ఆశలన్నీ ఈ 4 పైనే!

నవంబర్ అంటేనే డ్రై అనే ఫీలింగ్ అందరికీ. దసరా అయిపోతుంది. క్రిస్మస్, సంక్రాంతికి టైమ్ ఉంది. ఈ మధ్యలో ఉన్న నవంబర్ లో రావడానికి పెద్దగా ఆసక్తి చూపించవు పెద్ద సినిమాలు. మరి ఈ నెల చెప్పుకోదగ్గ సినిమాలు ఏమున్నాయి.. కేవలం 4 మాత్రమే.

నిఖిల్ హీరోగా వస్తోంది ‘అప్పుడో ఇప్పుడో ఎప్పుడో’ అనే మూవీ. కార్తికేయ-2 తర్వాత ఈ హీరో నుంచి వస్తున్న సినిమాలన్నింటిపై అంతోఇంతో బజ్ నడుస్తోంది. కానీ ‘అప్పుడో ఇప్పుడో ఎప్పుడో’ అనే సినిమా విషయంలో ఆ సందడి కనిపించడం లేదు. రిలీజ్ కు ఇంకా వారం రోజులే టైమ్ ఉంది.

నిఖిల్-సుధీర్ వర్మ కాంబినేషన్.. హాట్ సెన్సేషన్ రుక్మిణి వసంత్ హీరోయిన్.. అయినప్పటికీ సినిమాకు సరైన రీతిలో ప్రచారం చేయడం లేదు. ఇంతవరకు నిఖిల్ నేరుగా ప్రచారంలోకి దిగనేలేదు. సైలెంట్ గా రెడీ అయిన ఈ సినిమా, అంతే సైలెంట్ గా రిలీజ్ అవుతుందేమో.

ఇక నవంబర్ లో వస్తున్న మరో మూవీ ‘మట్కా‘. వరుసగా ఫ్లాపులిస్తున్న వరుణ్ తేజ్, ఈ సినిమాతో కచ్చితంగా హిట్ కొడతానంటున్నాడు. ‘ఇది నా ప్రామిస్’ అని కూడా వాగ్దానం చేస్తున్నాడు. కరుణ కుమార్ దర్శకత్వంలో పీరియాడిక్ డ్రామాగా తెరకెక్కుతున్న ఈ సినిమా 14న థియేటర్లలోకి వస్తోంది. మీనాక్షి చౌదరి, నోరా ఫతేహి హీరోయిన్లు.

ఈ నెలలో అందర్నీ ఎంతగానో ఆకర్షిస్తున్న సినిమా ‘కంగువా’. ఇంకా చెప్పాలంటే, నవంబర్ సినిమాల్లో అంతోఇంతో అంచనాలతో వస్తున్న సినిమా ఏదైనా ఉందంటే అది కంగువా మాత్రమే. సూర్య హీరోగా నటించిన ఈ సినిమాకు పాన్ ఇండియా లెవెల్లో ప్రచారం చేస్తున్నారు.

తెలుగులో సూర్య ఆల్రెడీ ఓ రౌండ్ ప్రచారం పూర్తిచేశాడు, మరో రౌండ్ వస్తాడట. శివ డైరక్ట్ చేసిన ఈ సినిమాలో దిశా పటానీ హీరోయిన్. ఈ సినిమాతో పాన్ ఇండియా స్టార్ అనిపించుకోవడంతో పాటు, తెలుగులో తన మార్కెట్ ను మరింత పెంచుకోవాలనుకుంటున్నాడు సూర్య. మట్కాతో పాటు వస్తోంది కంగువా.

విశ్వక్ సేన్ నటించిన మెకానిక్ రాకీ కూడా ఈనెల రిలీజెస్ లో ఉంది. శ్రద్ధా శ్రీనాధ్, మీనాక్షి చౌదరి హీరోయిన్లుగా నటించిన ఈ సినిమా 22న థియేటర్లలోకి వస్తోంది.

నవంబర్ లో రాబోతున్న సినిమాల్లో ఈ నాలుగింటిపైనే ప్రధానంగా చర్చ. లిస్ట్ లో జీబ్రా ఉన్నప్పటికీ, సత్యదేవ్ నటించిన ఈ సినిమా ఇంకా బజ్ మూవీస్ జాబితాలోకి చేరలేదు. వీటితో పాటు రోటీ కపడా రొమాన్స్, దేవకీ నందన వాసుదేవ, ధూమ్ థామ్ లాంటి చిన్నసినిమాలు బరిలో నిలిచాయి.