స్పిరిట్ మూవీ.. సర్ ప్రైజ్ ఇచ్చిన నిర్మాత

ప్రభాస్ హీరోగా, సందీప్ రెడ్డి వంగా దర్శకత్వంలో స్పిరిట్ మూవీ సెట్స్ పైకి రావాల్సి ఉంది. ప్రస్తుతం ప్రీ-ప్రొడక్షన్ పనుల్లో ఉన్నాడు సందీప్. ఇక ఈ సినిమాపై సోషల్ మీడియాలో నడుస్తున్న చర్చ అంతాఇంతా కాదు.

స్పిరిట్ మూవీ వచ్చే ఏడాది జనవరి నుంచి సెట్స్ పైకి వస్తుందని కొందరంటున్నారు. ఇందులో ప్రభాస్ లుక్ కొత్తగా ఉంటుంది కాబట్టి, మేకోవర్ కు టైమ్ తీసుకొని, వచ్చే ఏడాది మార్చి నుంచి షూట్ స్టార్ట్ చేస్తారని మరికొందరు చెబుతున్నారు.

వీళ్లందరికీ మూకుమ్మడిగా షాకిచ్చాడు నిర్మాత భూషణ్ కుమార్. స్పిరిట్ మూవీ వచ్చే నెల నుంచే సెట్స్ పైకి వస్తుందని ప్రకటించి ఆశ్చర్యానికి గురిచేశాడు. అవును.. డిసెంబర్ నెలాఖరుకు స్పిరిట్ షూట్ స్టార్ట్ అవుతుందట.

ప్రస్తుతం రాజాసాబ్ పనుల్లో బిజీగా ఉన్నాడు ప్రభాస్. అటు హను రాఘవపూడి దర్శకత్వంలో ‘ఫౌజీ’ కూడా సెట్స్ పై ఉంది. వీటితో పాటు స్పిరిట్ మూవీ సెట్స్ పైకి వచ్చేలా ఉంది.

ప్రస్తుతం ఈ మూవీకి సంబంధించి మ్యూజిక్ సిట్టింగ్స్ లో బిజీగా ఉన్నాడు దర్శకుడు సందీప్ వంగ. హర్షవర్షన్ రామేశ్వర్ ఈ సినిమాకు కొన్ని థీమ్ మ్యూజిక్స్ అందించే పనిలో ఉన్నాడు. ఇవి కొలిక్కి వచ్చిన తర్వాత నటీనటుల ఎంపిక ఉంటుంది.

‘స్పిరిట్’లో పోలీస్ గా కనిపించబోతున్నాడు ప్రభాస్. ఇందులో సైఫ్ అలీఖాన్, కరీనా కపూర్ జోడీ కీలక పాత్రల్లో నటించనున్నారు. హీరోయిన్ ఎవరనేది ఇంకా నిర్ణయించలేదు.