ఎపిక్ మూవీకి తేదీలు ఖరారు

దేశవ్యాప్తంగా ఆసక్తి రేకెత్తిస్తున్న ప్రాజెక్టు రామాయణ. రణబీర్ కపూర్, సాయిపల్లవి హీరోహీరోయిన్లుగా నటిస్తున్న సినిమా ఇది.

నితీష్ తివారీ దర్శకత్వంలో వస్తున్న ఈ సినిమాలో రణబీర్ రాముడిగా, సాయిపల్లవి సీతగా కనిపించబోతున్నారు. ఇప్పటికే షూటింగ్ మొదలైన సంగతి తెలిసిందే. కొన్ని స్టిల్స్ కూడా లీక్ అయ్యాయి. ఇప్పుడీ ప్రాజెక్టుకు విడుదల తేదీలు ఖరారు చేశారు.

రామాయణ పార్ట్-1ను 2026 దీపావళికి, పార్ట్-2ను 2027 దీపావళికి విడుదల చేయబోతున్నట్టు తెలిపారు. అయితే ఈ సినిమా షూటింగ్ అప్ డేట్స్ మాత్రం వెల్లడించలేదు.

తాజా సమాచారం ప్రకారం.. ఈ సినిమా రెండు భాగాలకు చెందిన షూటింగ్ ను ఒకేసారి పూర్తిచేస్తారు. ఆ తర్వాత తొలి భాగం పోస్ట్ ప్రొడక్షన్ మొదలుపెడతారు.

ఈ ప్రాజెక్టులో యష్ భాగమైన విషయం తెలిసిందే. కేజీఎఫ్ స్టార్ ఈ సినిమాలో రావణుడిగా కనిపించబోతున్నాడు.

అంతేకాదు, నిర్మాణంలో భాగస్వామి కూడా. ఇక హనుమంతుడిగా సన్నీ డియోల్, శూర్పనఖగా రకుల్ ప్రీత్ సింగ్ కనిపించబోతున్నారనే టాక్ నడుస్తోంది. దీనిపై ఇంకా క్లారిటీ రాలేదు.

ప్రారంభంలో ఈ సినిమా బడ్జెట్ ను వెయ్యి కోట్ల రూపాయలుగా అంచనా వేశారు. అయితే మారిన లెక్కల ప్రకారం, మరో 200 కోట్ల రూపాయలు అదనంగా ఖర్చు అవుతుందని తేల్చారు.

ఇక సినిమా తెలుగు వెర్షన్ కు సంబంధించి త్రివిక్రమ్ ను రంగంలోకి దింపే ఆలోచనలో ఉన్నారు. త్వరలోనే ఈ ప్రాజెక్టుపై మరిన్ని అప్ డేట్స్ రాబోతున్నాయి.