుడీ సందేహం ఎందుకొచ్చిందంటే.. లూసిఫర్ సీక్వెల్ రిలీజ్ కు రెడీ అయింది. నిజంగా రీమేక్ చేయాలనుకుంటే, ముందుగానే సినిమా చూడాలి. నచ్చితే రైట్స్ తీసుకోవాలి. ఆ మేరకు తెలుగు థియేట్రికల్ రిలీజ్ ఆపాలి. ఈ ప్రయత్నాలేవీ జరుగుతున్నట్టు కనిపించడం లేదు.

లూసిఫర్ విషయంలో చాలా జరగలేదు. సినిమా తెలుగులో కూడా రిలీజైంది. ఓటీటీలో తెలుగు వెర్షన్ ను విపరీతంగా చూశారు జనం. ఆ తర్వాత తాపీగా రీమేక్ ప్రకటించారు, ఒరిజినల్ కథకు చిన్నచిన్న మార్పులు చేసినప్పటికీ.. ఆల్రెడీ చూసేసిన సినిమా కావడంతో చాలామంది సేమ్ స్టోరీలో చిరంజీవిని చూసిన తర్వాత ‘హై’ ఫీలవ్వలేకపోయారు. ఇదే విషయాన్ని దర్శకుడు మోహన్ రాజా ఓ టైమ్ లో అంగీకరించాడు కూడా.

ముందే జాగ్రత్తపడకపోతే, సీక్వెల్ విషయంలో కూడా అదే మిస్టేక్ రిపీట్ అవుతుంది. ప్రస్తుతానికైతే లైకా ప్రొడక్షన్స్ నిర్మాతలు, తమ సినిమాను తెలుగులో కూడా రిలీజ్ చేయబోతున్నట్టు ప్రకటించారు. వచ్చే ఏడాది సమ్మర్ ఎట్రాక్షన్ గా మార్చి 27న ‘ఎల్-2 ఎంపురాన్’ (లూసిఫర్ 2) థియేటర్లలోకి వస్తుంది.

ఫృధ్వీరాజ్ సుకుమారన్ దర్శకత్వంలో మోహన్ లాల్ హీరోగా తెరకెక్కుతోంది ‘ఎల్-2 ఎంపురాన్’. టొవినో థామస్, మంజు వారియర్ లాంటి నటీనటులు కీలక పాత్రల్లో కనిపించబోతున్నారు. సినిమా నుంచి మోహన్ లాల్, ఫృధ్వీరాజ్ ఫస్ట్ లుక్స్ ను ఇప్పటికే విడుదల చేశారు.